আয়ুৰ্বেদিক কাৰণত প্ৰতিদিনে গোমূত্ৰ গ্ৰহণ কৰে বলিউদৰ জনপ্ৰিয় অভিনেতা অক্ষয় কুমাৰে
মেন ভাৰ্ছেছ ৱাইল্ডৰ জৰিয়তে বিশ্বজুৰি জনপ্ৰিয়হোৱা বীয়েৰ গ্ৰিলছ আৰু হুমা কুৰেশ্বিৰ সৈতে হোৱা এক লাইভ ইষ্টাগ্ৰাম সাক্ষাৎকাৰত বলিউদৰ জনপ্ৰিয় অভিনেতা অক্ষয় কুমাৰে তেওঁ প্ৰতিদিনে গোমূত্ৰ গ্ৰহণ কৰে বুলি মত প্ৰকাশ কৰে।
অভিনেতা গৰাকীয়ে তেওঁ আয়ুৰ্বেদিক কাৰণতে প্ৰতিদিনে গোমূত্ৰ গ্ৰহণ কৰে বুলিও লগতে কয়।
‘ইনটু দ্যা ৱাইল্ড’ত গ্ৰিলছে কেনেদৰে অক্ষয় কুমাৰক হাতীৰ বিষ্ঠাৰ চাহ খাবলৈ সন্মত কৰালে বুলি হুমা কুৰেশ্বিয়ে সোধা এক প্ৰশ্নৰ উত্তৰত অক্ষয় কুমাৰে তেওঁ হাতীৰ বিষ্ঠাৰ চাহ গ্ৰহণ কৰিবলৈ আগ্ৰহী হৈ আছিল বুলি জনায় আৰু তেওঁ প্ৰতিদিনে গোমূত্ৰ গ্ৰহণ কৰে বুলি কয়।
গোমূত্ৰক লৈ দেশত বিভিন্ন ধৰণৰ চৰ্চা অব্যাহত থকাৰ সময়তে বলিউদৰ জনপ্ৰিয় অভিনেতা গৰাকীয়ে প্ৰতিদিনে গোমূত্ৰক আয়ুৰ্বেদিক কাৰণত গ্ৰহণ কৰা বুলি কৰা মন্তব্যই অনাগত দিনত কেনেধৰণৰ প্ৰতিক্ৰিয়াৰ সৃষ্টি কৰিব সেয়া সময়েহে ক’ব।
উল্লেখযোগ্য যে, অক্ষয় কুমাৰে অলপতে বীয়েৰ গ্ৰিলছৰ সৈতে ‘ইনটু দ্যা ৱাইল্ড’ত একেলগে ভূমুকি মাৰিছিল।
অক্ষয় কুমাৰৰ পূৰ্বে ভাৰতৰ প্ৰধান মন্ত্ৰী নৰেন্দ্ৰ মোদীয়ো বীয়েৰ গ্ৰিলছৰ সৈতে উত্তৰাখণ্ডৰ জিম কৰবেট অভয়াৰণ্যত এক অনুষ্ঠানৰ দৃশ্যগ্ৰহণ কৰিছিল।