অপৰাধ গোচৰত শাস্তিৰ বিৰুদ্ধে আবেদন দাখিলৰ পাছত যদি অভিযুক্ত তথা প্ৰতিপক্ষৰ অধিবক্তা হাজিৰ নাথাকে তেতিয়াহ’লেও আবেদন খাৰিজ নকৰি ইয়াক মেৰিটৰ ওপৰত বিচাৰ কৰি ৰায় দিব লাগিব।
উচ্চতম ন্যায়ালয়ে অলপতে দিয়া এই ৰায়ে সেই সাধাৰণ দুখীয়া লোকসকলক সকাহ দিলে যিসকলৰ অধিবক্তা নিয়োগ কৰাৰ সামৰ্থ্য নাথাকে।
এতিয়া তেওঁলোকৰ কাৰাগাৰৰ পৰা প্ৰেৰণ কৰা আবেদনৰ ওপৰতে শুনানি গ্ৰহণ কৰা হ’ব।
উচ্চতম ন্যায়ালয়ে ৰায় দান কৰি সকলো উচ্চ ন্যায়ালয়কে এই নিৰ্দেশ দিছে।
সৰ্বোচ্চ ন্যায়ালয়ে লগতে এই নিৰ্দেশৰ সৈতে এটা গোচৰ মাদ্ৰাছ উচ্চ ন্যায়ালয়লৈ বিষয়টো পুনৰ মেৰিটৰ ওপৰত বিচাৰ কৰিবলৈ ঘুৰাই পঠায়।
ন্যায়াধীশ আৰ এফ নৰীমনৰ নেতৃত্বৰ তিনিজনীয়া ন্যায়াধীশৰ বিচাৰপীঠে লগতে যোৱা ১১ বছৰে কাৰাগাৰত থকা অভিযুক্তগৰাকীৰ জামিনো মঞ্জুৰ কৰে।
উচ্চতম ন্যায়ালয়ে স্পষ্ট কৰে যে উচ্চ ন্যায়ালয়ে অভিযুক্ৰ পক্ষৰ অধিবক্তাৰ অনুপস্থিতিত আবেদন মেৰিটৰ ওপৰত বিচাৰ নকৰাকৈ খাৰিজ কৰিব নোৱাৰে।
আনহাতে, যদি দুয়োপক্ষৰে অধিবক্তা অনুপস্থিত থাকে তথাপিও আদালতে গোচৰ স্থগিত কৰিবলৈ বাধ্য নহয়।
উচ্চতম ন্যায়ালয়ে কয় যে আদালতে গোচৰৰ দোষ-গুণৰ আধাৰত বিচাৰ কৰিব আৰু ট্ৰায়েল কোৰ্টৰ সিদ্ধান্ত চালিজাৰি চাই গোচৰৰ নিষ্পত্তি কৰিব।
যদি অভিযুক্ত কাৰাগাৰত বন্দী হৈ থাকে আৰু তেওঁৰ অধিবক্তা উপস্থিত নহয় তেতিয়াহ’লে আদালতে অভিযুক্তক উপস্থিত হ’বলৈ সুযোগ দিব আৰু গোচৰ স্থগিত ৰাখিব।
আদালতে লগতে অধিবক্তা উপস্থিত নহ’লে ৰাজ্য চৰকাৰৰ খৰচত অধিবক্তা নিযুক্ত কৰিব পাৰে।
মাদ্ৰাছ উচ্চ ন্যায়ালয়ে অপৰাধ গোচৰত অভিযুক্তৰ ভাষ্য নুশুনাকৈ সিদ্ধান্ত ল’ব নোৱাৰি বুলি কৈ আবেদনৰ শুনানি গ্ৰহণ কৰিবলৈ অস্বীকাৰ কৰিছিল।
উচ্চ ন্যায়ালয়খনে চুকুৰ আলী গোচৰৰ উল্লেখ কৰে য’ত উচ্চতম ন্যায়ালয়ৰ দুজনীয়া বিচাৰপীঠে কৈছিল যে অভিযুক্তৰ ভাষ্য নুশুনাকৈ ৰায় দিব পৰা নাযায়।
কিন্তু বিচাৰপীঠখনে কয় যে বনী সিং গোচৰ বৃহৎ বিচাৰপীঠৰ সিদ্ধান্ত আৰু ই চুকুৰ আলীৰ ক্ষেত্ৰত দিয়া সিদ্ধান্তক খাৰিজ কৰি দিছিল।