‘জুবিন হত্যা’ গোচৰৰ মূল অভিযুক্ত শ্যামকানু মহন্তৰ ৰঙালী উৎসৱত উদাত্ত ভাষণ দি প্ৰশংসা কৰাৰ বাবে সদৌ অসম ছাত্ৰ সংস্থা (আছু)ৰ সভাপতি উৎপল শৰ্মাক লক্ষ্য কৰি ৰাইজৰ দলৰ বিধায়ক তথা সভাপতি অখিল গগৈয়ে এখন মুকলি চিঠি লিখিছে। এই চিঠিত অখিল গগৈয়ে উৎপল শৰ্মাক “মৰমৰ উৎপল, মৰম ল’বা” বুলি সম্বোধন কৰি তেওঁৰ ভাষণক সমালোচনা কৰিছ আছুৰ মতাদৰ্শগত সীমাবদ্ধতাৰ ওপৰত প্ৰশ্ন উত্থাপন কৰিছে। চিঠিখন সামাজিক মাধ্যমত ভাইৰেল হৈ পৰিছে আৰু ৰাজনৈতিক মহলত চৰ্চাৰ সৃষ্টি কৰিছে।
উৎপল শৰ্মাই ৰঙালী উৎসৱৰ মঞ্চত শ্যামকানু মহন্তক প্ৰশংসা কৰি দিয়া ভাষণৰ ভিডিঅ’টো সামাজিক মাধ্যমত বিয়পি পৰাৰ পিছত বিতৰ্কৰ সৃষ্টি হৈছে। যদিও উৎপলে ভিডিঅ’টো ডিলিট কৰিছে, অখিল গগৈয়ে ইয়াক আপলোড কৰি চিঠিত উল্লেখ কৰিছে যে উৎপলে শ্যামকানুক “সুপাৰলেটিভ ডিগ্ৰী”ত প্ৰশংসা কৰিছে। চিঠিত অখিলে লিখিছে, “তুমি ৰঙালীক অসমৰ সামাজিক-সাংস্কৃতিক জগতৰ এক আন্দোলনৰ নাম বুলি ঘোষণা কৰিছা। তোমাৰ মতে ৰঙালী কোনো ধুমুহাতে উভালি নপৰে! ছাত্ৰ সংস্থা সদায়ে শ্যামকানু মহন্তৰ লগত থাকিব, সফলতাৰ আকাশ চুমিবলৈ!! কথাখিনি এতিয়া শুনিলে ছাগে উৎপল তোমাৰো অস্বস্তি অনুভৱ হয়, নহয়নে?”
অখিল গগৈয়ে চিঠিত উৎপল শৰ্মাৰ মতাদৰ্শগত অভাৱক সমালোচনা কৰি কয় যে শুদ্ধ মতাদৰ্শৰ অভাৱত আছুৱে অসমক লাভান্বিত কৰিব নোৱাৰে। “মানুহক সদায়ে শুদ্ধ মতাদৰ্শ লাগে। শুদ্ধ মতাদৰ্শ সদায়ে প্ৰগতিশীল। প্ৰগতিশীল মতাদৰ্শই আমাৰ মাজত যুক্তিপূৰ্ণ, সমালোচনাত্মক চিন্তাৰ জন্ম দিয়ে,” বুলি তেওঁ উল্লেখ কৰিছে। লগতে আছুৰ মতাদৰ্শগত সীমাবদ্ধতাৰ বাবে আন্দোলনসমূহত অসমৰ সংহতি আৰু সমন্বয়ত বিপদ আহিছে বুলি অভিযোগ কৰিছে।
জুবিন গাৰ্গৰ ৰাজনৈতিক আদৰ্শক উল্লেখ কৰি অখিলে কৈছে যে জুবিন স্বঘোষিত সমাজবাদী আছিল আৰু অসমৰ আধুনিক কাণ্ডাৰীসকল যেনে জ্যোতিপ্ৰসাদ আগৰৱালা, বিষ্ণুপ্ৰসাদ ৰাভা, ভূপেন হাজৰিকা সকলো প্ৰগতিশীল মতাদৰ্শৰ আছিল। “চোৱা উৎপল, আমাৰ আধুনিক অসমৰ আটাইকেইজন কাণ্ডাৰী… সকলো প্ৰগতিশীল মতাদৰ্শৰ আছিল। আনকি আমাৰ জুবিনদা স্বঘোষিত সমাজবাদী আদৰ্শৰ। সেইবাবে অসমীয়া জাতিৰ জাতীয় মতাদৰ্শ প্ৰগতিশীল হ’ব লাগে,” বুলি তেওঁ লিখিছে। লগতে শ্যামকানুৰ দৰে ব্যক্তিৰ পৰা জাতিৰ বিপদ হ’ব পাৰে বুলি সকীয়াই দিছে।
উৎপল শৰ্মাৰ দক্ষতাক প্ৰশংসা কৰি অখিলে কৈছে, “তোমাৰ বুদ্ধিমত্তা আছে, কিছু পঢ়া-শুনাও আছে যেন লাগে, তুমি ধুনীয়া ভাষণ দিয়া, কিন্তু সঠিক মতাদৰ্শ, সঠিক দৃষ্টিভংগী নাই।”
আছুৰ উপদেষ্টা সমুজ্জ্বল ভট্টাচাৰ্যকো সমালোচনা কৰি অখিল গগৈয়ে কয় যে তেওঁ অসমৰ বাবে বহুত কৰিছে যদিও মতাদৰ্শগত অভাৱত সমাজে স্থায়ী লাভ নাপায়। “সমুজ্জ্বলদাৰ ক্ষেত্ৰতো একেই কথা। আমাৰ সময়ৰ সবাতোকৈ ডাঙৰ জাতীয়তাবাদী নেতা তেওঁ… কিন্তু শেষত ফলাফল নাই। স্থায়ী একো নাপায় সমাজে তেওঁৰ পৰা। বৰং আছুক অধিক প্ৰতিষ্ঠানৰ লগত যুক্ত কৰা বাবে তেওঁ ইতিহাসৰ ওচৰত জগৰীয়া হৈ ৰৈ ৰব” বুলি মত পোষণ কৰিছে।
‘কা’ আন্দোলনত আছুৰ ব্যৰ্থতাক উল্লেখ কৰি অখিলে কৈছে যে ২০১৯ৰ আন্দোলনত জাগ্ৰত সমাজক নেতৃত্ব দিবলৈ আছু ব্যৰ্থ হৈছে। “অসম চুক্তিখনক তুমি শ্ৰেণী বিশ্লেষণ কৰি চালে দেখা পাবা, কেনেকৈ ই আমাৰ জনগণৰ প্ৰধান সমস্যাবোৰ তুলি ধৰাত ব্যৰ্থ হৈছে,” বুলি তেওঁ লিখিছে।
চিঠিৰ শেষত অখিল গগৈয়ে উৎপল শৰ্মাক ব্যক্তিগতভাৱে কথাবোৰ নল’বলৈ আহ্বান জনাই কৈছে যে জীৱনৰ আটাইতকৈ ডাঙৰ বস্তু হৈছে শুদ্ধ মতাদৰ্শ। উৎপল শৰ্মাই এই চিঠিৰ প্ৰত্যুত্তৰ দিব নে নিদিয়ে, সেয়া লক্ষণীয় হ’ব।
