বিজেপি চৰকাৰে নিৰ্বাচনী ইস্তাহাৰত দিয়া প্ৰতিশ্ৰুতি অনুসৰি আজি পৰ্যন্ত গৰিয়া-মৰিয়া-দেশী আৰু চাহ জনগোষ্ঠীয় জোলহা উন্নয়ন নিগম গঠন নোহোৱাৰ ক্ষোভত সদৌ অসম গৰীয়া মৰীয়া দেশী জাতীয় পৰিষদে আজি সংখ্যালঘু উন্নয়ন বিভাগৰ মন্ত্ৰী ৰঞ্জিত দত্তক এখন স্মাৰকপত্ৰ প্ৰদান কৰে।
উল্লেখ্য যে ২০১৯-২০ বৰ্ষৰ বাজেটত অসমৰ খিলঞ্জীয়া গৰিয়া মৰিয়া দেশী আদি জনগোষ্ঠীয় ৰাইজক আৰ্থ সামাজিক জৰীপৰ জৰিয়তে চিনাক্ত কৰাৰ লগতে ওপৰোক্ত জনগোষ্ঠীয় কেইটাৰ স্বাৰ্থত এখন উন্নয়ন নিগম গঠন কৰাৰ বাবে ১০০ কোটি টকা ধাৰ্য কৰিছিল।
পৰৱৰ্তি সময়ত অসমৰ মুখ্য মন্ত্ৰীক সাক্ষাৎ কৰি ওপৰোক্ত জনগোষ্ঠীৰ সুকীয়া আৰ্থ সামাজিক জৰীপৰ বিষয়ত অতি শীঘ্ৰে ব্যৱস্থা গ্ৰহণৰ দাবী উত্থাপনৰ লগতে যোৱা ১১ ফেব্ৰুৱাৰিত বিহালী সমষ্টিৰ বিধায়ক তথা মন্ত্ৰী ৰঞ্জিত দত্তৰ নেতৃত্বত দিচপুৰত জনগোষ্ঠীয় নেতৃস্থানীয় ব্যক্তি আৰু দল-সংগঠনৰ নেতৃবৃন্দৰ উপস্থিতিত চৰকাৰীভাৱে এক আলোচনাও অনুষ্ঠিত হৈছিল।
উক্ত আলোচনাত প্ৰস্তাৱিত জৰীপৰ কাম আৰম্ভ কৰাৰ প্ৰাৰম্ভিক প্ৰক্ৰিয়া হিচাপে গৰিয়া মৰিয়া দেশী আৰু চাহ জনগোষ্ঠীয় জলহা উন্নয়ন নিগম অতি সোনকালে গঠন কৰাৰ সিন্ধান্ত লোৱা হৈছিল।
কিন্তু বিভিন্ন কাৰণবশতঃ উক্ত নিগম আজিলৈকে গঠন হোৱা নাই আৰু উক্ত খিলঞ্জীয়া জনগোষ্ঠী কেইটাৰ প্ৰস্তাৱিত সুকীয়া আৰ্থ সামাজিক জৰীপৰ কামো বৰ্তমান লৈকে হৈ উঠা নাই।
এনেবোৰ কাৰণতে আজি সদৌ অসম গৰিয়া মৰিয়া দেশী জাতীয় পৰিষদৰ কেন্দ্ৰীয় সাধাৰণ সম্পাদক (ভাৰপ্ৰাপ্ত) মইনুল ইছলামৰ নেতৃত্বত যোৱা এটা দলে উন্নয়ন নিগম গঠন কৰাৰ সিদ্ধান্ত অনতিপলমে কাৰ্যকৰী কৰাৰ দাবীত মন্ত্ৰী দত্তৰ নিজাবাসগৃহত সাক্ষাৎ কৰি স্মাৰকপত্ৰখন প্ৰদান কৰে।
