অসমৰ লোক-সংগীত জগতৰ সম্ৰাজ্ঞী, পদ্মশ্ৰী প্ৰতিমা পাণ্ডে বৰুৱাৰ মৃত্যু বাৰ্ষিকীৰ দিনা ভাৰতীয় জনতা পাৰ্টীত যোগদান কৰি গেৰুৱা সাজ পিন্ধিলে কন্যা অলকা পাণ্ডেই।
দেওবাৰে বিয়লি ভাগত হেঙেৰাবাৰীস্থিত ৰাজ্যিক বিজেপিৰ কাৰ্য্যালয়ত আনুষ্ঠানিকভাৱে বিজেপিত যোগদান কৰে অলকা পাণ্ডেই।
বিজেপিত যোগদান কৰিয়েই দলটোৰ প্ৰশংসাত পঞ্চমুখ হৈ পৰে অলকা পাণ্ডেই।
বিজেপিত যোগদান কৰি পাণ্ডেই সংবাদ মাধ্যমৰ আগত কয়, ‘জাতি, ধৰ্ম, বৰ্ণ নিৰ্বিশেষে সকলোকে সুৰক্ষা দিয়াৰ একমাত্ৰ পথ বা উপায় হৈছে বিজেপি।‘
ইপিনে, ভাৰতীয় জনতা পাৰ্টীত শিল্পীসকলে যোগ্য সন্মান লাভ কৰে বুলি দাবী কৰি অলকাই লগতে কয়, ‘প্ৰতিগৰাকী শিল্পীৰ বাবে বিজেপিত এখন উপযুক্ত মঞ্চ তথা সন্মান আছে।‘
আজি সেই সন্মান লাভ কৰি গৌৰাৱান্বিত। এগৰাকী শিল্পী হিচাপে অসম তথা ভাৰতবৰ্ষৰ ৰাইজৰ কাৰণে কাম কৰি যাবলৈ বিজেপিয়ে একমাত্ৰ বিকল্প বুলি দাবী কৰে অলকা পাণ্ডেই।
ৰাজ্যিক বিজেপিৰ সভাপতি ৰঞ্জিত দাসে বিজেপিৰ টুপী আৰু মাৰ্ফলাৰৰ সৈতে অলকা পাণ্ডেক দলৰ মজিয়ালৈ অলকা পাণ্ডেক আদৰণি জনায়।
দাসৰ লগতে উক্ত যোগদান কাৰ্য্যসূচীত বিজেপিৰ ৰাজ্যিক সাংগঠনিক সাধাৰণ সম্পাদক ফনীন্দ্ৰ নাথ শৰ্মা আৰু সম্পাদক কৃষ্ণ চুতীয়াও উপস্থিত থাকে।
