মহাৰাষ্ট্ৰৰ ৰাজনীতিত অপূৰণীয় ক্ষতি। এক মৰ্মান্তিক বিমান দুৰ্ঘটনাত প্ৰাণ হেৰুৱালে ৰাজ্যখনৰ উপ-মুখ্যমন্ত্ৰী তথা এন চি পি (NCP) নেতা অজিত পাৱাৰে। অসামৰিক বিমান পৰিবহণ সঞ্চালকালয়ে (DGCA) ইতিমধ্যে নেতাগৰাকীৰ মৃত্যুৰ খবৰ নিশ্চিত কৰিছে। এই শোকাৱহ ঘটনাত পাৱাৰৰ লগতে আন চাৰিজন লোকৰো মৃত্যু হৈছে।
প্ৰাপ্ত তথ্য অনুসৰি, মুম্বাইৰ পৰা এক জৰুৰী ব্যক্তিগত তথা প্ৰশাসনিক কামত বাৰামতী অভিমুখে গৈ থকা অৱস্থাত আজি পুৱা প্ৰায় ৮:৪৫ বজাত এই দুৰ্ঘটনাটো সংঘটিত হয়। বাৰামতী বিমানবন্দৰত অৱতৰণ কৰিবলৈ চেষ্টা কৰাৰ সময়তে বিমানখনৰ পাইলটৰ সৈতে এ টি চি (ATC) বা বায়ু যাতায়াত নিয়ন্ত্ৰণ কক্ষৰ যোগাযোগ সম্পূৰ্ণৰূপে বিচ্ছিন্ন হৈ পৰে। বাৰামতী খেলপথাৰৰ সমীপত বিমানখন দুৰ্ঘটনাগ্ৰস্ত হয়। দুৰ্ঘটনাটোৰ পাছতে বিমানখনৰ ইন্ধনৰ টেংকিত বিস্ফোৰণ ঘটে আৰু মুহূৰ্ততে জুই আগুৰি ধৰে।
প্ৰাৰম্ভিক তথ্য অনুসৰি, দুৰ্ঘটনাৰ সময়ত অঞ্চলটোত দৃশ্যমানতা (Visibility) অতি কম আছিল। ধুঁৱলি-কুঁৱলি বতৰৰ বাবেই এই অঘটন ঘটিল নে কোনো যান্ত্ৰিক বিজুতিৰ বাবে এনে হ’ল, সেই সন্দৰ্ভত উচ্চ পৰ্যায়ৰ তদন্ত অব্যাহত আছে। বিমানখনে সকলো সুৰক্ষা প্ৰট’কল মানি চলিছিল নে নাই, সেইটোও পৰীক্ষা কৰা হৈছে।
মহাৰাষ্ট্ৰ চৰকাৰে এতিয়ালৈকে কোনো আনুষ্ঠানিক ঘোষণা কৰা নাই যদিও অজিত পাৱাৰৰ পৰিয়ালৰ সদস্যসকল ইতিমধ্যে বাৰামতী অভিমুখে ৰাওনা হৈছে। শৰদ পাৱাৰৰ কন্যা সুপ্ৰিয়া সুলেও ইতিমধ্যে বাৰামতীত উপস্থিত হৈছেগৈ। এই খবৰে পাৱাৰ পৰিয়ালৰ লগতে এন চি পিৰ সকলো নেতা-কৰ্মীক শোকত ম্ৰিয়মাণ কৰি তুলিছে।
উল্লেখ্য যে মঙলবাৰে মুম্বাইত এখন কেবিনেট বৈঠকত অংশগ্ৰহণ কৰাৰ পিছত বুধবাৰে পুৱা অজিত পাৱাৰ বাৰামতীলৈ ৰাওনা হৈছিল। আগন্তুক পৌৰ নিগমৰ নিৰ্বাচনৰ সন্দৰ্ভত পুনেত অনুষ্ঠিত হ’বলগীয়া কেইবাখনো গুৰুত্বপূৰ্ণ বৈঠকত অংশগ্ৰহণ কৰাৰ কথা আছিল নেতাগৰাকীৰ। এই মৰ্মান্তিক ঘটনাই সমগ্ৰ মহাৰাষ্ট্ৰৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে।
