নেশ্যনেল হেৰাল্ডৰ গোচৰৰ মাজতে পুনৰ বিপদত পৰিছে কংগ্ৰেছ নেতা ৰাহুল গান্ধী। ৰাহুল গান্ধীৰ বিৰুদ্ধে দ্বৈত নাগৰিকত্ব থকাৰ অভিযোগ। এই অভিযোগ উত্থাপন কৰি এলাহাবাদ আদালততো গোচৰ ৰুজু কৰা হয়। এই গোচৰতে কেন্দ্ৰক প্ৰতিবেদন দাখিল কৰিবলৈ নিৰ্দেশ দিয়া হৈছে। এই সন্দৰ্ভত ৫ মে’ৰ ভিতৰত প্ৰতিবেদন দাখিল কৰিবলৈ গৃহ মন্ত্ৰালয়ক নিৰ্দেশ দিছে এলাহাবাদ উচ্চ ন্যায়ালয়ে।
২০১৯ চনৰ পৰা ৰাহুলৰ নাগৰিকত্বক লৈ বিতৰ্ক চলি আছে। ৰায়ে বৰেলীৰ কংগ্ৰেছৰ সাংসদ ৰাহুল গান্ধীৰ বিৰুদ্ধে প্ৰথম দ্বৈত নাগৰিকত্বৰ অভিযোগ তোলে বিজেপি নেতা সুব্ৰমনিয়াম স্বামীয়ে। তেওঁ ৰাহুল ব্ৰিটিছ নাগৰিক বুলি দাবী কৰে।
পিছত বিজেপি নেতা তথা কৰ্ণাটকৰ অধিবক্তা এছ ভিগনেশ শিশিৰে এই সন্দৰ্ভত জনস্বাৰ্থৰ মামলা দাখিল কৰে। নাগৰিকত্ব বিতৰ্কক লৈ ৰাহুলৰ সাংসদৰ মৰ্যাদা বাতিল কৰাৰ বাবে জনস্বাৰ্থৰ গোচৰ দাখিল কৰা হয়। লগতে ৰাহুলৰ সাংসদ পদ আৰু ভাৰতীয় নাগৰিকত্ব বাতিল কৰিবলৈও দাবী জনায়।
যোৱা বছৰৰ জুলাই মাহত এই গোচৰ ৰুজু কৰাৰ সময়ত অধিবক্তাগৰাকীয়ে কেইবাখনো নথি-পত্ৰৰ সৈতে দাবী কৰিছিল যে ৰাহুলৰ ভাৰতীয় আৰু ব্ৰিটিছ উভয় নাগৰিকত্ব আছে।
বাতৰি অনুসৰি, এলাহাবাদ উচ্চ ন্যায়ালয়ে ইয়াৰ পূৰ্বেই কেন্দ্ৰক এই সন্দৰ্ভত প্ৰতিবেদন দাখিল কৰিবলৈ কৈছিল। লোকসভাৰ নেতা বিৰোধী ৰাহুল গান্ধীৰ দ্বৈত নাগৰিকত্বৰ বিষয়ত সোমবাৰৰ ভিতৰত কেন্দ্ৰক স্থিতি প্ৰতিবেদন দাখিল কৰিবলৈ আদালতে নিৰ্দেশ দিছিল। এই প্ৰতিবেদন দাখিল কৰিবলৈ কেন্দ্ৰীয় গৃহ মন্ত্ৰালয়ে আঠ সপ্তাহৰ সময় বিচাৰিছিল। অৱশ্যে আদালতে ইমান সময় দিবলৈ ইচ্ছুক নহয়।
সোমবাৰে ন্যায়াধীশ এ আৰ মাছুদী আৰু অজয় কুমাৰ শ্ৰীবাস্তৱৰ বিচাৰপীঠে কেন্দ্ৰক এই গোচৰত প্ৰতিবেদন দাখিল কৰিবলৈ ১০ দিনৰ সময় দিয়ে। এই গোচৰৰ পৰৱৰ্তী শুনানি ৫ মে’ত হ’ব। আদালতে একেদিনাই এই সন্দৰ্ভত কেন্দ্ৰক প্ৰতিবেদন দাখিল কৰিবলৈ নিৰ্দেশ দিয়ে।
উল্লেখ্য যে নেশ্যনেল হেৰাল্ডৰ সম্পত্তিৰ গোচৰত ইডিয়ে ছোনিয়া গান্ধী আৰু ৰাহুল গান্ধীৰ বিৰুদ্ধে প্ৰথমখন চাৰ্জশ্বীট দাখিল কৰিছে। দিল্লীৰ ৰাউছ এভিনিউ আদালতত দাখিল কৰে অভিযোগনামা। ২৫ তাৰিখে গোচৰৰ শুনানি হ’ব পাৰে। কংগ্ৰেছে দাবী কৰিছে যে এই গোচৰটো ‘প্ৰতিশোধৰ ৰাজনীতিৰ প্ৰতিফলন’।
