ক’লা পতাকাই লগ এৰা নাই মুখ্য মন্ত্ৰী সোণোৱালৰ; মাজুলীতো আজি ক’লা দিৱস ঘোষণা
ভোগালী বিহুৰ উৰুকাৰ দিনা আজি নিজা সমষ্টি মাজুলীত উপস্থিত হোৱাৰ সময়ত মুখ্য মন্ত্ৰী সৰ্বানন্দ সোণোৱাল সন্মুখীন হ’ব লাগিব বিভিন্ন দল-সংগঠনৰ প্ৰতিবাদী কাৰ্যসূচীৰ।
মাজুলীত বৰ্তমান ৰূপায়ণ হৈ থকা আঁচনিসমূহৰ অগ্ৰগতিৰ বুজ লোৱাৰ উদ্দেশ্যে আজি দিনৰ ১১ বজাত হেলিকপ্টাৰেৰে মাজুলীত উপস্থিত হ’ব মুখ্য মন্ত্ৰী সোণোৱাল।
ফলত নাগৰিকত্ব বিধেয়কৰ বিৰোধিতা কৰি বিভিন্ন দল-সংগঠনে প্ৰতিবাদ কৰি থকাৰ সময়তে আজি মুখ্য মন্ত্ৰী গৰাকীৰ মাজুলী ভ্ৰমণৰ সময়ত অসম জাতীয়তাবাদী যুৱ-ছাত্ৰ পৰিষদৰ মাজুলী জিলা সমিতিয়ে দিনটো ক’লা দিৱস হিচাপে ঘোষণা কৰিছে। লগতে জিলাখনৰ ৰাজহুৱা স্থানত ক’লা পতাকা উৰুৱাই নাগৰিকত্ব সংশোধনী বিধেয়ক, ২০১৬ৰ বিৰুদ্ধে প্ৰতিবাদ সাব্যস্ত কৰিব।
একেদৰে পৰিষদৰ সদস্যসকলে ক’লা বেজ পৰিধান কৰিব বুলি জনাইছে পৰিষদৰ কেন্দ্ৰীয় সমিতিৰ প্ৰচাৰ সম্পাদক মুনীন্দ্ৰ ভূঞা আৰু মাজুলী সমিতিৰ সভাপতি জগত হাজৰিকাই।
মুখ্য মন্ত্ৰী গৰাকীয়ে আজি মাজুলীত উপস্থিত হৈ অহা ২১ জানুৱাৰিত মাজুলীৰ তিনিটা সমষ্টিত হ’ব লগা মিচিং স্বায়ত্তশাসিত পৰিষদৰ নিৰ্বাচন সম্পৰ্কত দলীয় নেতা-কৰ্মীৰে আলোচনাত মিলিত হোৱাৰ কথা।