অৰ্থনৈতিক সংকটত বিধ্বস্ত শ্ৰীলংকা! প্ৰধানমন্ত্ৰীৰ বাদে সকলো কেবিনেট মন্ত্ৰীৰ পদত্যাগ

তীব্ৰ অৰ্থনৈতিক সংকটত জুৰুলা হৈ পৰিছে শ্ৰীলংকা। খাদ্য, ইন্ধনকে ধৰি পণ্য সামগ্ৰীৰ ভয়ংকৰ নাটনিৰ সন্মুখীন হৈছে দেশখন। ৰাজপথত জনতাৰ প্ৰতিবাদে হিংসাত্মক ৰূপ লৈছে। দেশখনত জাৰি কৰা হৈছে জৰুৰীকালীন অৱস্থা। তাৰমাজতে এইবাৰ শ্ৰীলংকাৰ মন্ত্ৰীসভাৰ সকলো মন্ত্ৰীয়ে পদত্যাগ কৰিছে।

বাতৰি অনুসৰি, দেশখনৰ প্ৰধানমন্ত্ৰী মাহিন্দা ৰাজাপাক্ষে আৰু তেওঁৰ ভাতৃ ৰাষ্ট্ৰপতি গোটাবায়া ৰাজাপাক্ষেৰ বাহিৰে মন্ত্ৰীসভাৰ ২৬গৰাকী সদস্যই পদত্যাগ কৰিছে। পদত্যাগ কৰা মন্ত্ৰীসকলৰ ভিতৰত প্ৰধানমন্ত্ৰীৰ পুত্ৰ নামাল ৰাজাপাক্ষেও আছে।

নামাল ৰাজাপাক্ষে এক টুইটত দাবী কৰিছে যে দেশখনত সুস্থিৰতা প্ৰতিষ্ঠাৰ বাবে সিদ্ধান্ত গ্ৰহণ কৰাত প্ৰধানমন্ত্ৰী আৰু ৰাষ্ট্ৰপতিক এই পদক্ষেপে সহায় কৰিব।

লগতে পঢ়ক: ডিব্ৰুগড়ৰ পৰা মহিলা মাওবাদী নেত্ৰীক গ্ৰেপ্তাৰ NIAৰ

দেশখনৰ শিক্ষামন্ত্ৰী দীনেশ গুণৱাৰদনে জানিবলৈ দিয়ে যে ৰাষ্ট্ৰপতিয়ে যাতে নতুন মন্ত্ৰীসভা গঠন কৰিব পাৰে তাৰবাবে মন্ত্ৰীসকলে তেওঁলোকৰ পদত্যাগ পত্ৰ দাখিল কৰিছে। দেশখনৰ অৰ্থনৈতিক সংকটৰ চৰম অৱস্থাকলৈ আলোচনাৰ পিছতে এই সিদ্ধান্ত গ্ৰহণ কৰা বুলি তেওঁ কয়।  

উল্লেখ্য যে শ্ৰীলংকাত বিগত কিছুদিন ধৰি তীব্ৰ অৰ্থনৈতিক সংকটে দেখা দিছে। দেশখনত বিদেশী মুদ্ৰাৰ ভাণ্ডাৰৰ নাটনি, তেল, বিদ্যুৎ আমদানিৰ বাবে চৰকাৰৰ আৰ্থিক নাটনিয়ে অৱস্থা জুৰুলা কৰি তুলিছে।

I have informed the sec. to the President of my resignation from all portfolios with immediate effect, in hope that it may assist HE & PMs decision to establish stability for the people & the govt of #LKA. I remain committed to my voters, my party & the people of #Hambanthota.

— Namal Rajapaksa (@RajapaksaNamal) April 3, 2022

যোৱা বৃহস্পতিবাৰে জনতাৰ ক্ষোভৰ বহিৰ্প্ৰকাশ ঘটে। সিদিনা ৰাষ্ট্ৰপতি গোটাবায়া ৰাজাপাক্ষেৰ বাসভৱনত প্ৰতিবাদকাৰীসকলে প্ৰৱেশৰ চেষ্টা কৰিছিল। প্ৰতিবাদকাৰীসকলে ৰাজাপাক্ষেৰ ক্ষমতাত থকা পৰিয়ালৰ সদস্যসকলৰ পদত্যাগ দাবী কৰাৰ লগতে তেওঁলোকে সামৰিক বাহনত অগ্নিসংযোগো কৰিছিল।  

লগতে পঢ়ক: অহা ২৮ এপ্ৰিলত ডিব্ৰুগড়লৈ আহিব প্ৰধানমন্ত্ৰী নৰেন্দ্ৰ মোডী

দেশখনত প্ৰতিবাদী জনতা আৰু নিৰাপত্তা বাহিনীৰ মাজত সংঘৰ্ষৰ মাজতে ৰাষ্ট্ৰপতি ৰাজাপাক্ষে প্ৰতিবাদ দমনৰ বাবে কঠোৰ ব্যৱস্থা গ্ৰহণ কৰিছিল।