মণিপুৰত চলিত ৰাজনৈতিক নাটকৰ মাজতে চি বি আয়ে মঙলবাৰে ৩৩২কোটি টকা আত্মসাতৰ অভিযোগ সন্দৰ্ভত সোধ-পোচৰ বাবে প্ৰাক্তন মুখ্য মন্ত্ৰী অ’ক্ৰাম ইব’বি সিঙক চমন জাৰি কৰিছে।
চি বি আয়ে সিঙৰ লগতে মণিপুৰ ডিভেলপমেণ্ট চ’চাইটিৰ তিনিগৰাকী প্ৰাক্তন সঞ্চালক ডি এছ পুনিয়া, পি চি লাউমুংখা আৰু অ’ নৱকিশোৰ সিঙকো ইয়াৰ সন্মুখত হাজিৰ হোৱাৰ নিৰ্দেশ দিছে।
ইববি সিঙক তেওঁ মণিপুৰ ডিভেলপমেণ্ট চ’চাইটিৰ অধ্যক্ষ থকা অৱস্থাত ২০০৯ৰ পৰা ২০১৭ চনৰ ভিতৰত উন্নয়নৰ ধন আত্মসাতত তেওঁৰ ভূমিকা সন্দৰ্ভত সোধ-পোচৰ বাবে চি বি আই কাৰ্য্যালয়ত হাজিৰ হোৱাৰ নিৰ্দেশ দিয়া হৈছে।
চি বি আইৰ এটা দল ইম্ফালত সিং আৰু আনসকলক বুধবাৰে সোধ-পোচৰ বাবে ইতিমধ্যে ইম্ফালত আহি উপস্থিত হৈছে।
ৰাজ্যখনৰ বিজেপি নেতৃত্বাধীন চৰকাৰখনৰ অনুৰোধত যোৱা ২০ নৱেম্বৰত চি বি আয়ে উক্ত গোচৰটো তদন্তৰ বাবে লৈছিল।
তাৎপৰ্য্যপূৰ্ণভাৱে কংগ্ৰেছে ৰাজ্যখনত চৰকাৰ গঠনৰ দাবী উত্থাপন কৰাৰ সময়তে চি বি আয়ে প্ৰাক্তন মুখ্য মন্ত্ৰীজনক সোধ-পোচৰ বাবে চমন জাৰি কৰিছে।
শেহতীয়াকৈ নগৰাকী বিধায়কে বিজেপি নেতৃত্বাধীন চৰকাৰখনৰ প্ৰতি নিজৰ সমৰ্থন প্ৰত্যাহাৰ কৰিছিল।
শাসক বিজেপিৰ তিনিগৰাকী বিধায়কৰ পদত্যাগ আৰু এন পি পি আৰু তৃণমূল কংগ্ৰেছৰ বিধায়কৰ সমৰ্থন প্ৰত্যহাৰৰ পিছতে এন বীৰেন সিং চৰকাৰখন সংখ্যালঘু হোৱা বুলি দাবী কৰি কংগ্ৰেছে চৰকাৰ গঠনৰ দাবী উত্থাপন কৰিছিল।
