মুখ্য মন্ত্ৰীৰ নিৰ্দেশক আওকাণ কৰিব নোৱাৰি অৱশেষত প্ৰতিবাদৰত জৰুৰীকালীন স্বাস্থ্যসেৱা বা ১০৮-১০২ সেৱাৰ কৰ্মচাৰীসকলৰ সকলো দাবী মানি ল’লে স্বাস্থ্য বিভাগে। অৱশ্যে কৰ্তব্যৰ সময় দাবী কৰা ৮ ঘণ্টাৰ পৰিৱৰ্তে পূৰ্বৰ দৰে ১২ ঘণ্টাই থাকিব বুলি জনায় ১০৮-১০২ জৰুৰীকালীন কৰ্মচাৰী সন্থা। এই দাবীৰ বাদে আন সকলো দাবী মানি লৈছে স্বাস্থ্য বিভাগে। এতিয়াৰ পৰা কৰ্মচাৰীসকলে ১৫ হাজাৰ টকাৰ পৰা ১৭ হাজাৰ ভিতৰত বৰ্ধিত হাৰত দৰমহা পাব। লগতে বিগত সময়ত পাবলৈ থকা সকলো বকেয়া ধন তেওঁলোকক জি ভি কেই দিব লাগিব বুলিও আলোচনাত সিদ্ধান্ত হয়।
উল্লেখযোগ্য যে আজি মুখ্য মন্ত্ৰীৰ নিৰ্দেশ মতে, স্বাস্থ্য মন্ত্ৰী ড০ হিমন্ত বিশ্ব শৰ্মাই আন্দোলনৰত কৰ্মচাৰীসকলৰ ৫জন প্ৰতিনিধিৰ সৈতে দিচপুৰস্থিত আইন মহাবিদ্যালয়ত আলোচনাত বহে।
আলোচনাৰ সময়ছোৱাত স্বাস্থ্য মন্ত্ৰীগৰাকীয়ে জৰুৰীকালীন বিভাগৰ কৰ্মচাৰীসকলৰ সকলো দাবী কাৰ্য্যকৰী কৰাৰ প্ৰতিশ্ৰুতি প্ৰদান কৰে।
আনহাতে আলোচনা অতি সৌহাদ্যপূৰ্ণ আছিল বুলি কৰ্মচাৰী সন্থাৰ দীপক বৰাই নৰ্থ-ইষ্ট নাওক জানিবলৈ দিয়ে। দীপক বৰাই জনোৱামতে, ১০৮-১০২ কৰ্মচাৰীসকলৰ চাকৰিৰ সম্পূৰ্ণ নিৰাপত্তা আছে বুলি স্বাস্থ্য মন্ত্ৰীগৰাকীয়ে তেওঁলোকক আশ্বাস দিয়ে।
আলোচনাৰ সময়ত স্বাস্থ্য মন্ত্ৰীজনে ১০৮ আৰু ১০২-সেৱাৰ দুৰ্বল দিশবোৰ সবল কৰি জৰুৰীকালীন স্বাস্থ্যসেৱা ব্যৱস্থাটোক এটা নতুন দিশেৰে গতি দি ৰাইজক ভাল সেৱা আগ বঢ়োৱা হ’ব বুলিও প্ৰতিশ্ৰুতি দিয়ে।
মন কৰিব লগীয়া যে অতি কম দৰমহাত (৯ৰ পৰা ১২ হাজাৰ টকা) গধুৰ দায়িত্ব পালন কৰি থকা জৰুৰীকালীন স্বাস্থ্যসেৱাৰ কৰ্মচাৰীসকলে তেওঁলোকৰ বিভিন্ন দাবীত যোৱা ৫ ছেপ্তেম্বৰৰ পৰা অনিৰ্দিষ্টকালীন কৰ্মবিৰতি পালনৰ জৰিয়তে আন্দোলন কৰি আছিল। আন্দোলনৰ ফলত ১০ দিনতকৈও বেছি দিন এই সেৱা বন্ধ হৈ আছিল।
আন্দোলনকাৰী কৰ্মচাৰীৰ ন্যায্য দাবীৰ প্ৰতি প্ৰথম অৱস্থাত স্বাস্থ্য মন্ত্ৰীয়ে গুৰুত্ব দিয়াৰ পৰিৱৰ্তে কৰ্মচাৰীসকলৰ বিৰুদ্ধে কঠোৰ হোৱাৰহে ইংগিত দিছিল যদিও মুখ্য মন্ত্ৰীৰ নিৰ্দেশত কৰ্মচাৰীসকলৰ দাবী প্ৰায় সকলো খিনিয়ে মানি লয় স্বাস্থ্য বিভাগে। স্বাস্থ্য মন্ত্ৰীগৰাকীয়ে অহা ২৭ চেপ্তেম্বৰৰ দিনা সমগ্ৰ কৰ্মচাৰীসকলৰ সৈতে ৰাজহুৱাভাৱে আলোচনাত মিলিত হ’ব বুলি দীপক বৰাই জানিবলৈ দিয়ে।
এতিয়া কৰ্মচাৰীসকলে নতুন উদ্যমেৰে কাইলৈ ১০ বজাৰ পৰা কামত যোগদান কৰিব বুলি দীপক বৰাই জানিবলৈ দিয়ে। আজিৰ আলোচনাসভাত সন্থাৰ হৈ সভাপতি প্ৰাঞ্জল শইকীয়া, সাধাৰণ সম্পাদক সুৰেণ ডেকা, কৰণ জ্যোতি ৰাভা, দীপক বৰা, মৃদুল বাইলুঙ আৰু নিতুল সোণোৱাল উপস্থিত আছিল।
উল্লেখ্য যে, লাহোৱাল সমষ্টিৰ বিধায়ক ঋতুপৰ্ণ বৰুৱাই উক্ত আলোচনা চক্ৰ অনুষ্টিত কৰাত মধ্যস্থতাকাৰীৰ ভূমিকা লোৱা বুলি দীপক বৰাই আমাৰ সাংবাদিকক জানিবলৈ দিয়ে।