মহাৰাষ্ট্ৰৰ উপ-মুখ্যমন্ত্রী অজিত পাৱাৰৰ এক বিমান দুৰ্ঘটনাত হোৱা আকস্মিক মৃত্যুত সমগ্ৰ দেশতে শোকৰ ছাঁ পৰিছে। বাৰামতীত সংঘটিত এই মৰ্মান্তিক ঘটনাই সকলোকে স্তম্ভিত কৰি তোলাৰ লগতে দেশৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে। এই দুখদায়ক ঘটনাক কেন্দ্ৰ কৰি গভীৰ শোক প্ৰকাশ কৰাৰ লগতে এক উচ্চস্তৰীয় তদন্তৰ দাবী জনাইছে পশ্চিমবংগৰ মুখ্যমন্ত্রী মমতা বন্দ্যোপাধ্যায়ে। তেওঁ এই দুৰ্ঘটনাৰ আঁৰত কোনো গভীৰ ষড়যন্ত্র থকাৰ সন্দেহ ব্যক্ত কৰি উচ্চতম ন্যায়ালয়ৰ তত্ত্বাৱধানত এক পূৰ্ণাংগ তদন্তৰ আহ্বান জনাইছে।
বুধবাৰে সংবাদ মাধ্যমৰ সৈতে হোৱা কথা-বতৰাত মুখ্যমন্ত্রী মমতা বন্দ্যোপাধ্যায়ে কয় যে এই খবৰটো পাই তেওঁ অত্যন্ত মৰ্মাহত হৈছে। এগৰাকী উচ্চ পৰ্যায়ৰ ৰাজনৈতিক নেতাৰ সৈতে এনে ঘটনা ঘটাটোৱে দেশৰ জনপ্ৰতিনিধিসকলৰ নিৰাপত্তা ব্যৱস্থাৰ ওপৰত এক ডাঙৰ প্রশ্নচিহ্ন থিয় কৰাইছে বুলি তেওঁ মন্তব্য কৰে। তেওঁৰ মতে এই দুৰ্ঘটনাই দেশৰ সামগ্রিক নিৰাপত্তা ব্যৱস্থাৰ ফোঁপোলা স্বৰূপটো উদঙাই দিছে।
মমতা বন্দ্যোপাধ্যায়ে এক বিশেষ সূত্ৰৰ উদ্ধৃতি দি কয় যে অলপতে অজিত পাৱাৰে বিজেপি ত্যাগ কৰাৰ চিন্তা-চৰ্চা চলাই আছিল। এনে এক জটিল ৰাজনৈতিক পৰিস্থিতিত এই বিমান দুৰ্ঘটনাটো অত্যন্ত সন্দেহজনক বুলি তেওঁ অভিহিত কৰে।
অৱশ্যে তেওঁ কাৰো নাম স্পষ্টকৈ উল্লেখ কৰা নাই যদিও ঘটনাৰ প্ৰতিটো দিশ সুক্ষ্মভাৱে পৰীক্ষা কৰাৰ প্ৰয়োজন আছে বুলি জোৰ দিছে। সেইবাবেই তেওঁ কোনো কেন্দ্রীয় সংস্থাৰ পৰিৱৰ্তে কেৱল উচ্চতম ন্যায়ালয়ৰ প্ৰত্যক্ষ নিৰীক্ষণত স্বচ্ছ তদন্ত বিচাৰিছে।
কেন্দ্রীয় তদন্তকাৰী সংস্থাসমূহৰ ওপৰত তেওঁৰ কোনো আস্থা নাই বুলিও মুখ্যমন্ত্ৰীগৰাকীয়ে পোনপটীয়াকৈ অভিযোগ কৰে। তেওঁৰ মতে কেন্দ্ৰীয় সংস্থাসমূহ বৰ্তমান চৰকাৰৰ হাতৰ পুতলাত পৰিণত হৈছে, গতিকে সত্য উদঘাটনৰ বাবে উচ্চতম ন্যায়ালয়ৰ হস্তক্ষেপ অনিবাৰ্য। দেশত সঘনাই ঘটি থকা বিমান দুৰ্ঘটনাসমূহৰ প্ৰসংগ উল্লেখ কৰি তেওঁ কয় যে বৰ্তমান দেশৰ মানুহৰ কোনো সুৰক্ষা নোহোৱা হৈছে, গতিকে এই মৃত্যুৰ প্ৰকৃত কাৰণ ৰাজহুৱা হোৱাটো জৰুৰী।
শেহতীয়া ৰাজনৈতিক পৰিবেশৰ কথা সোঁৱৰাই দি মমতাই কয় যে যদিও অজিত পাৱাৰ বিজেপি নেতৃত্বাধীন মিত্ৰজোঁটৰ অংশ আছিল, তথাপিও তেওঁৰ ৰাজনৈতিক অৱস্থানক লৈ বিভিন্ন গুণাগঁথা চলি আছিল। তেওঁৰ সিদ্ধান্ত সলনি কৰাৰ সম্ভাৱনা থকাৰ মাজতে এনেদৰে মৃত্যুক সাবটি লোৱাটো এক ডাঙৰ ক্ষতি বুলি তেওঁ উল্লেখ কৰে। তেওঁ বিয়োগান্তক পৰিয়ালটোৰ লগতে অজিত পাৱাৰৰ সহকর্মী আৰু সমর্থকসকললৈ সমবেদনা জ্ঞাপন কৰে।
ইফালে এই দুৰ্ঘটনাৰ কাৰণক লৈও বহুতো প্ৰশ্ন উত্থাপন হৈছে। জানিব পৰা মতে বুধবাৰে পুৱাৰে পৰা বাৰামতী আৰু ইয়াৰ কাষৰীয়া পাহাৰীয়া অঞ্চলত প্রচণ্ড কুঁৱলী আছিল। দৃশ্যমানতা প্ৰায় শূন্য থকাৰ পাছতো বিমানখন উৰিবলৈ কেনেকৈ অনুমতি দিয়া হ’ল তাক লৈ বিশেষজ্ঞসকলৰ মাজত মতভেদ দেখা গৈছে। যদিও অভিযন্তাসকলে উৰণৰ পূৰ্বে সকলো দিশ ঠিক থকা বুলি সেউজ সংকেত দিছিল, তথাপি এগৰাকী উপ-মুখ্যমন্ত্ৰীৰ দৰে ভিভিআইপিৰ যাত্ৰাত কোনো গাফিলতি আছিল নেকি তাক লৈ এতিয়া তীব্ৰ চৰ্চা চলিছে।
