নাগৰিকত্ব সংশোধন আইন বিৰোধী আন্দোলনৰ সময়ৰে পৰা কাৰাৰুদ্ধ হৈ থকা কৃষক নেতা অখিল গগৈয়ে তিনিটাকৈ গোচৰত জামিন লাভ কৰিছে।
গগৈৰ বিৰুদ্ধে চাবুৱা থানাত ৰুজু হোৱা ক্ৰমে ২৯৩/২০১৯, ২৯৬/২০১৯ আৰু ৩০৭/২০১৯ নম্বৰ গোচৰত গুৱাহাটী উচ্চ ন্যায়ালয়ে আজি জামিন মঞ্জুৰ কৰিছে।
নৰ্থ ইষ্ট নাওৰ সাংবাদিকৰ আগত এই কথা জনায় অখিল গগৈৰ অধিবক্তা কৃষ্ণ গগৈয়ে।
ইয়াৰোপৰি, গগৈৰ বিৰুদ্ধে যদি নতুনকৈ কোনোধৰণৰ গোচৰ ৰাজ্যৰ বিভিন্ন থানাত ৰুজু নকৰে তেন্তে আৰু দুটা গোচৰত জামিন লাভ কৰিলেই মুকলি আকাশৰ তললৈ আহিব পাৰিব কৃষক নেতা গৰাকী।
ৰাষ্ট্ৰীয় তদন্তকাৰী সংস্থাৰ দুটা গোচৰ ক্ৰমে ১৩/১৯ আৰু চাবুৱা থানাৰ ১/২০ নম্বৰ গোচৰত বৰ্তমান অভিযুক্ত হৈ আছে অখিল গগৈ।
২০ জুলাই দিনা এটা গোচৰ দুটাৰ শুনানি অনুষ্ঠিত হ’ব বুলি গগৈৰ অধিবক্তাই জনায়।
উল্লেখযোগ্য যে, গুৱাহাটীৰ কেন্দ্ৰীয় কাৰাগাৰত কাৰাৰুদ্ধ হৈ থকা সময়তে কৃষক নেতা অখিল গগৈকে ধৰি তেওঁৰ সতীৰ্থ সকল ক’ৰ’নাত আক্ৰান্ত হয়।
অখিল গগৈক পৰৱৰ্তী সময়ত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পাতাললৈ লৈ অহা হয়।
