২২ জুনৰ পৰা শক্তিপীঠ কামাখ্যা ধামত আৰম্ভ হ’ব অম্বুবাচী মেলা। দেশ–বিদেশৰ লাখ লাখ ভক্তৰ সমাগম হ’বলগীয়া অম্বুবাচী মেলা ২৬ জুনত অন্ত পৰিব। ২২ জুনৰ মাজনিশা হ’ব অম্বুবাচীৰ প্রবৃত্তি আৰু ২৬ জুনৰ পুৱা হ’ব নিবৃত্তি।
এইবাৰ অম্বুবাচী মেলাৰ প্ৰাৰম্ভিক বাজেট ২.৫ কোটি টকা। কালি অৰ্থাৎ ১৮ মে’ত মহানগৰ উপায়ুক্তৰ লগতে অন্যান্য প্ৰতিটো বিভাগৰ বিষয়াই কামাখ্যা ধাম পৰিদৰ্শন কৰে।
আনহাতে ১৭ মে’ত মহানগৰীৰৰ আৱৰ্ত ভৱনত অম্বুবাচী মেলাক লৈ এক গুৰুত্বপূৰ্ণ বৈঠক অনুষ্ঠিত হয়। উক্ত বৈঠকত উপায়ুক্ত বিশ্বজিৎ পেগু, কামাখ্যাৰ দলৈ, পৰিবহন বিষয়াৰ লগতে আৰক্ষীৰ শীৰ্ষ বিষয়াসকল উপস্থিত থাকে।
বৈঠকত বিভিন্ন সময়ত সন্ত্ৰাসবাদীয়ে ভাবুকি প্ৰদান কৰি অহাৰ পৰিপ্ৰেক্ষিতত অনুষ্ঠিত হ’ব লগীয়া অম্বুবাচী মেলাত যাতে কোনো ধৰণৰ কূটাঘাতমূলক কাৰ্যকলাপ সংঘটিত নহয় তাৰ প্ৰতি লক্ষ্য ৰাখি আৰক্ষী তথা প্ৰশাসনে সুৰক্ষাৰ দিশত আলোচনা কৰে।
আৰক্ষীৰ শীৰ্ষ বিষয়াই জনোৱা অনুসৰি এইবাৰ অম্বুবাচী মেলাত বহু পৰিমাণে চিচিটিভি কেমেৰাৰ ব্যৱস্থা কৰাৰ লগতে বহু সংখ্যক নিৰাপত্তাৰক্ষীও নিয়োগ কৰা হ’ব। তাৰোপৰি আটাইকেইটা দিনতে এছ ডি আৰ এফ আৰু এন ডি আৰ এফৰ দলকো নিয়োগ কৰা হ’ব বুলি আৰক্ষী সূত্ৰৰ পৰা জানিব পৰা গৈছে।
