‘বিটিচি নিৰ্বাচনৰ পুঁজি গোটোৱাৰ স্বাৰ্থত জনস্বাস্থ্য বিভাগত দুৰ্নীতিৰ পোহাৰ মেলিছে মন্ত্ৰী ৰিহন দৈমাৰীয়ে।‘ দিচপুৰ প্ৰেছ ক্লাবত এক সংবাদমেল সম্বোধন কৰি জনস্বাস্থ্য বিভাগৰ মন্ত্ৰীগৰাকীৰ বিৰুদ্ধে গুৰুতৰ অভিযোগ তোলে অসমীয়া যুৱ মঞ্চই।
দুৰ্নীতিৰ বিৰুদ্ধে মুখ্য মন্ত্ৰীৰ শূণ্য সহনশীলতাৰ নীতি জনস্বাস্থ্য কাৰিকৰী বিভাগত মুঠেও প্ৰতিফলিত হোৱা নাই বুলি অভিযোগ সংগঠনটোৰ সচিব প্ৰধান জিতুল তুলি ডেকাই কয় ‘আমি পূৰ্বেও এই বিভাগটোৰ কেইবা কোটি টকীয়া বিত্তীয় কেলেংকাৰীৰ কথা তথ্য সহকাৰে পোহৰলৈ আনিছো যদিও মুখ্য মন্ত্ৰীয়ে দেখিও নেদেখাৰ ভাও ধৰিছে।‘
উল্লেখযোগ্য যে, অসমীয়া যুৱ মঞ্চই জনস্বাস্থ্য কাৰিকৰী বিভাগৰ ‘অজানিতে মনে মনে’ নামৰ বোলছবি নিৰ্মাণত, পাইপ ও বিশুদ্ধ খোৱাপানী যোগানত বৃহৎ কেলেংকাৰী চলি থকা বুলি তথ্য সহকাৰে অভিযোগ তুলিছিল।
আজি সংগঠনটোৰ সচিব প্ৰধানগৰাকীয়ে উক্ত বিভাগটোত দেৱাল অংকনত ভয়ংকৰ কেলেংকাৰী সংঘটিত হোৱাৰ অভিযোগ উত্থাপন কৰে।
‘যি সময়ত ৰাজ্যবাসী বানত ককবকাই আছিল, সেই সময়তে ৰাজ্যৰ গ্ৰামাঞ্চ্যলত স্বচ্ছ ভাৰতৰ সজাগতাৰ বাবে দেৱাল লিখন কৰি আছিল। ইয়াতকৈ আৰু ভয়ানক দুৰ্নীতি, দুই নম্বৰী হয়তো আজিলৈকে কোনো চৰকাৰী বিভাগতে হোৱা নাই।‘ সংবাদমেলত এইদৰে কয় ডেকাই।
তদুপৰি RTI কৰি লাভ কৰা তথ্য দাঙি ধৰি তেওঁ কয়, ‘বিভাগটোৱে যোৱা ৪ জুলাইত স্বচ্ছ ভাৰত গ্ৰামীণৰ সজাগতাৰ বাবে দেৱাল লিখন কৰিবলৈ এক্সক্লুচিভ এডভাৰটাইজিং প্ৰাইভেট লিমিটেড নামৰ প্ৰতিষ্ঠানটোক ১,৩৫,৮২,৮৪৮ টকাৰ ঠিকা দিয়ে। বাক্সা, চিৰাং, কোকৰাঝাৰ, ওদালগুৰি, বৰপেটা, বঙাইগাওঁ, ধুবুৰী, দক্ষিণ শালমৰা, ডিমা হাচাও, কাৰ্বি আংলং, পশ্চিম কাৰ্বি আংলং জিলাৰ গাঁও পঞ্চায়ত এলেকাত দেৱাল লিখনৰ বাবে এই কোটি টকীয়া ঠিকা দিয়ে।’
তাৎপয্যপূৰ্ণভাৱে এমাহৰ ভিতৰত এই কাম সম্পূৰ্ণ কৰিবলৈ বিভাগে নিৰ্দেশ দিছিল যদিও জুলাই মাহটোত ৰাজ্যৰ সৰহসংখ্যক জিলা বানৰ কৱলত আছিল বুলি মঞ্চৰ সচিব প্ৰধান গৰাকীয়ে দাবী কৰে।
‘বানপানীত ডুবি থকা সময়ত বিভাগটোৱে কেনেকৈ দেৱাল লিখনৰ কাম কৰিলে?’ ডেকাৰ প্ৰশ্ন।
ডেকাই আৰু কয় ‘কাৰ্বি আংলং জিলাত এক্সক্লুচিভ এডভাৰটাইজিং প্ৰাইভেট লিমিটেডক সৰ্বাধিক ৩২.৯৬ লাখ টকাৰ দেৱাল লিখন কৰিবলৈ দিয়া হৈছে। অথচ সকলোৱে জানে যে কাৰ্বি আংলং জিলাৰ গ্ৰামাঞ্চলত দেৱাল লিখনৰ বাবে ইমান দেৱালেই নাই।‘
ইপিনে, এই কেলেংকাৰীৰ উমান পাই অসমীয়া যুৱ মঞ্চই জনস্বাস্থ্য কাৰিকৰী বিভাগৰ মুখ্য অভিযন্তা (অনাময়) লক্ষেশ্বৰ শইকীয়াক সাক্ষাৎ কৰি স্মাৰক পত্ৰ প্ৰদান কৰে যদিও তেওঁলোকৰ কথাত কোনো গুৰুত্ব প্ৰদান নকৰিলে বুলি অভিযোগ উত্থাপন কৰে ডেকাই।
আনহাতে, একেখন সংবাদমেলতে বিভাগটোৱে আই. ই. চি শিতানত কমিকচ চপোৱাৰ নামত ব্যাপক কেলেংকাৰী কৰাৰ অভিযোগ উত্থাপন কৰে।
অভিযোগ অনুসৰি বিগত বৰ্ষৰ ডিচেম্বৰ মাহতে জনস্বাস্থ্য কাৰিকৰী বিভাগটোৱে কমিকছ ছপা কৰিবৰ বাবে ডায়মণ্ড মেগাজিন প্ৰাইভেট লিমিটেড নামৰ প্ৰতিষ্ঠানটোক ঠিকা দিছিল।
মুঠ আৱন্টিত ধনৰ পৰিমাণ আছিল ১,০৯,৫০,০০০ টকা। ইয়াৰে চলিত বৰ্ষৰ জুলাই মাহত আই চি আই চি আই বেংকৰ জৰিয়তে বিভাগটোৱে ১,০৫,১২০০০ টকা মোকলাই দিছিল প্ৰতিষ্ঠানটোক।
‘কিন্তু কমিকছ চপা নোহোৱাকৈয়ে বা কাম নকৰাকৈ বিভাগটোৱে কেনেকৈ প্ৰতিষ্ঠানটোক টকা মোকলাই দিলে?’ ডেকাই প্ৰশ্ন কৰি লগতে কয় ‘কোনো ছাত্ৰ-ছাত্ৰীয়ে এই কমিকছ লাভ কৰা নাই তথা বিভাগীয় মুখ্য কাৰ্য্যালয়ত এই কমিকছ বিচাৰি গৈছিলো যদিও তেওঁলোকে আমাক কমিকছ দেখুৱাব নোৱাৰিলে।‘
ইপিনে, বিভাগটোৰ বহু দুৰ্নীতি ফাদিল কৰি অহাৰ পাছতো মুখ্য মন্ত্ৰীয়ে কোনোধৰণৰ তদন্ত ঘোষণা নকৰাত ডেকাই আক্ষেপ কৰি কয় ‘আমাক মাতিলে আমি তথ্যৰ সৈতে সকলোবোৰ তেওঁক দি তদন্তত সহায় কৰিলো হেতেন। কিন্তু বিভাগটোত দুৰ্নীতি চলাবলৈ মন্ত্ৰী ৰিহন দৈমাৰীক লাইচেন্স দিয়া হৈছে নেকি?’
