ঠিক পাঁচ বছৰৰ আগতে কেন্দ্ৰীয় গৃহমন্ত্ৰী অমিত শ্বাহ বিধানসভা নিৰ্বাচনৰ প্ৰচাৰৰ বাবে অসমলৈ আহিছিল। সেই সময়ত তেওঁ আশ্বাস দিছিল যে বিজেপি পুনৰ ক্ষমতালৈ আহিলে অসমক ‘বানমুক্ত’ ৰাজ্য হিচাপে গঢ়ি তোলা হ’ব৷
তেওঁ কৈছিল, ‘বিজেপিক আৰু পাঁচ বছৰ দিয়ক, ইয়াত আৰু কেতিয়াও বানপানী নহ’ব৷ বিজেপি পুনৰ ক্ষমতালৈ আহিল, আৰু পাঁচ বছৰ পাৰ হৈ গ’ল৷ কিন্তু উত্তৰ-পূব ভাৰতৰ এই বৃহত্তম ৰাজ্যখনৰ বান সমস্যা এতিয়াও সমাধান হোৱা নাই।
তাৰ মাজতে দুৱাৰত টোকৰ মাৰিছে বিধানসভা নিৰ্বাচন। ইয়াৰ পূৰ্বে শুকুৰবাৰে কাছাৰত এখন ৰাজহুৱা সভাত শ্বাহে কয় যে, ‘বিগত দহ বছৰত বিজেপিয়ে অসমৰ উন্নয়ন সুনিশ্চিত কৰিছে। অহা পাঁচ বছৰত এই ৰাজ্যখনক ‘বানমুক্ত’ কৰা হ’ব।’
গৃহমন্ত্ৰীৰ এই বক্তব্যৰ পিছত প্ৰশ্ন উত্থাপন হৈছে, তেন্তে যোৱা পাঁচ বছৰত অসমৰ বিজেপি চৰকাৰে বান নিয়ন্ত্ৰণৰ বাবে কি কৰিলে? এই ক্ষেত্ৰত নিজৰ ব্যৰ্থতা ঢাকিবলৈ আৰু পাঁচ বছৰৰ সময় বিচাৰিছে নেকি?
অৱশ্যে কেৱল শ্বাহেই নহয়, প্ৰধানমন্ত্ৰী নৰেন্দ্ৰ মোদীয়েও যোৱা সপ্তাহত অসম ভ্ৰমণ কৰি বিজেপিক বিদেশীমুক্ত অসম গঢ়াৰ বাবে আৰু পাঁচ বছৰৰ সময় দিব লাগে বুলি মন্তব্য কৰে। কিন্তু ২০১৬ চনৰ বিধানসভা নিৰ্বাচনৰ পূৰ্বেও বিজেপিয়ে দাবী কৰিছিল যে যদি তেওঁলোক ক্ষমতালৈ আহে তেন্তে অসম বিদেশী বিশেষকৈ বাংলাদেশীমুক্ত কৰা হ’ব।
পুনৰ এই অনুপ্ৰৱেশ বিষয়ত কংগ্ৰেছক আক্ৰমণ কৰিছে শ্বাহে। তেওঁ দাবী কৰে যে কংগ্ৰেছে দেশৰ সকলো সীমান্ত মুকলি কৰি ৰাখিছিল। ফলত অসমত মুক্ত অনুপ্ৰৱেশ ঘটিছিল। অনুপ্ৰৱেশৰ বিৰুদ্ধে মুখ্যমন্ত্ৰী হিমন্ত বিশ্ব শৰ্মাৰ নেতৃত্বত বিজেপি চৰকাৰে ফলপ্ৰসূ ভূমিকা পালন কৰিছে।
শ্বাহে লগতে অভিযোগ কৰে যে অসমত কংগ্ৰেছৰ শাসন কালত কাছাৰত কোনো ধৰণৰ উন্নতি হোৱা নাছিল। কেন্দ্ৰীয় গৃহমন্ত্ৰীগৰাকীয়ে এই কাৰ্যসূচীৰ পৰাই কেইবাটাও প্ৰকল্পৰ শুভাৰম্ভ কৰে।
