বিদেশী খেদাৰ প্ৰসংগ উল্লেখ কৰি দেশৰ গৃহমন্ত্ৰী অমিত শ্বাহ আৰু বিজেপিৰ বিৰুদ্ধে তীব্ৰ সমালোচনা ৰাইজৰ দলৰ সভাপতি তথা বিধায়ক অখিল গগৈৰ। সোমবাৰে অমিত শ্বাহে অসমৰ পৰা বিদেশী অনুপ্ৰৱেশকাৰীক খেদিবলৈ বিজেপিক আৰু পাঁচ বছৰ সময় দিয়াৰ আহ্বান জনোৱাৰ পিছতে মঙলবাৰে কাজিৰঙাত আয়োজিত এখন সংবাদমেলত গগৈয়ে বিজেপি চৰকাৰৰ বিদেশী খেদাৰ দাবীক লৈ এই দৰে কটাক্ষ কৰে বিধায়ক গৰাকীয়ে।
কাজিৰঙাৰ দুৰ্গাপুৰস্থিত অৰ্কিড উদ্যানত আয়োজিত সংবাদমেলত অখিল গগৈয়ে কয়, “২০১৬ চনত বিজেপিয়ে চৰকাৰ গঠন কৰাৰ সময়ত আটাইতকৈ ডাঙৰ প্ৰতিশ্ৰুতি আছিল বিদেশীমুক্ত অসম। বিদেশীমুক্ত, বানপানীমুক্ত আৰু দুৰ্নীতিমুক্ত অসম গঢ়াৰ কথা বিজেপিয়ে বাৰে বাৰে কৈ আহিছে। নৰেন্দ্ৰ মোদীয়ে দেশত তিনিটা কাৰ্যকাল আৰু অসমত বিজেপিয়ে দুটা কাৰ্যকাল চলোৱাৰ পাছতো এতিয়াও বিজেপিয়ে একেটা কথাই পুনৰাবৃত্তি কৰি আছে—আৰু পাঁচ বছৰ সময় দিয়ক।”
সংবাদমেলতে গগৈয়ে অসম বিধানসভাত উত্থাপন কৰা প্ৰশ্নৰ উত্তৰৰ তথ্য দাঙি ধৰি কয় যে বিজেপিৰ প্ৰথমটো কাৰ্যকালত (২০১৬–২০২০) বিদেশী ন্যায়াধিকৰণৰ জৰিয়তে মুঠ ৭৬,০২৪ জন বিদেশী চিনাক্ত কৰা হৈছিল যদিও বহিস্কাৰ কৰা হৈছিল মাত্ৰ ২৬০ জনক। তেওঁ প্ৰশ্ন তোলে, “এই হাৰত যদি বিদেশী খেদিবলৈ হয়, তেন্তে মুখ্যমন্ত্ৰীয়ে কোৱা ৪০ লাখ বিদেশীক খেদিবলৈ বিজেপিক কিমান বছৰ সময় দিব লাগিব? সেইকাৰণেই মই কৈছোঁ—৪০ লাখ বিদেশী খেদিবলৈ বিজেপিক অসমখন ঠিকাত দি দিব লাগিব।”
গগৈয়ে লগতে উল্লেখ কৰে যে বিজেপিৰ দ্বিতীয়টো কাৰ্যকালত (২০২১ৰ পৰা ২০২৫ চনৰ অক্টোবৰলৈ) মুঠ ২৮,৭২৪ জন বিদেশী চিনাক্ত কৰাৰ বিপৰীতে বহিস্কাৰ কৰা হৈছে ১,৪১৬ জনক। দুয়োটা কাৰ্যকাল মিলাই বিজেপিৰ ১০ বছৰীয়া শাসনত মুঠ ১,০৪,৭৪৮ জন বিদেশী চিনাক্তকৰণৰ বিপৰীতে বহিস্কাৰ কৰা হৈছে মাত্ৰ ১,৬৭৬ জনক।
ইয়াৰ বিপৰীতে, ২০০১ চনৰ পৰা ২০১৫ চনলৈ তৰুণ গগৈ চৰকাৰৰ সময়ত ৩৭,৩১১ জন বিদেশী চিনাক্তকৰণ আৰু ২,৭১৯ জন বহিস্কাৰ কৰা হৈছিল বুলি তেওঁ উল্লেখ কৰে।
নাগৰিকত্ব সংশোধনী আইন (CAA)ৰ প্ৰসংগ উত্থাপন কৰি গগৈয়ে কয় যে বিজেপিয়ে এফালে বিদেশী খেদাৰ কথা কৈ আনফালে ধৰ্মৰ ভিত্তিত বিদেশীক নাগৰিকত্ব দিয়াৰ ব্যৱস্থা কৰিছে। “বিজেপি এটা সম্পূৰ্ণ উল্টা দল। নিৰ্বাচনৰ আগত বিদেশী খেদাৰ কথা কয়, নিৰ্বাচনৰ পাছত বিদেশীক নাগৰিকত্ব দিয়াৰ ব্যৱস্থা কৰে,” বুলিও তেওঁ মন্তব্য কৰে।
শেষত গগৈয়ে কয় যে অসমত বিদেশী সমস্যা সমাধান নোহোৱাৰ বাবে বিজেপি চৰকাৰ দায়ী আৰু ২০২৬ চনত এই চৰকাৰক বিদায় দিয়াটো অসমবাসীৰ বাবে জৰুৰী।
