শ্বাহৰুখ খান-মুকেশ আম্বানীয়ে খালে ৩০টকীয়া ORS! আচৰিত হৈ পৰিল নেটিজেন

‘শ্বাহৰুখ খানৰ লগত মোৰ ক’ত সাদৃশ্য আছে জানেনে? শ্বাহৰুখ খানে মোক ফোন নকৰে, মই শ্বাহৰুখক ফোন নকৰোঁ।’-এনে ধেমালি প্ৰায়ে শ্বাহৰুখ অনুৰাগীৰ পৰা শুনা যায়। কেৱল এনেধৰণৰ কৌতুকৰ জৰিয়তে সাদৃশ্য বিচাৰি পোৱাই নহয়, কাপোৰৰ পৰা ভংগীমালৈকে – শ্বাহৰুখ খানক সমগ্ৰ বিশ্বৰ বহু লোকে অনুকৰণ কৰে।

কিন্তু, যদি আপুনি গম পাই শ্বাহৰুখ খানৰ লগত আপোনাৰ এটা মিল আছে, তেন্তে আপোনাৰ কেনে অনুভৱ হ’ব? শেহতীয়াকৈ দেখা পোৱা গৈছে যে শ্বাহৰুখ খানে ৩০ টকাৰ ORS খাইছে। কিন্তু এইক্ষেত্ৰত অকলশৰীয়া নহয়, আন এজন কোটিপতি মুকেশ আম্বানীয়ে ORS খাওঁতে সংগ দিছে। এই কথা পোনপটীয়াকৈ কেমেৰাত ৰেকৰ্ড কৰা হৈছিল, নৰেন্দ্ৰ মোদীৰ শপত গ্ৰহণ অনুষ্ঠানত। ৯ জুনত দিল্লীৰ ৰাষ্ট্ৰপতি ভৱনত এই অনুষ্ঠান উপলক্ষে শ্বাহৰুখ খান আৰু মুকেশ আম্বানী দুয়োজনেই উপস্থিত আছিল।

কিন্তু দেশৰ দুজন ধনী ব্যক্তিয়ে এই সাধাৰণ পানীয় খোৱা দেখি ছ’চিয়েল মিডিয়াত তীব্ৰ প্ৰতিক্ৰিয়া বিয়পি পৰিছে। কোনোবাই লিখিলে, ‘এওঁলোকেও এই অ’আৰএছ খায়!’ আন কোনোবাই ধেমালিতে লিখিছিল, ‘মই এই অ’ আৰ এছ খাব পৰাকৈ ডাঙৰ হ’ব বিচাৰো!’ কোনোৱে লিখিছে, ‘অ’ আৰ এছৰ এই পেকেটটো শীতল পানীয়তকৈ বহুত ভাল। গ্ৰীষ্মকালৰ বাবে একেবাৰেই উপযুক্ত।’