পানবজাৰস্থিত অপৰাধ শাখাৰ এক গোচৰৰ পৰা জামিন লাভ কৰিছে কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে।
আজি গুৱাহাটী উচ্চ ন্যায়ালয়ৰ মুখ্য ন্যায়াধীশৰ আদালতে পানবজাৰ থানাত অপৰাধ শাখাৰ (০০০১/২০২০) অধীনত ৰুজু হৈ থকা এক গোচৰৰ পৰা অখিল গগৈৰ জামিন মঞ্জুৰ কৰে। অখিল গগৈৰ অধিবক্তা কষ্ণ গগৈয়ে নৰ্থ-ইষ্ট নাওৰ সাংবাদিকক এই কথা জনায়।
অৱশ্যে একেটা গোচৰত অভিযুক্ত হৈ থকা কৃষক মুক্তিৰ সাধাৰণ সম্পাদক ধৈৰ্য্য কোঁৱৰ, ছাত্ৰ মুক্তিৰ কাৰ্য্যকৰী সভাপতি মানস কোঁৱৰ আৰু সভাপতি বিতু সোণোৱালে এই পৰ্যন্ত জামিন লাভ কৰা নাই।
অখিল গগৈৰ হৈ উচ্চ ন্যায়ালয়ৰ জ্যেষ্ঠ অধিবক্তা শান্তনু বৰঠাকুৰ আৰু পল্লবী বৰাই আদালতৰ মজিয়াত যুক্তি প্ৰদৰ্শন কৰিছিল।
উল্লেখযোগ্য যে, ‘কা’ বিৰোধী আন্দোলনত হিংসাত্মক ঘটনাত জড়িত থকাৰ অভিযোগত ১৫ফেব্ৰুৱাৰীত গুৱাহাটী কেন্দ্ৰীয় কাৰাগাৰৰ পৰা পানবজাৰ থানাৰ ক্ৰাইম ব্ৰাঞ্চে অখিল গগৈক গ্ৰেপ্তাৰ কৰি কামৰূপ মহানগৰ জিলা মুখ্য ন্যায়িক দণ্ডাধীশৰ আদালতত হাজিৰ কৰিছিল আৰু আদালতে তেওঁক পুনৰ ন্যায়িক জিম্মালৈ প্ৰেৰণ কৰিছিল।
অৱশ্যে আজি এই গোচৰত জামিন লাভ কৰে যদিও অখিল গগৈ মুকলি আকাশৰ তলতলৈ ওলাই অহাৰ পথ এতিয়াও প্ৰশস্ত হোৱা নাই। গগৈ বৰ্তমান শিৱসাগৰ জিলা কাৰাগাৰত কাৰাৰুদ্ধ হৈ আছে। যোৱা ১৯ মাৰ্চৰ দিনা গুৱাহাটী কেন্দ্ৰীয় কাৰাগাৰৰ পৰা শিৱসাগৰ সদৰ আৰক্ষীয়ে তেওঁক গ্ৰেপ্তাৰ কৰি চাৰিদিন নিজৰ জিম্মাত ৰাখিছিল। তাৰ পাছত শিৱসাগৰ জিলা দণ্ডাধীশ আদালতে কৃষক নেতাগৰাকীৰ অধিবক্তাই আদালতত দাখিল কৰা জামিন আবেদন খাৰিজ কৰি ১৪ দিনৰ ন্যায়িক জিম্মালৈ প্ৰেৰণ কৰে।
এক সূত্ৰৰ পৰা জানিব পৰা মতে শিৱসাগৰ থানাৰ গোচৰৰ পৰা মুক্ত হ’লেই কৃষক নেতাগৰাকীক গৌৰীসাগৰ থানাই অন্য এক গোচৰত গ্ৰেপ্তাৰ কৰাৰ পূৰ্ণ সম্ভাৱনা আছে। ইপিনে, চাবুৱা আৰক্ষী থানাতো কৃষক নেতাগৰাকীৰ বিৰুদ্ধে কেইবাটাও ধাৰাত গোচৰ ৰুজু হৈ আছে। সেয়েহে বৰ্তমানো কৃষক নেতাগৰাকীৰ কাৰাগাৰৰ পৰা মুকলি আকাশৰ তললৈ অহাৰ সম্ভাৱনা বৰ্তমান নাই।