ঝাৰখণ্ডত এয়াৰ এম্বুলেন্স দুৰ্ঘটনাত বিমানখনত থকা ৭ জন লোকৰে মৃত্যু হৈছে। সোমবাৰে নিশা ৰাঁচীৰ পৰা দিল্লী অভিমুখে বিমানখন উৰা মৰাৰ কিছুসময়ৰ পিছতে আকাশৰ পৰা অদৃশ্য হৈ পৰে। পিছত তালাচীৰ সময়ত চতৰা অঞ্চলৰ এখন ঘন অৰণ্যৰ পৰা ইয়াৰ ধ্বংসাৱশেষ উদ্ধাৰ কৰা হয়। দুৰ্ঘটনাটোৰ কাৰণৰ তদন্ত অব্যাহত আছে।
আৰক্ষীয়ে মৃত লোককেইজনৰ পৰিচয় নিশ্চিত কৰিছে। তেওঁলোক হ’ল কেপ্তেইন বিবেক বিকাশ ভগত, কেপ্তেইন স্বৰাজদীপ সিং, সঞ্জয় কুমাৰ, ডাঃ বিকাশ কুমাৰ গুপ্তা, শচীন কুমাৰ মিশ্ৰ, অৰ্চনা দেৱী আৰু ধুৰু কুমাৰ।
জানিব পৰা মতে বিমানখনত থকা ৰোগীজন আছিল ৪১ বছৰীয়া সঞ্জয় কুমাৰ। এটা দুৰ্ঘটনাত তেওঁৰ শৰীৰৰ ৬৩ শতাংশ জ্বলি যায়। আই চি ইউত চিকিৎসাধীন হৈ আছিল। উন্নত চিকিৎসাৰ বাবে এয়াৰ এম্বুলেন্সত দিল্লীলৈ স্থানান্তৰ কৰা হৈছিল। বাটতে সংঘটিত হয় এই দুৰ্ঘটনা।
অসামৰিক বিমান পৰিবহণ সঞ্চালকালয়ে এক বিবৃতিত কয় যে সন্ধিয়া ৭:৩৪ বজাত কলকাতা বিমান পৰিবহণ নিয়ন্ত্ৰণৰ সৈতে যোগাযোগ স্থাপন কৰাৰ পিছত হঠাতে যোগাযোগ আৰু ৰাডাৰ দুয়োটা সংকেত হেৰাই যায়। সেই সময়ত এই বিমানখন বাৰাণসীৰ পৰা প্ৰায় ১০০ নটিকেল মাইল দক্ষিণ-পূবে আছিল। বিমানখনৰ টেইল নম্বৰ আছিল VT-AJV ।
প্ৰাথমিক অনুমান অনুসৰি বতৰ বেয়া হোৱাৰ বাবেই এই মৰ্মান্তিক দুৰ্ঘটনা সংঘটিত হৈছে। স্থানীয় বাসিন্দাসকলেও কয় যে সেই সময়ত অঞ্চলটোত প্ৰচণ্ড বতাহ-বৰষুণ, বজ্ৰপাত আৰু ঢেৰেকনি আছিল। তেওঁলোকে কয় যে বিমানখন আকাশৰ পৰা প্ৰচণ্ড শব্দৰ সৈতে বাগৰি পৰে।
ঘটনাৰ খবৰ পোৱাৰ পিছত জিলা প্ৰশাসনৰ অনুসন্ধান আৰু উদ্ধাৰকাৰী দলে ক্ষীপ্ৰতাৰে সেই স্থানত উপস্থিত হয়। দুৰ্ঘটনাটোৰ তদন্তৰ বাবে বিমান দুৰ্ঘটনা অনুসন্ধান ব্যুৰোৰ বিশেষ দল এটাকো মাতি অনা হৈছে।
ডিজিচিএই জনোৱা মতে, তদন্তৰ অগ্ৰগতিৰ বিষয়ে অধিক তথ্য পিছত প্ৰদান কৰা হ’ব। এই দুৰ্ঘটনাক লৈ শোক প্ৰকাশ কৰিছে ঝাৰখণ্ডৰ প্ৰাক্তন মুখ্যমন্ত্ৰী চম্পাই ছ’ৰেনে। তেওঁ মৃতকৰ পৰিয়াললৈ সমবেদনা জ্ঞাপন কৰি ঘটনাৰ নিৰপেক্ষ তদন্তৰ দাবী জনায়।
