দুৰ্নীতিৰ দোহাই দি অভিলাসী অপাৰেচন ল’টাছ অভিযান কাৰ্যকৰী কৰাৰ চেষ্টাত ব্ৰতী বিজেপিৰ প্ৰত্যাহ্বানে সৃষ্টি কৰা শেহতীয়া ৰাজনৈতিক অস্থিৰতাৰ মাজতে আজি সংখ্যাগৰিষ্ঠতাৰ পৰীক্ষাত অৱতীৰ্ণ হ’ব ঝাৰখণ্ডৰ শাসকীয় ঝাৰখণ্ড মুক্তি মৰ্চা (জেএমএম) নেতৃত্বাধীন মিত্ৰজোঁটৰ চৰকাৰ।
বিজেপিৰ এই অপাৰেচন ল’টাছ অভিযান ৰোধ কৰিবলৈ যৎপৰোনাস্তি চেষ্টা কৰা ৰাজ্যখনৰ মুখ্যমন্ত্ৰী হেমন্ত চোৰেনৰ সন্মুখত আজিৰ এই সংখ্যাগৰিষ্ঠতাৰ পৰীক্ষা যথেষ্ট গুৰুত্বপূৰ্ণ হৈ পৰিছে।
শাসনাধিষ্ঠ ঝাৰখণ্ড মুক্তি মৰ্চা (জেএমএম) নেতৃত্বাধীন মিত্ৰজোঁটৰ চৰকাৰৰ বিৰুদ্ধে শেহতীয়াকৈ ধাৰাবাহিকভাৱে দুৰ্নীতিৰ অভিযোগ তুলি আহিছে ৰাজ্যৰ প্ৰধান বিৰোধী দল বিজেপিয়ে।
মুখ্যমন্ত্ৰী চোৰেনে নিজৰ ক্ষমতাৰ অপব্যৱহাৰ কৰি শিলৰ খনিৰ লীজ নিজৰ নামত কৰাৰ গুৰুতৰ অভিযোগ উত্থাপন কৰিছিল ঝাৰখণ্ডৰ প্ৰাক্তন মুখ্যমন্ত্ৰী তথা বিজেপি নেতা ৰঘূবৰ দাসে।
ইয়াৰ দ্বাৰা চোৰেনে নিৰ্বাচনৰ নিয়ম উলংঘা কৰিছে বুলি অবিযোগ কৰি হেমন্ত চোৰেনক বিধায়ক হিচাপে অযোগ্য ঘোষণাৰ দাবী তুলিছিল বিৰোধী দলটোৱে। লগতে মুখ্যমন্ত্ৰী চোৰেনক নৈতিকতাৰ ভিত্তিত পদত্যাগ কৰিবলৈ দাবী জনাইছে বিজেপিয়ে।
সমসাময়িকভাৱে বিজেপিয়ে শাসকীয় দলটোৰ বিধায়কক দলত্যাগৰ বাবে প্ৰৰোচিত কৰা চৰকাৰ উৎখাত কৰাৰো চেষ্টা চলায়। চৰকাৰ পতনৰ আশংকাত মিত্ৰজোঁটৰ চৰকাৰৰ ৩১ গৰাকী বিধায়কক কংগ্ৰেছ শাসিত ছত্তীশগড়লৈ পলুৱাই পঠাব লগীয়া পৰিস্থিতিৰো সৃষ্টি হয়।
মুখ্যমন্ত্ৰী চোৰেন তথা শাসনাধিষ্ঠ চৰকাৰে বিজেপিয়ে মহাৰাষ্ট্ৰ, মধ্য প্ৰদেশ আৰু কৰ্ণাটকৰ আৰ্হি অনুসৰণ কৰি ঝাৰখণ্ডতো এনে ৰাজনৈতিক সংকটৰ সৃষ্টি কৰি শাসকীয় মিত্ৰজোঁটৰ বিধায়কসকলক দলত্যাগৰ বাবে প্ৰলোভিত কৰাৰ অভিযোগ উত্থাপন কৰিছে।
এনে ৰাজনৈতিক অস্থিৰতাৰ মাজতে মুখ্যমন্ত্ৰী হেমন্ত চোৰেনে আজি ঝাৰখণ্ড বিধানসভাৰ এখন বিশেষ এদিনীয়া অধিৱেশনত আস্থা ভোটত অৱতীৰ্ণ হ’ব। ইতিমধ্যে এই উদ্দেশ্যে কলি শাসকীয় মিত্ৰজোঁটৰ বিধায়কসকল ছত্তীশগড়ৰ পৰা এক বিশেষ বিমানত ৰাজ্যৰ ৰাজধানী ৰাঁচীত উপস্থিত হৈছে।
আস্থা ভোটত অৱতীৰ্ণ হোৱাৰ পূৰ্বে কালি হেমন্ত চোৰেনে কালি বিধায়কসকলৰ সৈতে এখন বৈঠকো আহ্বান কৰিছিল।
ইফালে নিৰ্বাচন আয়োগেও ইতিমধ্যে ৰাজ্যখনৰ ৰাজ্যপালৰ ওচৰত নিজৰ প্ৰতিবেদন দাখিল কৰিছে। যিকোনো সময়তে ৰাজ্যপালে শাসকী চৰকাৰ তথা চোৰেনৰ সন্দৰ্ভত সিদ্ধান্ত ঘোষণা কৰাৰ সম্ভাৱনা আছে।
উল্লেখ্য যে ৮১ জনীয়া ঝাৰখণ্ড বিধানসভাত শাসকীয় মিত্ৰজোঁটৰ ৪৯ জন বিধায়ক। অৰ্থাৎ সংখ্যাগৰিষ্ঠতাৰ বাবে প্ৰয়োজনীয় ৪১ গৰাকী বিধায়কৰ সমৰ্থন চোৰেনৰ সৈতে আছে।
এই ৪৯ গৰাকী বিধায়কৰ ভিতৰত ঝাৰখণ্ড মুক্তি মৰ্চাৰ ৩০ জন, কংগ্ৰেছৰ ১৮ জন আৰু ৰাষ্ট্ৰীয় জনতা দলৰ (আৰজেডি) এজন বিধায়ক আছে। আনহাতে প্ৰধান বিৰোধী দল বিজেপিৰ আছে ২৬ জন বিধায়ক।