‘প্ৰধানমন্ত্ৰী আৰু মুখ্যমন্ত্ৰীৰ যদি সঁচাকৈয়ে জনগোষ্ঠীৰ জনজাতিকৰণৰ সমস্যা সমাধান আৰু পৃথক কমতাপুৰ ৰাজ্য গঠনৰ কৰাৰ সদ্দিচ্ছা আছে তেন্তে অতিশীঘ্ৰে সেয়া কৰিব লাগে ৷ আঁভুৱাভাঁৰা মন্তব্য শুনিবলৈ আৰু মন নাই ‘৷ এই মন্তব্য কৰিছে সদৌ কোচ ৰাজবংশী ছাত্ৰ সন্থাৰ নেতৃত্বই ৷
সংগঠনটোৰ বঙাইগাঁও চহৰৰ বৰপাৰাস্থিত মুখ্য কাৰ্যালয়ত আয়োজিত এখন সংবাদ মেলত কোচ ৰাজবংশী জনগোষ্ঠীৰ জনজাতিকৰণ আৰু পৃথক কমতাপুৰ ৰাজ্য পুনৰ গঠনৰ ক্ষেত্ৰত কেন্দ্ৰীয় আৰু ৰাজ্য চৰকাৰৰ ভূমিকাত ক্ষোভ উজাৰি আক্ৰাছুৰ সভাপতি ক্ষীতিশ বৰ্মন আৰু যুটীয়া সাধাৰণ সম্পাদক কপিলদেৱ সিংহই এনেদৰে মন্তব্য কৰে ৷
সংগঠনটোৰ সভাপতি আৰু যুটীয়া সাধাৰণ সম্পাদকগৰাকীয়ে ক্ষোভ প্ৰকাশ কৰি কয় যে চৰকাৰে যদিহে জনগোষ্ঠীটোৰ সমস্যা সমাধানৰ বাবে অতিশীঘ্ৰে কোনো পদক্ষেপ গ্ৰহণ নকৰে, তেতিয়াহলে কোচ ৰাজবংশী ছাত্ৰ সন্থা আৰু জনগোষ্ঠীটোৰ ৰাইজে কেতিয়াও হাত সাৱতি বহি নাথাকে সংগঠনটোৱে জনজাতিকৰণ সন্দৰ্ভত অসম চৰকাৰৰ হোঁহকা পিছলা নীতিক তীব্ৰ সমালোচনা কৰি এলানি আন্দোলনৰ কাৰ্যসূচীও ঘোষণা কৰে ৷
উল্লেখ্য যে শুকুৰবাৰেও আক্ৰাছুৰ এখন কাৰ্যনিৰ্বাহক সভা অনুষ্ঠিত হৈছিল আৰু সেই সভাত সংগঠনটোৱে সাংগঠনিক দিশৰ লগতে জনজাতিকৰণ সন্দৰ্ভত চৰকাৰৰ শেহতীয়া ভূমিকাক সমালোচনা কৰি এলানি আন্দোলনৰ কাৰ্যসূচী গ্ৰহণ কৰে৷
সেই অনুসৰি অসম চৰকাৰৰ বাজেট অধিৱেশনৰ প্ৰথম দিনটোতে দিছপুৰ লাষ্ট গেটতত তিনি ঘণ্টীয়া অনশন কাৰ্যসূচী ৰূপায়ণ কৰাৰ লগতে তাৰ পৰৱৰ্তী সপ্তাহত প্ৰতিখন জিলাত প্ৰতিবাদী পদযাত্ৰা কৰি জিলা উপায়ুক্তৰ জৰিয়তে দেশৰ প্ৰধানমন্ত্ৰী আৰু মুখ্যমন্ত্ৰীক স্মাৰক পত্ৰ প্ৰদান কৰিব ৷
সেইদৰে সংসদৰ গ্ৰীষ্মকালীন অধিৱেশনৰ সময়ত দিল্লীৰ মন্তৰ – মন্তৰত অনশন কাৰ্যসূচী গ্ৰহণ কৰিব বুলিও কয় ৷
ইয়াৰ পিচতো যদি চৰকাৰে আমাৰ দাবী মানি নলয়, তেতিয়াহলে আমি কোচ ৰাজবংশী ছাত্ৰ সন্থাই কিন্তু জংগী আন্দোলন গঢ়ি তুলিম ৷ এই জংগী আন্দোলনত অসম আৰু পশ্চিম বংগ জ্বলিব পাৰে বুলি সংগঠনটোৱে সকিয়াই দিয়ে।
সংবাদ মেলত আক্ৰাছুৰ উপদেষ্টা শিৱানন বৰ্মনকে ধৰি কেইবাগৰাকীও নেতা উপস্থিত আছিল ৷