বিজেপিৰ সৈতে মিত্ৰতা চুড়ান্ত অমৰিন্দ্ৰৰ সিঙৰ নতুন দলৰ, দিলে ১০১ শতাংশ জয়ৰ নিশ্চয়তা

প্ৰাক্তন কংগ্ৰেছী তথা পঞ্জাৱৰ প্ৰাক্তন মুখ্যমন্ত্ৰী অমৰিন্দ্ৰৰ সিঙে আজি পঞ্জাৱ নিৰ্বাচনৰ বাবে বিজেপিৰ সৈতে মিত্ৰতাৰ চুড়ান্ত ঘোষণা কৰে। যোৱা মাহত কংগ্ৰেছ ত্যাগ কৰি পঞ্জাৱ লোক কংগ্ৰেছ নামেৰে নতুনকৈ দল গঠনৰ পিছৰে পৰা এই মিত্ৰতা প্ৰত্যাশিত আছিল।

পঞ্জাৱৰ প্ৰাক্তন মুখ্যমন্ত্ৰীগৰাকীয়ে আজি দিল্লীত বিজেপি নেতৃত্বৰ সৈতে বৈঠকৰ পিছত এই ঘোষণা কৰে। তেওঁ লগতে বিজেপিৰ পঞ্জাৱৰ ভাৰপ্ৰাপ্ত কেন্দ্ৰীয় মন্ত্ৰী গজেন্দ্ৰ সিং শ্বেখাৱত সৈতে আলোচনাৰত ফটো টুইট কৰে।

“বিজেপিৰ সৈতে আমাৰ মিত্ৰতা নিশ্চিত হৈছে। কেৱল আসন ভাগ-বতৰাৰ আলোচনা চলি আছে। আমি চাম কোনে ক’ত প্ৰতিদ্বন্দিতা কৰিব – আসন বাছনিৰ বাবে আমাৰ চৰ্ত সম্পূৰ্ণৰূপে জয়যোগ্য।” অমৰিন্দ্ৰৰ সিঙে সাংবাদিকক কয়।

তেওঁ লগতে কয়, “মিত্ৰজোঁট নিশ্চিতভাৱে ১০১ শতাংশই নিৰ্বাচনত জয়ী হ’ব।”

Met union minister & @BJP4India incharge for Punjab, Shri @gssjodhpur in New Delhi today to chalk out future course of action ahead of the Punjab Vidhan Sabha elections. We have formally announced a seat adjustment with the BJP for the 2022 Punjab Vidhan Sabha elections. pic.twitter.com/cgqAcpW2MW

— Capt.Amarinder Singh (@capt_amarinder) December 17, 2021

আনহাতে বিজেপিৰ পঞ্জাৱ প্ৰভাৰী গজেন্দ্ৰ সিং শ্বেখাৱতে এটা পৃথক পোষ্টত প্ৰকাশ কৰিছিল যে অমৰিন্দ্ৰৰ সিঙৰ সৈতে আজি সাত পৰ্যায়ৰ আলোচনা অনুষ্ঠিত হৈছে।

উল্লেখ্য পঞ্জাৱ কংগ্ৰেছৰ মুৰব্বী নৱজোৎ সিং সিদ্ধুৰ সৈতে দীৰ্ঘদিনীয়া মতভেদ আৰু দলৰ নেতৃত্বৰ সৈতে সংঘাতৰ পিছত যোৱা মাহত মুখ্যমন্ত্ৰী পদৰ পৰা পদত্যাগ কৰিছিল অমৰিন্দ্ৰৰ সিঙে।

ইয়াৰ কিছুদিন পিছতে প্ৰধান মন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহৰ সৈতে সাক্ষাৎ কৰি এক নতুন ৰাজনৈতিক সমীকৰণৰ ইঙ্গিত দিছিল অমৰিন্দ্ৰৰ সিঙে।