যোৱাটো ডিচেম্বৰ মাহত আন্তৰ্জাতিক ছেটেলাইট ব্যস্ত হৈ পৰাৰ পাছত হঠাতে অসমৰ পূব প্ৰান্তৰ তিনিচুকীয়া চহৰখনে বিশ্বৰ সুৰক্ষা সংস্থাসমূহৰ দৃষ্টি আকৰ্ষণ কৰিছে।
সংবাদ মাধ্যমৰ বাতৰি অনুসৰি, যোৱা ডিচেম্বৰৰ প্ৰথম সপ্তাহত এছীয়-আফ্ৰিকীয় অঞ্চলটোৰ বনাঞ্চলৰ মানচিত্ৰ লৈ থাকোতে আমেৰিকাৰ এটা ছেটেলাইটে তিনিচুকীয়া ৰেইলৱে ষ্টেশ্যনৰ সমীপৰ একাংশ বনাঞ্চলৰ ছবি প্ৰেৰণ কৰিছিল।
উক্ত ছবিক ইন্টাৰনেশ্যনেল বেলাষ্টিক মিছাইল (আই চি বি এম)ৰ আৱৰ্তিত ভাণ্ডাৰ বুলি বাখ্যা কৰা হৈছে।
আই চি বি এম হৈছে নিম্নতম ৫,৫০০ কিলোমিটাৰ দূৰত্ব ভেদিব পৰা এবিধ লক্ষ্যভেদি বেলাষ্টিক মিছাইল।
আই চি বি এম ব্যৱহাৰকাৰী দেশসমূহৰ মাজত আছে আমেৰিকা যুক্তৰাষ্ট্ৰ, চীন, ৰাছিয়া, ভাৰত, উত্তৰ কোৰিয়া আৰু ইৰান।
কিন্তু প্ৰশ্ন হৈছে তিনিচুকীয়া ৰেইলৱে ষ্টেশ্যনৰ সমীপৰ বনাঞ্চলত এনেকুৱা এটা ভাণ্ডাৰ ভাৰতে লুকাই ৰাখিছেনে?
প্ৰতিবেদন অনুসৰি, আমেৰিকান ছেটেলাইটে ছবিখন গ্ৰহণ কৰাৰ পাছত ৰাছিয়া আৰু চীনেও তেওঁলোকৰ ছবি ধৰা পেলোৱা প্ৰযুক্তি ব্যৱহাৰ কৰাত তিনিচুকীয়াক লৈ বিদেশী ছেটেলাইটৰ কাৰ্যকলাপত ভাৰতীয় কৰ্তৃপক্ষ তথা মহাকাশ সংস্থা বিমোৰত পৰিছে।
প্ৰতিবেদনত লগতে কোৱা হৈছে যে বিদেশী ছেটেলাইটৰ অত্যধিক কাৰ্যকলাপৰ পাছত ডিফেন্স ইন্টেলিজেন্স এজেন্স (ডি আই এ), নেশ্যনেল ইনভেষ্টিগেশ্যন এজেন্সি (এন আই এ), প্ৰতিৰক্ষা মন্ত্ৰালয় আৰু সুৰক্ষা বিষয়ক কেবিনেট সমিতিয়েও বিষয়টোত জড়িত হৈ পৰিছে।
প্ৰতিবেদনটোত কোৱা অনুসৰি এক তদন্তই সদৰী কৰিছে যে তাত তিনিচুকীয়া ৰেইলৱে ষ্টেশ্যনৰ সমীপৰ বনাঞ্চলত প্ৰকৃততে এটা গোপন ভাণ্ডাৰ বা ৰেইক আছে।
প্ৰতিবেদন প্ৰকাশ পোৱা মতে ১৯৭৬ চনত এটা ৰেইক তিনিচুকীয়া ৰেইলৱে ষ্টেশ্যনলৈ অনা হৈছিল।
সেইটো তিনিচুকীয়া ৰেইলৱে ষ্টেশ্যনৰ কেইমিটাৰমান আঁতৰত ৰখা হৈছিল।
কিন্তু ৰেইকটো তিনিচুকীয়ালৈ অনাৰ দিনা প্ৰবল বৰষুণৰ ফলত অঞ্চলটোত প্লাৱিত হৈ পৰে।
বানৰ পানীয়ে আনকি ৰেইল ষ্টেশ্যনটোও পানীৰে বুৰাই পেলাইছিল।
প্ৰতিবেদনত কোৱা হৈছে যে ৰেইকটো ৰখা অঞ্চলটো পাচলিৰ খেতিৰে ভৰি আছিল আৰু ৰেইকটোৰ বিষয়ে জনা লোকসকলৰ উচ্ছেদ কৰি চহৰখনৰ পৰা বাহিৰলৈ প্ৰেৰণ কৰা হৈছিল।
আমেৰিকান ছেটেলাইটে যোৱা মাহত ইয়াৰ ছবি গ্ৰহণ কৰা সময়লৈকে বিষয়টো সম্পৰ্কে পুনৰ কেতিয়াও আলোচনা হোৱা নাছিল।
উক্ত ঘটনাটো আনুষ্ঠানিকভাৱে এতিয়াও পৰীক্ষণ কৰা হোৱা নাই বুলি প্ৰতিবেদনত কোৱা হৈছে।
“নৰ্থইষ্ট নাও’ৱে ৰেইলৱেৰ বিষয়াৰ এই বিষয়ত মন্তব্য বিচাৰিছিল যদিও যোগাযোগ নাপালে।
আনহাতে, এই প্ৰতিবেদনটো প্ৰকাশ পোৱাৰ পাছতে প্ৰতিক্ৰিয়া প্ৰকাশ কৰি উত্তৰ-পূব সীমান্ত ৰেইলৱেই ইয়াৰ টুইটাৰ হেণ্ডলত লিখিছে: ‘’ বাতৰিটো নিশ্চিত কৰিবৰ বাবে আমাৰ হাতত কোনো পৰ্যাপ্ত তথ্য নাই। বাতৰিত উল্লেখ কৰা ধৰণে ৰেইলৱের তদন্তৰ বিষয়ে আমাৰ কোনো ধাৰণা নাই।‘’