জাঁজী হেম নাথ শৰ্মা মহাবিদ্যালয়ত সদৌ অসম আন্তঃ মহাবিদ্যালয় তৰ্ক প্ৰতিযোগিতা
শিৱসাগৰ জিলাৰ জাঁজী হেম নাথ শৰ্মা মহাবিদ্যালয়ৰ প্ৰেক্ষাগৃহত আজি মহাবিদ্যালয়খনৰ প্ৰয়াত মেধাবী ছাত্ৰ দ্বয় অভিজিৎ মহন্ত আৰু নিলোৎপল গগৈৰ সোঁৱৰণত অনুষ্ঠিত নৱম সংখ্যক সদৌ অসম আন্তঃ মহাবিদ্যালয় তৰ্ক প্ৰতিযোগিতা অনুষ্ঠিত হয়।
ৰাজ্যখনৰ মুঠ ১৬ খন মহাবিদ্যালয়ৰ ১৮টা দলে অংশগ্ৰহণ কৰা প্ৰতিযোগিতাখনৰ বিষয় আছিল ‘শৈক্ষিক অনগ্ৰসৰতাই অন্ধ বিশ্বাস আৰু কু সংস্কাৰক প্ৰশ্ৰয় দিয়াত উৎসাহিত কৰিছে।’
সাংবাদিক, লেখক তথা দৈনিক জনভূমি কাকতৰ দেওবৰীয়া পৰিপুৰিকাৰ সম্পাদক শাংকব কৌশিক বৰুৱাৰ অধ্যক্ষতাত অনুষ্ঠিত হোৱা তৰ্ক প্ৰতিযোগিতাখনত বাহনা কলেজৰ শতাব্দী হাজৰিকা আৰু মানস নেওঁগে প্ৰথম স্থান লাভ কৰাৰ বিপৰীতে জগন্নাথ বৰুৱা মহাবিদ্যালয়ৰ অভিষেশ কাব্ৰা আৰু ৰশ্মি কলিতাই দ্বিতীয় তথা জাঁজী হেম নাথ শৰ্মা মহাবিদ্যালয়ৰ ছাত্ৰীদ্বয় উদিষ্ণা শৰ্মা আৰু তৃষ্ণা চেতিয়াই তৃতীয় স্থান লাভ কৰিবলৈ সক্ষম হয়।
ইফালে যোৰহাট জগন্নাথ বৰুৱা মহাবিদ্যালযৰ ছাত্ৰ অভিষেশ কাব্ৰাই প্ৰতিযোগিতাৰ শ্ৰেষ্ঠ তাৰ্কিকৰ সন্মান লাভ কৰে।
মহাবিদ্যালয়ৰ অৱসৰপ্ৰাপ্ত উপাধ্যক্ষ ভবানী কুমাৰ বৰুৱাই শুভাৰম্ভ কৰা প্ৰতিযোগিতাখত বিচাৰক হিচাবে উপস্থিত থাকে ডিব্ৰুগড় বিশ্ব বিদ্যালয়ৰ ইংৰাজী বিভাগৰ অধ্যাপক ড০ মৃদুল বৰদলৈ, শিৱসাগৰ মহাবিদ্যালয়ৰ ৰাজনীতি বিজ্ঞান বিভাগৰ সহযোগী অধ্যাপক ড০ সব্যসাচী মহন্ত আৰু আমগুৰি অৰুণোদয় একাডেমীৰ সহকাৰী অধ্যাপিকা ৰূপজ্যোতি নাথ।
প্ৰতিযোগিতাৰ শেষত বিজয়ীসকলক মানপত্ৰ, ট্ৰফী আৰু নগদ ধনেৰে পুৰস্কৃত কৰা হয়। এই অনুষ্ঠানতেই মহাবিদ্যালয়ৰ বাৰ্ষিক উন্নয়ণ প্ৰতিবেদন উন্মোচন কৰে ড০ মৃদুল বৰদলৈয়ে।
স্মতৰ্ব্য যে ১৯৯৪ চনৰ ১১ নৱেম্বৰত শিৱসাগৰ জিলাৰ ডিমৌত সংঘটিত বাছ দুৰ্ঘটনাত অকালতে প্ৰাণ হেৰুওৱা মহাবিদ্যালয়ৰ প্ৰতিভাবান ছাত্ৰ দুগৰাকীৰ সোঁৱৰণত মহাবিদ্যালয় কৰ্তৃপক্ষই উক্ত তৰ্ক প্ৰতিযোগিতাখন অনুষ্ঠিত কৰি আহিছে।