অসমৰ ৰাজনীতি এতিয়া তীব্ৰ উৎকণ্ঠাৰ মাজেৰে পাৰ হৈছে কাৰণ কংগ্ৰেছৰ সৈতে বিৰোধী ঐক্য গঠনৰ চৰ্চা চলি থকাৰ মাজতে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈৰ শেহতীয়া পদক্ষেপে সকলোৰে দৃষ্টি আকৰ্ষণ কৰিছে।
মঙলবাৰে সংবাদ মাধ্যমৰ আগত অখিল গগৈয়ে কয় যে কংগ্ৰেছৰ সৈতে মিত্ৰতাৰ আলোচনা এতিয়াও শেষ হৈ যোৱা নাই । যদিও তেওঁক বৰ্তমানলৈকে প্ৰদেশ কংগ্ৰেছৰ সভাপতি গৌৰব গগৈয়ে ফোন কৰা নাই, তথাপিও জ্যেষ্ঠ নেতা ৰিপুণ বৰাই পুৱাই তেওঁৰ সৈতে যোগাযোগ কৰিছে আৰু কথা-বতৰাবোৰ গঠনমূলক দিশত আগবাঢ়িছে বুলি তেওঁ জানিবলৈ দিয়ে। তেওঁ স্পষ্ট কৰি দিয়ে যে কংগ্ৰেছে বৰ্তমানলৈকে মিত্ৰতাৰ সন্দৰ্ভত কোনো নেতিবাচক কথা কোৱা নাই। ইয়াৰ উপৰিও অসম জাতীয় পৰিষদৰ সভাপতি লুৰীণজ্যোতি গগৈয়েও অখিল গগৈৰ সৈতে কথা পাতিছে আৰু যিকোনো বিৰোধী ঐক্যত ৰাইজৰ দলক বাদ নিদিবলৈ গুৰুত্ব আৰোপ কৰিছে।
অৱশ্যে মিত্ৰতাৰ এই গুৰুত্বপূৰ্ণ আলোচনা চলি থকাৰ মাজতে মঙলবাৰে হ’বলগীয়া বিৰোধী ঐক্য মঞ্চৰ সংবাদ মেলখন হঠাৎ বাতিল কৰা হয়। ইয়াৰ পাছতে সোমবাৰে নিশা অখিল গগৈক বিতৰ্কিত ছ’চিয়েল মিডিয়া ব্যক্তিত্ব ভিক্টৰ দাসৰ সৈতে একেলগে দেখা যায়। দুয়োৰে এই আকস্মিক সাক্ষাৎ আৰু ফেচবুক লাইভক লৈ এতিয়া ৰাজ্যজুৰি চৰ্চা চলিছে। এই লাইভ অনুষ্ঠানত অখিল গগৈ আৰু ভিক্টৰ দাসে শিল্পী জুবিন গাৰ্গৰ প্ৰসংগ উত্থাপন কৰে। বিশেষকৈ জুবিন গাৰ্গৰ সমাধি ক্ষেত্ৰ নিৰ্মাণত চৰকাৰে কৰা পলমক লৈ দুয়ো তীব্ৰ ক্ষোভ প্ৰকাশ কৰে। তেওঁলোকে কয় যে তেওঁলোকক এই কামৰ বাবে আৰু চৰকাৰৰ সহায় নালাগে আৰু ৰাইজক সহায়ৰ হাত আগবঢ়াবলৈ আহ্বান জনায়। মাত্ৰ এক টকাকৈ হ’লেও দান কৰি এই স্মৃতিসৌধটো নিজে গঢ়ি তোলাৰ বাবে তেওঁলোকে ৰাইজক অনুৰোধ কৰে।
ইফালে এই ফেচবুক লাইভৰ সময়ত অখিল গগৈ আৰু ভিক্টৰ দাসৰ ব্যৱহাৰক লৈ বহুতে প্ৰশ্ন উত্থাপন কৰিছে। লাইভটোৰ সময়ত দুয়োকে হাঁহি-ধেমালি কৰি থকা দেখা গৈছিল আৰু ভিক্টৰ দাসে নিজৰ স্বভাৱজাত সুলভ তথা অনানুষ্ঠানিক ভাষা ব্যৱহাৰ কৰিছিল। এগৰাকী নিৰ্বাচিত বিধায়ক হৈ অখিল গগৈয়ে এনেধৰণৰ আচৰণ কৰা কাৰ্যত বহু অনুগামী আৰু সাধাৰণ ৰাইজে অসন্তুষ্টি প্ৰকাশ কৰিছে। কিছুমান লোকে ইয়াক এগৰাকী জনপ্ৰতিনিধিৰ বাবে অপেশাদাৰী আচৰণ বুলিও অভিহিত কৰিছে। এফালে মিত্ৰতাৰ অংক আৰু আনফালে আৱেগিক ইছ্যু ব্যৱহাৰ কৰি জনসাধাৰণৰ মাজলৈ যোৱাৰ এই প্ৰয়াসৰ মাজত অখিল গগৈৰ পৰৱৰ্তী পদক্ষেপ কি হ’ব, সেয়া এতিয়া লক্ষণীয় হ’ব।
