অহা ২০২৬ চনৰ অসম বিধানসভা নিৰ্বাচনৰ পূৰ্বে বিৰোধী মিত্ৰজোঁটত আসন ভাগ-বাটোৱাৰাক লৈ তীব্ৰ মতানৈক্যৰ সৃষ্টি হৈছে। কংগ্ৰেছ দলৰ বিৰুদ্ধে প্ৰতাৰণা আৰু একপক্ষীয় সিদ্ধান্ত গ্ৰহণৰ অভিযোগ উত্থাপন কৰাৰ পাছতো ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে প্ৰদেশ কংগ্ৰেছৰ সভাপতি গৌৰৱ গগৈলৈ চৰ্তসাপেক্ষ সমৰ্থন আগবঢ়াইছে। বিজেপি চৰকাৰৰ বিৰুদ্ধে বিৰোধীৰ ভোট বিভাজন ৰোধ কৰাৰ স্বাৰ্থতেই তেওঁ এই পদক্ষেপ গ্ৰহণ কৰিছে বুলি স্পষ্ট কৰি দিছে।
জানিব পৰা মতে, নিৰ্বাচনৰ পূৰ্বে ৰাইজৰ দলে মিত্ৰজোঁটৰ পৰা ১৫ খন আসনৰ দাবী উত্থাপন কৰিছিল যদিও কংগ্ৰেছে মাত্ৰ ৪ খন আসন দিবলৈহে সন্মতি প্ৰকাশ কৰে। ইয়াৰ ফলতেই দুয়োটা দলৰ মাজত সংঘাতৰ সূত্ৰপাত হয়। বিশেষকৈ ধিং সমষ্টিকে ধৰি কেইবাখনো গুৰুত্বপূৰ্ণ আসন ৰাইজৰ দলক এৰি দিবলৈ গৌৰৱ গগৈ আৰু সাংসদ ৰকিবুল হুছেইনে অস্বীকাৰ কৰা বুলি অখিল গগৈয়ে অভিযোগ কৰিছে। তেওঁ কংগ্ৰেছৰ এই স্থিতিক ‘অহংকাৰী‘ আখ্যা দি দলে একপক্ষীয়ভাৱে প্ৰাৰ্থী বাছনি কৰা বুলিও ক্ষোভ প্ৰকাশ কৰে।
কংগ্ৰেছৰ কাৰ্যকলাপক কঠোৰ ভাষাৰে সমালোচনা কৰি গগৈয়ে কয় যে মিত্ৰজোঁটৰ নীতি-নিয়ম উলংঘা কৰি কংগ্ৰেছ নেতৃত্বই তেওঁলোকৰ সৈতে বিশ্বাসঘাটকতা কৰিছে। তথাপিও, সামগ্ৰিক ৰাজনৈতিক পৰিস্থিতিৰ প্ৰতি লক্ষ্য ৰাখি তেওঁ মিত্ৰজোঁট ত্যাগ কৰাৰ পৰিৱৰ্তে চৰ্তসাপেক্ষ সমৰ্থনৰ পথ বাছি লৈছে। অখিল গগৈৰ মতে, তেওঁলোকৰ মূল যুঁজ হৈছে বিজেপি আৰু আৰ এছ এছৰ বিৰুদ্ধে। বিৰোধী শিবিৰৰ মাজত বিভাজনে কেৱল শাসকীয় দলটোকহে লাভান্বিত কৰিব বুলি উল্লেখ কৰি তেওঁ কয় যে অসমৰ ৰাইজৰ স্বাৰ্থত তেওঁলোকে যিকোনো ত্যাগ স্বীকাৰ কৰিবলৈ প্ৰস্তুত।
অৱশ্যে, এই সমৰ্থনৰ বিনিময়ত ৰাইজৰ দলে কংগ্ৰেছৰ সন্মুখত স্পষ্ট চৰ্ত আৰোপ কৰিছে। গগৈয়ে দাবী জনায় যে কংগ্ৰেছে নিজৰ একনায়কত্ববাদী মনোভাৱ পৰিত্যাগ কৰি আসন ভাগ-বাটোৱাৰাৰ বিষয়টো পুনৰ বিবেচনা কৰিব লাগিব আৰু মিত্ৰদলসমূহক উচিত মৰ্যাদা প্ৰদান কৰিব লাগিব। নিৰ্বাচনলৈ মাজত মাত্ৰ কেইটামান দিন বাকী থকা অৱস্থাত, বিৰোধী শিবিৰৰ এই অভ্যন্তৰীণ সংঘাতে আগন্তুক বিধানসভা নিৰ্বাচনত কংগ্ৰেছ নেতৃত্বাধীন মিত্ৰজোঁটৰ প্ৰদৰ্শনত কেনে প্ৰভাৱ পেলায়, সেয়া সময়তহে লক্ষণীয় হ‘ব।
