পূৰ্বৰ আৰু বৰ্তমানৰো ভাৰতীয় ক্ৰিকেটাৰসকলৰ অধিকাংশই অধিক পঢ়া-শুনা চলাই যাব পৰা নাছিল। কোনোবাই কেনোমতে স্কুল পাছ কৰিছে। কোনোবাই হয়তো কলেজৰ মুখেই দেখা নাপালে। কিন্তু ইয়াৰ ব্যতিক্ৰমো আছে। কেৱল স্কুল, কলেজ বা উচ্চ শিক্ষাত শিক্ষিতই নহয়, এজন ভাৰতীয় ক্ৰিকেটাৰ আছে যি এগৰাকী ইউপিএছচি উত্তীৰ্ণ বিষয়া। ভাৰতীয় দলত যোগদান কৰাৰ পূৰ্বে তেওঁ অসামৰিক সেৱাৰ পৰীক্ষা ক্লিয়াৰ কৰিছিল।
UPSC Civil Services Exam দেশৰ অন্যতম কঠিন পৰীক্ষা হিচাপে বিবেচিত। যিটোক সাধাৰণতে মানুহে IAS Exam বুলি কয়। প্ৰতি বছৰে হাজাৰ হাজাৰ পৰীক্ষাৰ্থীয়ে ইউ পি এছ চি দিয়ে, কিন্তু দুই এজনেহে সফলতা লাভ কৰে। সেই কেইজনমান মানুহৰ ভিতৰত আছে এগৰাকী ক্ৰিকেটাৰ।
তেওঁ আছিল শচীন তেণ্ডুলকাৰ, সৌৰভ গাংগুলী, ৰাহুল দ্ৰাবিড়, বীৰেন্দ্ৰ সেহৱাগ, অজয় জাডেজাৰ সতীৰ্থ। এবাৰ বিশ্বকাপতো দেশক প্ৰতিনিধিত্ব কৰিছিল।
লগতে পঢ়ক: প্ৰেমে বয়স নামানে! দৰা ৭৯ বছৰীয়া, কইনাৰ বয়স ৩৬; তৃতীয় বিবাহৰ বাবে সাজু জনপ্ৰিয় পপ তাৰকা
ভাৰতীয় ক্ৰিকেটৰ একমাত্ৰ ইউপিএছচি উত্তীৰ্ণ বিষয়া অময় খুৰাছিয়া। ১৯৭২ চনত মধ্যপ্ৰদেশত জন্মগ্ৰহণ কৰা খুৰাছিয়াই ১৭ বছৰ বয়সত প্ৰথম শ্ৰেণীৰ ক্ৰিকেটত অভিষেক ঘটায়। কিন্তু জাতীয় দলৰ জাৰ্চি পিন্ধাৰ পূৰ্বে তেওঁ দেশৰ অন্যতম ডাঙৰ পৰীক্ষা ইউ পি এছ চি চিভিল চাৰ্ভিচ পৰীক্ষাত উত্তীৰ্ণ হয়। উত্তীৰ্ণ হোৱাৰ পিছত তেওঁ কেন্দ্ৰীয় আবকাৰী আৰু শুল্ক বিভাগতো কাম কৰিবলৈ আৰম্ভ কৰে।
কিন্তু অময়ৰ প্ৰথম প্ৰেম আছিল ক্ৰিকেট। পঢ়া-শুনাৰ লগতে মন লগাই ক্ৰিকেট খেলিছিল। মধ্যপ্ৰদেশৰ হৈ প্ৰথম শ্ৰেণীৰ ক্ৰিকেট খেলি অময় খুৰাছিয়াৰ জাতীয় দলত খেলাৰ সপোন ১৯৯৯ চনত বাস্তৱায়িত হয়। অভিষেক মেচখনত খুৰাছিয়াই অৰ্ধশতকীয় ইনিংছ খেলিছিল।
লগতে পঢ়ক: ভাল খবৰ! ভাৰতীয় মহিলা ক্ৰিকেট দলত স্থান লাভ অসম কন্যা উমা ছেত্ৰীৰ
১৯৯৯ চনত শ্ৰীলংকাৰ বিৰুদ্ধে পেপচি কাপত খেলাৰ সুযোগ পাইছিল অময়ে। প্ৰথমখন খেলত ৪৫টা বলত ৫৭ ৰানৰ এক আকৰ্ষণীয় ইনিংছ খেলিছিল। অৱশ্যে তেওঁ নিজৰ ইচ্ছামতে ক্ৰিকেট কেৰিয়াৰ সজাব নোৱাৰিলে। প্ৰথমখন খেলৰ পিছত খুৰাছিয়াই তেনেকৈ দৃষ্টি আকৰ্ষণ কৰিব নোৱাৰিলে। ভাৰতীয় ক্ৰিকেটৰ সৈতে অময় খুৰাছিয়াৰ যাত্ৰা আছিল অতি চুটি।
১৯৯৯ চনৰ বিশ্বকাপত সৌৰভ গাংগুলী, শচীন তেণ্ডুলকাৰৰ সৈতে দেশক প্ৰতিনিধিত্ব কৰিছিল। ২০০১ চনত শ্ৰীলংকাৰ বিৰুদ্ধে শেষ মেচখন খেলিছিল। মাত্ৰ ১২খন এদিনীয়া মেচ খেলাৰ অন্তত অময়ৰ আন্তঃৰাষ্ট্ৰীয় কেৰিয়াৰৰ অন্ত পৰে। এই ১২খন মেচত ৰানৰ সংখ্যা ১৪৯!
কিন্তু অময় খুৰাছিয়াৰ বাবে বিকল্প পথ মুকলি আছিল। কম সময়ৰ ভিতৰতে ক্ৰিকেট কেৰিয়াৰৰ অন্ত পৰাত মধ্যপ্ৰদেশৰ ক্ৰিকেটাগৰাকী পুনৰ পুৰণি জীৱনলৈ উভতি গ’ল। বৰ্তমান তেওঁ ভাৰতীয় শুল্ক আৰু কেন্দ্ৰীয় আবকাৰী বিভাগত কৰ্মৰত।
লগতে পঢ়ক: Creativity: সৃষ্টিশীলতাই দূৰ কৰিব নেতিবাচক চিন্তা আৰু আৱেগ; যি ছয়টা কাৰণে…
অৱশ্যে, ক্ৰিকেটে তেওঁক একেবাৰেই এৰি যোৱা নাই। আই পি এলৰ তাৰকা ৰজত পাটিদাৰ আৰু আবেশ খানৰ মেণ্টৰ আৰু প্ৰশিক্ষক হিচাপে কাম কৰিছিল অময়ে। এইদৰেই খুৰাছিয়াই এনে যুৱ ক্ৰিকেট প্ৰতিভাক তেওঁলোকৰ কেৰিয়াৰ গঢ়ি তোলাত সহায় কৰে।
