দেশৰ নিৰাপত্তা সংস্থাই এক চিনেমাৰ কাহিনীৰ দৰে অভিযান চলাই কলকাতা, দিল্লী আৰু লক্ষ্ণৌ বিমানবন্দৰৰ পৰা সাতজন বিদেশী নাগৰিকক গ্ৰেপ্তাৰ কৰিছে। ইয়াৰ ভিতৰত আটাইতকৈ চৰ্চিত নামটো হৈছে আমেৰিকাৰ মেথিউ এৰন ভেনডাইক। ভেনডাইকৰ সৈতে গ্ৰেপ্তাৰ হোৱা আন ছয়জন লোক ইউক্ৰেইনৰ নাগৰিক। তেওঁলোকক ক্ৰমে পেট্ৰ’ হাৰ্বা, তাৰাছ স্লিভিয়াক, ইভান চুকমান’ভস্কি, মেৰিয়ান ষ্টেফানকিভ, মাকচিম হ’নচাৰুক আৰু ভিক্টৰ কামিনস্কি বুলি চিনাক্ত কৰা হৈছে। যোৱা ১৩ মাৰ্চত এই গ্ৰেপ্তাৰৰ পাছত দিল্লীৰ পাটিয়ালা হাউছ ক’ৰ্টে তেওঁলোকক ১১ দিনৰ বাবে এনআইএৰ জিম্মালৈ প্ৰেৰণ কৰিছে।
এই সমগ্ৰ ঘটনাটোৱে এতিয়া আন্তঃৰাষ্ট্ৰীয় পৰ্যায়ত খলকনি তুলিছে। এনআইএৰ তথ্য অনুসৰি, এই গোটটোৱে ভাৰতৰ কোনো বৈধ অনুমতি অবিহনে মিজোৰাম ভ্ৰমণ কৰিছিল আৰু তাৰ পৰা অবৈধভাৱে ম্যানমাৰত প্ৰৱেশ কৰিছিল। উত্তৰ-পূব ভাৰতৰ বহু কেইখন ৰাজ্যত বিদেশী নাগৰিকৰ প্ৰৱেশৰ বাবে বিশেষ অনুমতিৰ প্ৰয়োজন হয় যদিও এই সাতজন লোকে সেই নিয়ম উলংঘা কৰিছিল। তেওঁলোকে ম্যানমাৰত সশস্ত্ৰ বিদ্ৰোহী গোটসমূহক সামৰিক প্ৰশিক্ষণ দিয়াৰ লগতে অস্ত্ৰ যোগান ধৰাৰ পৰিকল্পনা কৰিছিল বুলি অভিযোগ উত্থাপন হৈছে। এনআইএৰ মতে, উত্তৰ-পূবৰ বিদ্ৰোহী সংগঠনৰ সৈতে সম্পৰ্ক থকা এই গোটসমূহক তেওঁলোকে আধুনিক ড্ৰ’ন যুদ্ধ আৰু জামিং প্ৰযুক্তিৰ প্ৰশিক্ষণ দিবলৈ চেষ্টা কৰিছিল।
গ্ৰেপ্তাৰ হোৱা মেথিউ ভেনডাইক বিশ্বৰ বিভিন্ন যুদ্ধক্ষেত্ৰত ভাড়াতীয়া সৈনিক হিচাপে কাম কৰাৰ বাবে কুখ্যাত। ২০১১ চনত লিবিয়াৰ গৃহযুদ্ধত গাদ্দাফি চৰকাৰৰ বিৰুদ্ধে যুঁজ দি তেওঁ প্ৰথমে চৰ্চালৈ আহিছিল। ইয়াৰ পাছত তেওঁ ইৰাকত আই এছৰ বিৰুদ্ধে আৰু ছিৰিয়াৰ বিদ্ৰোহত সক্ৰিয়ভাৱে অংশ লৈছিল। শেহতীয়াকৈ ৰাছিয়া-ইউক্ৰেইন যুদ্ধৰ সময়তো তেওঁ ইউক্ৰেইনৰ সামৰিক বাহিনীক ড্ৰ’ন চলোৱা আৰু যুদ্ধৰ কৌশলৰ প্ৰশিক্ষণ দিছিল। তেওঁক এজন তথ্যচিত্ৰ নিৰ্মাতা আৰু নিৰাপত্তা বিশ্লেষক হিচাপেও জনা যায়।
বৰ্তমান এনআইএৰ তদন্তত পোহৰলৈ আহিছে যে এই বিদেশী গোটটোৱে ম্যানমাৰৰ পৰা ভাৰতৰ নিৰাপত্তাৰ প্ৰতি ভাবুকি কঢ়িয়াই অনাৰ এক বৃহৎ ষড়যন্ত্ৰত লিপ্ত আছিল। ইউৰোপৰ পৰা আমদানি কৰা ড্ৰ’ন আৰু আধুনিক যুদ্ধ সঁজুলিৰে তেওঁলোকে সীমান্তত এক বিপদজনক পৰিৱেশ সৃষ্টি কৰাৰ লক্ষ্য লৈছিল। বৰ্তমান এই সাতজন অভিযুক্ত এনআইএৰ জিম্মাত আছে আৰু তেওঁলোকৰ এই অভিযানৰ আঁৰত কোন কোন ডাঙৰ শক্তি জড়িত হৈ আছে, সেই বিষয়ে অধিক তথ্য লাভ কৰিবলৈ জেৰা অব্যাহত ৰখা হৈছে।
