হায়দৰাবাদত গ্ৰেপ্তাৰ কৰা হৈছে আল্লু অৰ্জুনক! কিছুদিন পূৰ্বে হায়দৰাবাদত ‘পুষ্পা ২’ৰ প্ৰিমিয়াৰত এগৰাকী মহিলা অনুৰাগীৰ মৃত্যুৰ পিছত দক্ষিণৰ অভিনেতা আল্লু অৰ্জুনৰ বিৰুদ্ধে এজাহাৰ দাখিল কৰা হৈছিল। সেই গোচৰতে গ্ৰেপ্তাৰ কৰা হৈছে দক্ষিণৰ ছুপাৰষ্টাৰগৰাকীক। শুকুৰবাৰে এই খবৰ পোহৰলৈ অহাৰ পিছতে দেশৰ চলচ্চিত্ৰ জগতত তোলপাৰ লাগিছে!
যোৱা ৪ ডিচেম্বৰত হায়দৰাবাদৰ সন্ধ্যা থিয়েটাৰত পুষ্পা ২ৰ প্ৰিমিয়াৰত আল্লু অৰ্জুনক চাবলৈ গৈ এগৰাকী মহিলা অনুৰাগীৰ মৃত্যু হয়। এই কৰুণ খবৰটো শুনি অভিনেতাগৰাকীয়ে অনুৰাগীৰ পৰিয়ালক ২৫ লাখ টকাৰে সহায় কৰে।
কেৱল এয়াই নহয়, গুৰুতৰভাৱে আঘাতপ্ৰাপ্ত হৈ চিকিৎসালয়ত ভৰ্তি হোৱা মৃত মহিলাগৰাকীৰ ৯ বছৰীয়া পুত্ৰৰ চিকিৎসাৰ দায়িত্বও লৈছে দক্ষিণৰ ছুপাৰষ্টাৰগৰাকীয়ে।
কিন্তু এই ঘটনাৰ বাবে শুকুৰবাৰে আল্লু অৰ্জুনক গ্ৰেপ্তাৰ কৰা হয়। দক্ষিণৰ ছুপাৰষ্টাৰগৰাকীক গ্ৰেপ্তাৰ কৰাৰ পিছত হায়দৰাবাদৰ আৰক্ষী আয়ুক্তগৰাকীয়ে কয়, ‘তদন্ত চলি আছে। ঘটনাৰ লগত জড়িত সকলোৰে বিৰুদ্ধে কঠোৰ ব্যৱস্থা গ্ৰহণ কৰা হ’ব।”
দৰাচলতে ঠিক কি ঘটিছিল? হায়দৰাবাদত অনুষ্ঠিত হোৱা ‘পুষ্পা ২’ৰ প্ৰিমিয়াৰত সন্ধ্যা থিয়েটাৰৰ বাহিৰত অনুৰাগীৰ প্ৰচণ্ড ভিৰ হৈছিল। আনকি স্থানীয় আৰক্ষীয়ে ভিৰ চম্ভালিবলৈ সংগ্ৰাম কৰিবলগীয়া হৈছিল। পৰিস্থিতি আটাইতকৈ বিশৃংখল হৈ পৰিছিল যেতিয়া দক্ষিণৰ তাৰকা আল্লু অৰ্জুনে থিয়েটাৰত প্ৰৱেশ কৰিছিল। সন্মুখৰ পৰা তেওঁক দেখি অনুৰাগীৰ মাজত যথেষ্ট উত্তেজনাৰ সৃষ্টি হৈছিল। এই পৰিস্থিতিত পদপিষ্ট হৈ মৃত্যু হয় এগৰাকী ৩৯ বছৰীয়া মহিলাৰ। তেওঁৰ ৯ বছৰীয়া পুত্ৰও গুৰুতৰভাৱে আহত হয়। তেওঁৰ অৱস্থা সংকটজনক বুলি কোৱা হৈছে। সেই ঘটনাতে শুকুৰবাৰে গ্ৰেপ্তাৰ কৰা হৈছে আল্লু অৰ্জুন।
আনহাতে, মাত্ৰ এসপ্তাহতে ভাৰতীয় চিনেমাৰ সকলো অভিলেখ ভংগ কৰি নতুন মাইলৰ খুঁটি স্থাপন কৰিছে ‘পুষ্পা ২’ই। বলিউদতো বাদেই, আল্লু অৰ্জুনৰ ছবিখনে এৰি থৈ গৈছে বলীউডৰ অতি ব্যৱসায়িক দক্ষিণৰ ছবিৰ অভিলেখো। আঠ দিনত ‘পুষ্পা ২’ই বিশ্ব বক্স অফিচত ১১০৫ কোটি টকাৰ ব্যৱসায় কৰিছে। আৰু ১০০ কোটি টকা অতিক্ৰম কৰিলেই এই ছবিখনে ‘কে জি এফ’ আৰু ‘আৰ আৰ আৰ’ চিনেমাৰ অভিলেখ ভংগ কৰিব।
