কেন্দ্ৰীয় চৰকাৰে নতুনকৈ আৰম্ভ কৰা অগ্নিপথ আঁচনিৰ বিৰুদ্ধে দেশব্যাপী চলি থকা প্ৰতিবাদৰ মাজতে আজি ভাৰতৰ প্ৰতিৰক্ষা বিভাগৰ তিনিওটা শাখা ভাৰতীয় সেনা, নৌ সেনা আৰু বায়ু সেনাৰ মুৰব্বীসকলে প্ৰধানমন্ত্ৰী নৰেন্দ্ৰ মোদীক সাক্ষাৎ কৰিব বুলি জানিব পৰা গৈছে।
প্ৰকাশিত খবৰ অনুসৰি তিনিওজন সশস্ত্ৰ সেৱাৰ মুৰব্বীয়ে আজি পৃথকে প্ৰধানমন্ত্ৰী মোডীক সাক্ষাৎ কৰিব আৰু তেওঁৰ সৈতে অগ্নিপথ সম্পৰ্কে আলোচনা কৰিব। প্ৰতিৰক্ষা বাহিনীৰ মুৰব্বী কেইগৰাকীয়ে আঁচনিখনৰ ৰূপায়ণৰ বিভিন্ন দিশৰ বিষয়ে প্ৰধানমন্ত্ৰীক অৱগত কৰিব।
উল্লেখ্য যে সেনা প্ৰধান কেইগৰাকীৰ উপস্থিতিত প্ৰতিৰক্ষা মন্ত্ৰী ৰাজনাথ সিঙে ১৪ জুনত অগ্নিপথ আঁচনি মুকলি কৰিছিল। সিঙে অগ্নিপথথ আঁচনিক এক পৰিৱৰ্তনশীল পদক্ষেপ হিচাপে অভিহিত কৰি ইয়াৰ দ্বাৰা সশস্ত্ৰ বাহিনীক এক যুৱ প্ৰ’ফাইল প্ৰদান কৰিব বুলি ঘোষণা কৰিছিল।
কিন্তু অগ্নিপথ আঁচনিৰ ঘোষণাৰ পিছতে ইয়াৰ বিৰুদ্ধে প্ৰতিবাদত নামি পৰিছিল দেশৰ যুৱ প্ৰজন্ম। প্ৰতিৰক্ষা বিভাগত ঠিকাভিত্তিক নিযুক্তিৰ বিৰোধিতা কৰি সেনাত নিযুক্তি প্ৰত্যাশী যুৱক-যুৱতীসকলে দেশজুৰি ব্যাপক প্ৰতিবাদ গঢ়ি তুলিছে।
প্ৰতিবাদকাৰী যুৱক-যুৱতীসকলক পতিয়ন নিয়াবলৈ বিজেপি নেতৃত্বাধীন কেন্দ্ৰীয় চৰকাৰখনে প্ৰচেষ্টা অব্যাহত ৰাখিছে যদিও অগ্নিপথ বাতিলৰ দাবীত কোনো আপোচ দেখুওৱা নাই প্ৰতিবাদকাৰীসকলে।
ইফালে যুৱ প্ৰজন্মৰ এই যুক্তিশীল প্ৰতিবাদলৈ কাণসাৰ নকৰি ভাৰতীয় সেনাই সোমবাৰে অগ্নিপথৰ অধীনত প্ৰথম পৰ্যায়ৰ নিযুক্তি প্ৰক্ৰিয়া মুকলি কৰিছে। ইয়াৰ পূৰ্বে ভাৰতীয় বায়ু সেনাইও অগ্নিপথৰ অধীনত নিযুক্তিৰ জাননী জাৰি কৰিছিল।
