নাগৰিকত্ব সংশোধন আইন বিৰোধী আন্দোলনৰ সময়ৰে পৰা কাৰাৰুদ্ধ হৈ থকা কৃষক নেতা অখিল গগৈৰ জামিন আবেদন পুনৰ এবাৰ নাকচ কৰা হৈছে।
আজি চানমাৰিস্থিত নিয়াৰ আদালতে কৃষক নেতা গৰাকীৰ জামিন নাকচ কৰে। এই কথা জনাই অখিল গগৈৰ অধিবক্তা কৃষ্ণ গগৈয়ে।
তদুপৰি পৰৱৰ্তী সময়ত উচ্চ ন্যায়ালয়ত আবেদন জনাব অখিলৰ অধিবক্তাই।
ক’ৰ’না পজিটিভ চিনাক্ত হোৱাৰ পাছৰে পৰা জি এম চি এইচত ভৰ্তি হৈ আছে অখিল গগৈ।
বিগত বৰ্ষৰ ১৭ ডিচেম্বৰৰ পৰাই কৃষক নেতা গৰাকী কাৰাবন্দী হৈ আছে।
ইতিমধ্যে একেটা গোচৰতে ইতিমধ্যে তেওঁৰ তিনি সতীৰ্থ ক্ৰমে কৃষক মুক্তি সাধাৰণ সম্পাদক ধৈৰ্য কোঁৱৰ, ছাত্ৰ মুক্তিৰ সভাপতি বিতু সোণোৱাল আৰু কাৰ্যকৰী সভাপতি মানস কোঁৱৰে জামিন লাভ কৰিছে।
উল্লেখযোগ্য যে, ক’ৰ’নাৰ সংক্ৰমণ অব্যাহত থকাৰ সময়তেই পুনৰ ৰাজ্যত আৰম্ভ হৈছে অখিল গগৈৰ মুক্তিৰ দাবীৰ লগতে ‘কা’ বিৰোধী আন্দোলন।
আজি পুনৰ এবাৰ নিয়াৰ আদালতে অখিলৰ জামিন আবেদন নাকচ কৰাত সমগ্ৰ ৰাজ্যজুৰি আন্দোলন অধিক তীব্ৰতৰ হৈ উঠাৰ সম্ভাৱনাই দেখা দিছে।