সংসদত সংবিধান সন্দৰ্ভত আলোচনা চলি থকাৰ সময়ত কেন্দ্ৰীয় গৃহমন্ত্ৰী অমিত শ্বাহে সংসদত বিৰোধী দলপতি ৰাহুল গান্ধীক কটাক্ষ কৰে। গান্ধীৰ বয়স আঙুলিয়াই দি শ্বাহে কয় যে ৫৪ বছৰীয়া ব্যক্তিজনে নিজকে ডেকা বুলি দাবী কৰে।
সংবিধানৰ ৭৫ বছৰীয়া জয়ন্তী উপলক্ষে সংসদত অনুষ্ঠিত বিতৰ্ক অধিৱেশনত অংশগ্ৰহণ কৰে অমিত শ্বাহে। তাত ভাষণ দি থাকোঁতে গৃহমন্ত্ৰীয়ে ৰাহুল গান্ধীক লক্ষ্য কৰি লয়।
শ্বাহে কয় – “সংবিধানৰ ভুৱা কপি লৈ ঘূৰি ফুৰা বুলি মানুহে গম পোৱাৰ বাবেই কংগ্ৰেছে নিৰ্বাচনত পৰাস্ত হৈছিল।”
তাৰ পাছত ৰাহুল গান্ধীৰ নাম নোলোৱাকৈয়ে শ্বাহে কয়, “যুৱ বুলি দাবী কৰা ৫৪ বছৰীয়া নেতাই হাতত সংবিধান লৈ ঘূৰি ফুৰে আৰু বিজেপিয়ে সংবিধান সলাব খোজা বুলি দাবী কৰে। মই তেওঁলোকক জনাব বিচাৰো যে সংবিধান সলনি কৰাৰ ব্যৱস্থা সংবিধানত আছে।”
এই সন্দৰ্ভত সংবিধানৰ ৩৬৮ নং অনুচ্ছেদৰ কথা উল্লেখ কৰি শ্বাহে কয় যে এই দফাটোৱেই হৈছে সংবিধানৰ সংশোধনীৰ ব্যৱস্থা।
পুনৰ কংগ্ৰেছ আক্ৰমণৰ লক্ষ্য কৰি শ্বাহে কয় – কংগ্ৰেছে কেন্দ্ৰত ক্ষমতাত থকাৰ সময়ত সংবিধানত যিমান সংশোধনী কৰিছিল তাতকৈ বিজেপিয়ে কমকৈ সংবিধান সংশোধনী কৰিছে। বিজেপিয়ে ১৬ বছৰৰ শাসনকালত সংবিধানত ২২টা সংশোধনী কৰিলে। আনহাতে, কংগ্ৰেছে ৫৫ বছৰৰ শাসনকালত সংবিধানৰ ৭৭টা সংশোধনী কৰিছিল। ইন্দিৰা গান্ধীৰ দিনত কংগ্ৰেছে অনা পৰিৱৰ্তনক লৈ প্ৰশ্ন উত্থাপন কৰি শ্বাহে কয়, এই পৰিৱৰ্তনৰ উদ্দেশ্য কি আছিল, গণতন্ত্ৰক শক্তিশালী কৰা নে ক্ষমতাত থকাৰ লোভ?
মন কৰিবলগীয়া যে নিৰ্বাচনী প্ৰচাৰৰ সময়ত ৰাহুল গান্ধীয়ে বাৰে বাৰে সংবিধানৰ প্ৰতিলিপি হাতত লৈ থকা দেখা গৈছিল। কিন্তু পিছত দেখা গ’ল যে ৰাহুল গান্ধীয়ে লৈ ফুৰা সংবিধান খনৰ ভিতৰত কেৱল খালী কাগজহে আছিল।
কেৱল সেয়াই নহয়, সংসদত কংগ্ৰেছক আক্ৰমণ কৰিবলৈ আম্বেদকাৰৰ বিষয়টোও উত্থাপন কৰিলে শ্বাহে। তেওঁ কয়, ‘আম্বেদকাৰ’ শব্দটো কংগ্ৰেছৰ বাবে ফেশ্বনেবল হৈ পৰিছে। শব্দত তেওঁলোকে কয় আম্বেদকাৰ, আম্বেদকাৰ কিন্তু বাস্তৱত তেওঁলোকৰ হৃদয়ত আম্বেদকাৰৰ অস্তিত্ব নাই।
