হাৰিয়ানাত ২০২৪ চনৰ লোকসভা নিৰ্বাচনৰ প্ৰচাৰ আৰম্ভ কৰিছে কেন্দ্ৰীয় গৃহমন্ত্ৰী অমিত শ্বাহে।
মোডী চৰকাৰে কৰা উন্নয়নৰ আধাৰত নৰেন্দ্ৰ মোডীক তৃতীয় কাৰ্যকালৰ বাবে প্ৰধানমন্ত্ৰী হিচাপে নিৰ্বাচিত কৰিবৰ বাবে বিজেপিক ভোট দিবলৈ আহ্বান জনাই ভাষণ প্ৰদান কৰিছে কেন্দ্ৰীয় গৃ্হমন্ত্ৰীগৰাকীয়ে। হাৰিয়ানাৰ শোনিপট জিলাৰ গোহানা চহৰত শ্বাহৰ ৰাজহুৱা অনুষ্ঠিত হোৱা অনুষ্ঠানটোত বেয়া বতৰৰ বাবে উপস্থিত থাকিব নোৱাৰিলে অমিত শ্বাহে।
অৱশ্যে নিজে উপস্থিত থাকিব নোৱাৰিলেও ফোনযোগে চমু ভাষণ প্ৰদান কৰি হাৰিয়ানাৰ জনসাধাৰণক ২০২৪ চনৰ লোকসভা নিৰ্বাচনত বিজেপিক ভোট দিবলৈ আহ্বান জনালে অমিত শ্বাহে।
“আমি সকলোৱে মিলি নৰেন্দ্ৰ মোডী জীক পুনৰ প্ৰধানমন্ত্ৰী হিচাপে নিৰ্বাচিত কৰিম। মোৰ বিশ্বাস যে এইবাৰ প্ৰতিখন লোকসভাৰ আসনত বিজেপিৰ পদুম ফুলি উঠিব।” –ভাষণত এইদৰে ক’লে গৃহমন্ত্ৰী গৰাকীয়ে।
সমাৱেশত ৰাইজৰ সৈতে হোৱা কথা-বতৰাত হাৰিয়ানাৰ মুখ্যমন্ত্ৰী মনোহৰ লাল খট্টৰে ঘোষণা কৰে যে বেয়া বতৰৰ বাবে হেলিকপ্টাৰক উৰণৰ অনুমতি নিদিয়াৰ বাবে শ্বাহ আহিব নোৱাৰিলে। গতিকে কেন্দ্ৰীয় গৃ্হমন্ত্ৰীক ফোনযোগে সভাক সম্বোধন কৰিবলৈ পৰামৰ্শ দিয়ে খট্টৰে।
এইদৰে এতিয়াৰ পৰাই ২০২৪ ৰ লোকসভাৰ নিৰ্বাচনৰ বাবে সাজু হৈছে বিজেপি দল। আনহাতে আন আন বিৰোধী ৰাজনৈতিক শক্তি সমূহেও নিজকে প্ৰস্তুত কৰিছে ২০২৪ চনৰ লোকসভাৰ নিৰ্বাচনৰ বাবে।