ষ্টেট বেংক অৱ ইণ্ডিয়া (এছ বি আই)-ৰ ৩,৮৯৭ গৰাকী গ্ৰাহকৰ ব্যক্তিগত তথ্য ফাদিল হোৱা ঘটনাক লৈ উদ্বেগৰ সৃষ্টি হৈছে। এই ঘটনাত প্ৰভাৱিত গ্ৰাহকসকলক বেংক কৰ্তৃপক্ষই পৃথকে পৃথকে ই-মেইল আৰু হোৱাটছএপযোগে সতৰ্ক কৰিছে। সামাজিক মাধ্যম এক্সত প্ৰকাশ কৰা এটা পোষ্টযোগে বেংকটোৱে এই কথা সদৰী কৰিছে।
বেংক কৰ্তৃপক্ষৰ মতে, ছাইবাৰ আক্ৰমণৰ সৈতে জড়িত তথ্য ফাদিলৰ ঘটনাত প্ৰভাৱিত গ্ৰাহকসকলক ইতিমধ্যে ব্যক্তিগতভাৱে অৱগত কৰা হৈছে। অৱশ্যে, গ্ৰাহকৰ বেংক একাউণ্টত জমা থকা ধন সুৰক্ষিত আছে বুলি দাবী কৰিছে এছ বি আয়ে। এই ঘটনাৰ ফলত গ্ৰাহকৰ জমা ধনৰ কোনো ক্ষতি হোৱা নাই বুলিও বেংকটোৱে স্পষ্ট কৰিছে।
ইফালে, অনলাইন বেংকিং ব্যৱহাৰৰ ক্ষেত্ৰত গ্ৰাহকসকলক সতৰ্কতা অৱলম্বন কৰিবলৈ পৰামৰ্শ দিছে বেংক কৰ্তৃপক্ষই। কোনো লোকৰ সৈতে অ’টিপি (OTP), পিন (PIN) বা পাছৱৰ্ড ভাগ-বতৰা নকৰিবলৈ আহ্বান জনোৱাৰ লগতে সন্দেহজনক ফোনকল, বাৰ্তা আৰু ই-মেইলৰ প্ৰতি সজাগ হৈ থাকিবলৈ পৰামৰ্শ দিয়া হৈছে।
এছ বি আয়ে প্ৰকাশ কৰা তথ্য অনুসৰি, এই ছাইবাৰ আক্ৰমণৰ ফলত মুঠ ৩,৮৯৭ গৰাকী গ্ৰাহকৰ ব্যক্তিগত তথ্য উন্মুক্ত হৈছিল। ফাদিল হোৱা তথ্যৰ ভিতৰত গ্ৰাহকৰ নাম, ই-মেইল ঠিকনা, ফোন নম্বৰ আৰু ঋণ-সম্পৰ্কীয় বিভিন্ন তথ্যও আছিল। ‘ছিৰিয়াছিম’ (Siriusim) নামৰ এটা হেকাৰ দলে এছ বি আইৰ ব্যৱস্থা হেক কৰাৰ দাবী কৰি এই তথ্যসমূহ ডাৰ্ক ৱেবত বিক্ৰীৰ বাবে আগবঢ়োৱাৰ কথা পোহৰলৈ আহিছিল। অৱশ্যে, এই আক্ৰমণৰ আঁৰত কোন জড়িত, সেই সন্দৰ্ভত বেংকটোৱে আনুষ্ঠানিকভাৱে কোনো তথ্য প্ৰকাশ কৰা নাই।
বেংকটোৱে জনোৱা মতে, যোৱা ১৬ অক্টোবৰত ডিফেন্স ছাইবাৰ এজেঞ্চী আৰু ভাৰতীয় কম্পিউটাৰ জৰুৰীকালীন সঁহাৰি দল (CERT-In)-ৰ পৰা লাভ কৰা ভাবুকি-সম্পৰ্কীয় তথ্যৰ ভিত্তিত সম্ভাৱ্য তথ্য ফাদিলৰ বিষয়ে প্ৰথমে সতৰ্ক হৈছিল এছ বি আই।
ইয়াৰ পিছতে প্ৰকাশ কৰা এক বিবৃতিত বেংকটোৱে দাবী কৰিছিল যে এই ঘটনাই ইয়াৰ তথ্য-প্ৰযুক্তি ব্যৱস্থা, মূল বেংকিং কাৰ্যকলাপ, আৰ্থিক প্ৰদৰ্শন অথবা ব্যৱসায়ৰ ধাৰাবাহিকতাত কোনো নেতিবাচক প্ৰভাৱ পেলোৱা নাই। গ্ৰাহকৰ ধন আৰু ব্যক্তিগত তথ্যৰ সুৰক্ষাৰ লগতে বেংকৰ প্ৰতি থকা বিশ্বাস অটুট ৰখাটো সদায় সৰ্বোচ্চ অগ্ৰাধিকাৰ বুলি উল্লেখ কৰিছিল কৰ্তৃপক্ষই।
আনহাতে, সমগ্ৰ ঘটনাটোৰ সন্দৰ্ভত বিতং তদন্ত অব্যাহত আছে। হেকাৰ দলটোৱে পূৰ্বে দাবী কৰিছিল যে তেওঁলোকৰ হাতত CSV বিন্যাসত প্ৰায় ৩.৭৫ লাখ শাৰীৰ তথ্য আৰু সংবেদনশীল ব্যক্তিগত তথ্য থকা ২,৭২২টা PDF ফাইলৰ প্ৰৱেশাধিকাৰ আছে। অৱশ্যে, হেকাৰ দলটোৰ এই দাবীৰ সত্যতা আৰু তথ্য ফাদিলৰ প্ৰকৃত পৰিসৰ তদন্তৰ পিছতহে স্পষ্ট হ’ব।
