দেশ জুৰি এতিয়া পুনৰ আৰম্ভ হৈছে ক’ৰ’ণাৰ সংহাৰ। ইয়াৰ মাজতে অমৰনাথ যাত্ৰাৰ বাবে সাজু হৈ উঠিছে জম্মু-কাশ্মীৰৰ চৰকাৰ। কাশ্মীৰ চৰকাৰৰ এগৰাকী মুখপাত্ৰই প্ৰকাশ কৰা মতে এইবাৰৰ অমৰনাথ যাত্ৰাত কমেও ৬ লাখ ভক্তৰ সমাগম ঘটিব।
উল্লেখ্য ২০২০ বৰ্ষত অমৰনাথ যাত্ৰা হ’ব নে নাই তাকে লৈ বহু দিন ধৰি চৰকাৰে চিন্তা-চৰ্চা কৰি আছিল।
প্ৰথম অৱস্থাত ২০২০ চনত ২৩ জুনৰ পৰা অমৰনাথ যাত্ৰা হ’ব বুলি কথা ওলাইছিল যদিও সেই তাৰিখ পুনৰ ২১ জুলাইলৈ পিছুৱাই দিয়া বুলি প্ৰচাৰ হৈছিল।
জম্মু-কাশ্মীৰৰ মুখ্য সচিবে অমৰনাথ যাত্ৰাৰ সকলো দিশ চালি-জাৰি চাই সৰ্বাধিক ৫০০ গৰাকী ভক্তইহে অমৰনাথ যাত্ৰাত ভাগ ল’ব পাৰিব বুলি ঘোষণা কৰিছিল।
ইমানৰ পিছতো অমৰনাথ যাত্ৰাক লৈ অনিশ্চয়তা আঁতৰা নাছিল।
সেয়ে সিদ্ধান্ত গ্ৰহণৰ ভাৰ অৰ্পন কৰা হৈছিল শ্ৰীঅমৰনাথ শ্ৰীণ ব’ৰ্ডৰ ওপৰত।
শ্ৰীঅমৰনাথ শ্ৰীণ ব’ৰ্ডে দীৰ্ঘ সময় ধৰি কৰা আলোচনাৰ অন্তত এইবাৰৰ অমৰনাথ যাত্ৰা বাতিল কৰাৰ সিদ্ধান্ত লয়।
অৱশ্যে অমৰনাথ যাত্ৰা কোনো সন্ত্ৰাসবাদীৰ কূটাঘাতৰ আশংকাত বাতিল কৰা হোৱা নাছিল।
মহামাৰী ক’ৰ’ণাৰ সংক্ৰমণৰ আশংকা কৰিয়েই বাতিল কৰা হৈছিল অমৰনাথ যাত্ৰা।
সমুদ্ৰ পৃষ্ঠৰ পৰা ৩ হাজাৰ ৮৮৮ মিটাৰ উচ্চতাত অৱস্থিত অমৰনাথলৈ প্ৰতি বছৰে লাখ লাখ ভক্তই যায়। অৱশ্যে যোৱা বাৰ বাতিল হ’লেও এইবেলি ক’ৰ’ণাতংকৰ মাজতে অমৰনাথ যাত্ৰাৰ সকলো প্ৰস্তুতি সম্পূৰ্ণ কৰি তোলা হৈছে।
এই বেলি অমৰনাথ যাত্ৰা ২৮ জুনৰ পৰা আৰম্ভ হৈ ২২ আগষ্টলৈ চলিব।
