বিশ্বনাথৰ পৰা কাজি জেইদুল ইছলাম
ৰাজ্য চৰকাৰে অসমৰ চৰকাৰী অসমীয়া মাধ্যমৰ বিদ্যালয়সমূহত তৃতীয় শ্ৰেণীৰ পৰা অংক আৰু বিজ্ঞান বিষয় দুটা ইংৰাজী ভাষাত পাঠদান কৰাৰ বাবে ৰাজ্য চৰকাৰ সিদ্ধান্তক স্ববিৰোধী অথবা অবিবেচকী সিদ্ধান্ত বুলি আখ্যা দি এই সিদ্ধান্তৰ তীব্ৰ বিৰোধিতা কৰাৰ লগতে এই হতকাৰি সিদ্ধান্তৰ বাতিলৰ দাবীত আজি অসম জাতীয়তাবাদী যুৱ-ছাত্ৰ পৰিষদ বিশ্বনাথ জিলা সমিতিয়ে বিশ্বনাথ নগৰত তিনিঘণ্টীয়া গণ অৱস্থান ধৰ্মঘট কাৰ্যসূচী গ্ৰহণ কৰে।ছাত্ৰ-ছাত্ৰীয়ে ইংৰাজী ভাষাতো ক’ব আৰু লিখিব পৰাটো সংগঠনটোৱেও বিচাৰে যাতে ৰাজ্যখনৰ ছাত্ৰ-ছাত্ৰীয়ে উচ্চ শিক্ষা গ্ৰহণ কৰোতে অথবা ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত অসুবিধাৰ সন্মুখিন নহয়।কিন্ত প্ৰথমে হিন্দী আৰু বৰ্তমান ইংৰাজী ভাষাৰ বোজা জাপি দি অসমীয়া ভাষাটোলে সংকট নমাই অনাটো পৰিষদে তীব্ৰ বিৰোধিতাকৰে।
সেয়েহে আজি অসম জাতীয়তাবাদী যুৱ-ছাত্ৰ পৰিষদ,বিশ্বনাথ জিলা সমিতিয়ে চৰকাৰৰ এনে স্ববিৰোধী আৰু অসমীয়া ভাষা বিদ্বেষী সিদ্ধান্তক তীব্ৰ গৰিহণা বা বিৰোধিতা জনাই এই সিদ্ধান্ত বাতিল কৰা আৰু ইয়াৰ পৰিৱৰ্তে অসমৰ প্ৰতিখন চৰকাৰী বিদ্যালয়ত প্ৰতিটো শ্ৰেণীৰ বিপৰীতে একোজনকৈ শিক্ষক নিযুক্তি দিয়া, বিজ্ঞান শিক্ষাৰ প্ৰতিষ্ঠান নতুনকৈ প্ৰতিষ্ঠা কৰা আৰু সকলো চৰকাৰী বিদ্যালয়ত শিক্ষা সম্পূৰ্ণ বিনামূলীয়া কৰাৰ দাবীত অসম জাতীয়তা বাদী যুৱ ছাত্ৰ পৰিষদে তিনি ঘন্টীয়া ‘গণ অৱস্থান ধৰ্মঘট’ কাৰ্যসূচী গ্ৰহণ কৰে।
শিৱসাগৰৰ পৰা পাৰ্শ্বজ্যোতি গগৈ
অসমীয়া মাধ্যমৰ বিদ্যালয়ত তৃতীয় শ্ৰেণীৰ পৰা গনিত আৰু বিজ্ঞান বিষয় ইংৰাজী ভাষাত পাঠদান কৰিবলৈ লোৱা চৰকাৰৰ সিদ্ধান্তৰ বিৰুদ্ধে আজি প্ৰতিবাদত বহিল অসম জাতীয়তাবাদী যুৱ ছাত্ৰ পৰিষদ ।সংগঠনটোৱে শিৱসাগৰ জিলা উপায়ুক্ত কাৰ্যালয়ৰ সন্মুখত অৱস্থান কৰি সাব্যস্ত কৰে এই প্ৰতিবাদ।চৰকাৰী আদৰ্শ বিদ্যালয়ত ছাত্ৰ ছাত্ৰীৰ পৰা ৩০০ টকাকৈ ল’ব বিচৰা সিদ্ধান্তৰো বিৰোধিতা এ জে ৱাই চি পিৰ।চৰকাৰী বিদ্যালয়ক ধ্বংস কৰিবলৈ ষড়যন্ত্ৰ কৰা বুলিও ক্ষোভ এ জে ৱাই চি পিৰ।
কলিয়াবৰৰ পৰা ৰিদিপ শৰ্মা
সমগ্ৰ ৰাজ্যৰ লগতে কলিয়াবৰতো অসম জাতীয়তাবাদী যুৱ ছাত্ৰ পৰিষদৰ “গণ অৱস্থান ধৰ্মঘট” কাৰ্যসূচী। তৃতীয় মান শ্ৰেণীৰ পৰা গণিত আৰু বিজ্ঞান বিষয় ইংৰাজী মাধ্যম কৰা বাতিল কৰা, প্ৰতিটো শ্ৰেণীৰ বিপৰীতে একোজনকৈ শিক্ষক দিয়াৰ দাবীত আজি প্ৰতিবাদ সাব্যস্ত কৰে। কলিয়াবৰ তিনিআলিৰ মহকুমাধিপতি কাৰ্যালয়ৰ সন্মুখত কৰা এই প্ৰতিবাদত অসম জাতীয়তাবাদী যুৱ ছাত্ৰ পৰিষদৰ বিত্ত সম্পাদক সঞ্জীৱ শৰ্মা আৰু কলিয়াবৰৰ বিশিষ্ট শিক্ষাবিদ ভূপেন শৰ্মা উপস্থিত থাকে।
আনহাতে অসম জাতীয়তাবাদী যুৱ ছাত্ৰ পৰিষদৰ কেন্দ্ৰীয় সমিতিৰ সম্পাদক পলাশ চাংমাই লগতে অন্যান্য সদস্য সকলক আটক কৰা ঘটনাক তীব্ৰ গৰিহণা জনাইছে জাতীয়তাবাদী যুৱ ছাত্ৰ পৰিষদৰ কলিয়াবৰৰ জিলা সমিতিয়ে। অনতি পলমে আটাইকেইজন সদস্যকে বিনা চৰ্তত মুক্তিৰ দাবী তুলিছে। অন্যথা গণতান্ত্ৰিক আন্দোলন পঢ়ি তোলাৰ হুংকাৰ দিয়ে।
