আন্তঃৰাষ্ট্ৰীয় স্বীকৃতি প্রাপ্ত অসমীয়া গ্রাফিক ডিজাইনাৰ অমূল্য বৰুৱাই শনিবাৰে লণ্ডনস্থিত নিজ বাসগৃহত শেষ নিশ্বাস ত্যাগ কৰে। আজি গুৱাহাটীত পৰিয়ালৰ সূত্ৰই শিল্পীগৰাকীৰ মৃত্যুৰ তথ্য সদৰি কৰে।
মৃত্যুৰ সময়ত তেওঁৰ বয়স আছিল ৭৫ বছৰ। তৈল নগৰী ডিগবৈত জন্মগ্ৰহণ কৰা অমূল্য বৰুৱাৰ গ্ৰাফিক ডিজাইনৰ ক্ষেত্ৰত বিশ্বজুৰি স্বীকৃতি লাভৰ যাত্ৰা আছিল যথেষ্ট ৰোমাঞ্চকৰ আৰু অনুপ্ৰেৰনাদায়ক। কটন কলেজৰ পৰা বিজ্ঞানৰ স্নাতক ডিগ্ৰী আহৰণ কৰা প্ৰয়াত বৰুৱা আছিল মুম্বাইৰ ছাৰ জে জে স্কুল অফ আৰ্টৰ বাণিজ্যিক কলা বিভাগৰ পৰা স্নাতক ডিগ্ৰী লাভ কৰা অসমীয়া শিল্পী।
মুম্বাইত শিক্ষা গ্ৰহণ কৰা সময়তে তেওঁ অসম চৰকাৰৰ পর্যটন বিভাগৰ বাবে এশিঙীয়া গঁড়ৰ আইক’নিক ল’গ’টো ডিজাইন কৰি উলিয়াইছিল। সত্তৰৰ দশকৰ শেষৰ ফালে তেওঁ ইংলেণ্ডলৈ স্থানান্তৰিত হয় আৰু কৰ্মস্থলী হিচাপে লণ্ডনতে স্থায়ীভাৱে বসবাস কৰিবলৈ আৰম্ভ কৰে। লণ্ডনৰ মাজমজিয়াত বিশেষ ভাৱে পৰিচিত Plus One Design নামৰ ডিজাইন প্রতিষ্ঠান স্হাপন কৰে।
পৰৱৰ্তী সময়ত এই প্রতিষ্ঠানটো গ্রাফিক ডিজাইনৰ ক্ষেত্ৰত লণ্ডনৰ এটি বিশেষ গুৰুত্বপূৰ্ণ প্রতিষ্ঠান হিচাপে পৰিগণিত হয়। লণ্ডনত গঢ়ি তোলা শিল্প প্ৰতিষ্ঠানটোৱে প্ৰয়াত বৰুৱাৰ কলাসুলভ প্ৰতিভা আৰু অতুলনীয় দক্ষতা প্রতিফলিত কৰিছিল। মৃত্যুৰ সময়ত শিল্পীগৰাকীয়ে থাই ৰাজ পৰিয়ালৰ পত্নী লিলি, পুত্ৰ জেছপাৰক আৰু বোৱাৰীক এৰি থৈ যায়।
