বিটিএডি অঞ্চলৰ অনাবড়ো সকলৰ সামাজিক, ৰাজনৈতিক, অৰ্থনৈতিক অধিকাৰ সুৰক্ষিত কৰি ৰখাৰ স্বাৰ্থত তথা পৃথক বড়োলেণ্ড ৰাজ্যৰ গঠনত বাধা দিয়াৰ স্বাৰ্থত আগন্তুক লোকসভা নিৰ্বাচনত কোকৰাঝাৰ লোকসভা সমষ্টিৰ নিৰ্দলীয় প্ৰাৰ্থী নৱ শৰণীয়াক সমষ্টিটোৰ অন্তৰ্গত সমূহ অবড়ো ৰাইজে ঐক্যবদ্ধভাৱে ভোটদান কৰা উচিত। এই মত সদৌ অসম কোচ ৰাজবংশী সন্মিলনীৰ।
এক বিবৃতিত সদৌ অসম কোচ ৰাজবংশী সন্মিলনীৰ সাধাৰণ সম্পাদক হিমু ৰাজবংশী আৰু প্ৰচাৰ সম্পাদক কুমাৰ দিলীপ নাৰায়ণ দেৱে কয় যে কোকৰাঝাৰ লোকসভা সমষ্টিৰ অবড়ো সকলৰ ভৱিষ্যতৰ সুৰক্ষাৰ প্ৰতি লক্ষ্য ৰাখিয়ে সন্মিলনীয়ে আগন্তুক লোকসভা নিৰ্বাচনত সমষ্টিটোৰ নিৰ্দলীয় প্ৰাৰ্থী নৱ শৰণীয়ালৈ মুকলি সমৰ্থন জনাইছে।
সমষ্টিটোৰ অবড়ো ভোটাৰসকলক বড়ো আন্দোলনৰ সময়ত উগ্ৰ বড়ো জাতীয়তাবাদী তথা বড়ো উগ্ৰপন্থীৰ দ্বাৰা সন্মুখীন হ’বলগীয়া হোৱা হত্যা, হিংসা, বিদ্বেষ আৰু অমানৱীয় নিৰ্যাতনৰ ঘটনাৱলী মনত পেলাবলৈ আহ্বান জনাই বিবৃতিটোত সংগঠনটোৱে কয় যে আগন্তুক নিৰ্বাচনক নৱ শৰণীয়াৰ সলনি অন্য অবড়ো প্ৰাৰ্থীক ভোট দিয়া মানে বিপিএফৰ প্ৰাৰ্থীৰ বিজয় নিশ্চিত কৰা। সেয়ে অবড়ো ভোটৰ যাতে বিভাজন নহয় তাৰ বাবে সমষ্টিটোৰ প্ৰতিগৰাকী অবড়ো ভোটাৰ সজাগ-সচেতন হোৱা উচিত।
বিপিএফ প্ৰধান হাগ্ৰামা মহিলাৰীৰ ৰাজনৈতিক টোপ গিলি একাংশ অবড়ো প্ৰাৰ্থী তথা গণভিত্তিহীন একাংশ অবড়ো সংগঠনৰ তথাকথিত নেতাই শৰণীয়াৰ বিৰুদ্ধে বিভ্ৰান্তিকৰ প্ৰচাৰ আৰম্ভ কৰি কোকৰাঝাৰ লোকসভা সমষ্টিৰ ভোটাৰৰ মাজত বিভাজন অনাৰ গভীৰ ষড়যন্ত্ৰত লিপ্ত হোৱা বুলি অভিযোগ কৰি বিবৃতিযোগে সন্মিলনীয়ে এইসকল নেতাক অবড়োৰ ভৱিষ্যতক লৈ নিকৃষ্ট ৰাজনীতি নকৰিবলৈ সকীয়াই দিয়ে।
ভয়-ভাবুকি আৰু প্ৰলোভনেৰে ৰাজনীতিৰে ভোটাৰ ৰাইজক বিভ্ৰান্ত নকৰিলে আগন্তুক নিৰ্বাচনত কোকৰাঝাৰ লোকসভা সমষ্টিত শৰণীয়াৰ বিজয় এশ শতাংশ নিশ্চিত বুলিয়ো সন্মিলনীয়ে দাবী কৰে।