দিল্লীৰ শ্ৰদ্ধা ৱাকাৰ হত্যাই সমগ্ৰ দেশ জোকাৰি থকাৰ সময়তে লাভ জিহাদৰ বিৰুদ্ধে অধিক কঠোৰ আইন প্ৰণয়নৰ হকে সৰব হৈ উঠিছে বিজেপি বিধায়কে।বিজেপি বিধায়ক ৰাজেশ্বৰ সিং। বৃহস্পতিবাৰে উত্তৰ প্ৰদেশৰ মুখ্যমন্ত্ৰী যোগী আদিত্যনাথক জঘন্য অপৰাধৰ সৈতে মোকাবিলা কৰা ৰাজ্যিক আইন সংশোধন কৰিবলৈ সিঙে এখন পত্ৰৰ দ্বাৰা আহ্বান জনায়। শেহতীয়াকৈ দিল্লীত এগৰাকী যুৱতীক তেওঁৰ আন্তঃধৰ্মীয় প্ৰেমিকে কৰা নৃশংস হত্যাৰ পৰিপ্ৰেক্ষিতত ‘লাভ জিহাদ’ৰ বিৰুদ্ধে কঠোৰ শাস্তিৰ পোষকতা কৰে বিধায়কজনে। শ্ৰদ্ধা ৱাকাৰ হত্যাকাণ্ডৰ বিচাৰ ফাষ্ট ট্ৰেক আদালতত কৰা, অভিযুক্তক জামিন নিদিয়া, ধৰ্ষণ আৰু হত্যাৰ বাবে মৃত্যুদণ্ডৰ উপৰি সাক্ষীসকলক বিশেষ সুৰক্ষা প্ৰদান কৰা আদি বিষয়সমূহত জোৰ দিবলৈ বিধায়ক সিঙে আদিত্যনাথক আহ্বান জনায়।
ফৌজদাৰী প্ৰক্ৰিয়াগত আইনৰ সংশোধনৰ দাবী জনাই সিঙে কয় যে ‘লাভ জিহাদ’ৰ ক্ষেত্ৰত প্ৰলোভনৰ সংজ্ঞা বহল কৰাৰ প্ৰয়োজন আছে আৰু ইয়াত বিবাহ বা দাম্পত্য সম্পৰ্কৰ প্ৰতিশ্ৰুতি বা সেই সম্পৰ্কৰ মাজত বাস কৰাসকললকো অন্তৰ্ভুক্ত কৰিব লাগে । বিধায়কজনে আদিত্যনাথলৈ লিখা পত্ৰৰ এটা প্ৰতিলিপি কেন্দ্ৰীয় আইন মন্ত্ৰী কিৰেন ৰিজিজুলৈও প্ৰেৰণ কৰিছে।।শাসকীয় দলৰ বিধায়কজনে পত্ৰখনত উল্লেখ কৰিছে” দিল্লী চহৰত এজন মুছলমান ব্যক্তিয়ে তেওঁৰ হিন্দু প্ৰেমিকাক নিৰ্মমভাৱে হত্যা কৰি মৃতদেহ ৩৫ টুকুৰা কৰি কাটি দিয়াৰ ঘটনাই শেহতীয়াকৈ সমগ্ৰ দেশত হোৱা ‘লাভ জিহাদ’ অপৰাধৰ কথা মনত পেলাই দিয়ে” ।
বিধায়কজনে কয় যে আইনসভাৰ জৰিয়তে আইনখন সংশোধন কৰাটো প্ৰয়োজনীয়, যিদৰে অতীতত কৰা হৈছিল “মহিলাৰ সুৰক্ষা নিশ্চিত কৰিবলৈ আৰু ইয়াৰ দ্বাৰা ৰাজহুৱা শৃংখলা বজাই ৰখাৰ বাবে” এনে কৰাটো প্ৰয়োজনীয় হৈ পৰিছে বুলি সিঙে পত্ৰখনত উল্লেখ কৰে।।
সিঙে দিল্লীৰ শ্ৰদ্ধা ৱালকাৰ (২৭)ৰ হত্যাৰ কথা পত্ৰ খনত বিশেষভাবে উল্লেখ কৰে। বিজেপি বিধায়কগৰাকীয়ে কয়, “ভৱিষ্যতে এনে ধৰণৰ অপৰাধৰ পুনৰাবৃত্তি যাতে নহয় তাৰ বাবে আমি তদন্ত আৰু বিচাৰৰ বাবে সময়সীমা নিৰ্ধাৰিত কৰাটো প্ৰয়োজনীয়। যাতে অপৰাধ পঞ্জীয়ন আৰু তাৰ পিছত ৬০ দিনৰ ভিতৰত তদন্ত সম্পূৰ্ণ হয় আৰু ৬০ দিনৰ ভিতৰত বিচাৰ সম্পূৰ্ণ কৰিব পৰা যায়”।
