আজিৰ ছবিখন বৰ্তমান সময়ত বিশ্বজুৰি চৰ্চাত থকা এখন ছবি। সদ্য অনুষ্ঠিত ৯৫ সংখ্যক একাডেমী বঁটা প্ৰতিযোগিতাত দ্য হুৱেল ছবিখনত কৰা অনবদ্য অভিনয়ৰ বাবে অভিনেতা ব্ৰেণ্ডন ফ্ৰেজাৰে শ্ৰেষ্ঠ অভিনেতাৰ অস্কাৰ বঁটা লাভ কৰিবলৈ সক্ষম হৈছে। একাডেমী বঁটাৰ বাদেও,ফ্ৰেজাৰে ইতিমধ্যেই আন কেইবাটাও বিশেষ বঁটাও লাভ কৰিছে। আনহাতে এই ছবিখনে শ্ৰেষ্ঠ মেক-আপ আৰু হেয়াৰষ্টাইলৰ শিতানতো আন এটি অস্কাৰ বুটলিছে। ২০২২ বৰ্ষৰ ছেপ্তেম্বৰ মাহত ভেনিছ আন্তঃৰাষ্ট্ৰীয় চলচ্চিত্ৰ মহোৎসৱত প্ৰথম প্ৰদৰ্শনী হোৱা এই ছবিখন বৰ্তমান গুৱাহাটীত এটি হলত চলি আছে আৰু অতি শীঘ্ৰেই অ টি টি প্লেটফৰ্মত উপলব্ধ হ’ব। অতি সূক্ষ্ম মনস্তাত্ত্বিক বিষয়ৰ ভেটিত নিৰ্মিত ছবি “দ্য হুৱেল”-ৰ পৰিচালনা-ডেৰেন এৰনফস্কীৰ। ছবিখন নাট্যকাৰ চেমুৱেল ডি হান্টাৰৰ ২০১২ বৰ্ষৰ একে নামৰ নাটকখনৰ ভিত্তিত নিৰ্মিত হৈছে। চিত্ৰনাট্য লিখিছে-চেমুৱেল ডি হান্টাৰেই।
ছবিখনৰ আৰম্ভণি ঘটে- এক বিশাল বপু(চাৰ্লি-মূখ্য চৰিত্ৰ)ৱে হস্তমৈথুন কৰি থকা অৱস্থাতে সন্মুখীন হোৱা হৃদযন্ত্ৰৰ সমস্যাৰে। চাৰ্লি এজন শিক্ষক, যি অস্বাভাৱিক আৰু অস্বাস্থ্যকৰভাৱে মেদবহুল। দেহৰ অত্যধিক ওজনৰ বাবে চাৰ্লিৰ শৰীৰটো লৰাবলৈকে টান, সহায় লৈ হে থিয় দিব বা খোজ কাঢ়িব পাৰে। তেনে অৱস্থাৰেই চাৰ্লি এগৰাকী বান্ধৱী তথা নাৰ্ছৰ সাময়িক সহায় লৈ অকলশৰে নিজ গৃহত বাস কৰে। বেমাৰ হ’লেও, আনকি প্ৰাণবায়ু যোৱাৰ উপক্ৰম হ’লেও, চাৰ্লি পিছে হাস্পতেললৈ নাযায়। মুঠতে ঘৰটোৰ পৰা কোনো কাৰণতেই নোলায় চাৰ্লি। চাৰ্লিৰ এই মেদবহুলতা, অস্বাভাৱিক মানসিক আচৰণ আৰু জীৱনৰ আঁৰৰ কাহিনীক লৈয়েই ছবিখন আগবাঢ়ে। চিনেমাৰ আৰম্ভণিৰ ১৫ মিনিট নৌ হওঁতেই দৰ্শক একাত্ম হৈ পৰিব চিনেমা আৰু চাৰ্লিৰ চৰিত্ৰটিৰ সৈতে। পৰিচালক, কাহিনীকাৰ সফল এইখিনিতে।
কিছু লোকে মানসিক চাপ আৰু ৰোগত ভূগিলে অত্যধিক ভোজন কৰে। চাৰ্লিয়েও মানসিক উদ্বিগ্নতা বঢ়াৰ লগে লগেই আৰু প্ৰয়োজনাধিক অপুষ্টিকৰ খাদ্য খাবলৈ আৰম্ভ কৰে, যি চাৰ্লিৰ শৰীৰৰ বাবে অপকাৰী। আৰু ঠিক এইখিনিৰ পৰায়েই ছবিখনত চাৰ্লিৰ মানসিক উদ্বিগ্নতাৰ প্ৰতিফলন ঘটিবলৈ আৰম্ভ কৰে। চাৰ্লিৰ যুৱতী কন্যা এলী(চেদী চিংক)ঘৰলৈ আহিলে, এলীৰ সামান্য মনোযোগ পাবলৈ চাৰ্লিয়ে কৰা কামবোৰেই সূচাই, জীয়ৰীৰ লগত পুনৰাই সংযুক্ত হ’বলৈ বিচৰা চাৰ্লিৰ হাহাকাৰখিনিক। কাহিনীৰ সাৱলীল গতিৰ লগতেই ছবিৰ মধ্যমণি চাৰ্লিৰ চৰিত্ৰটিৰ পৰা আৰম্ভ কৰি, এলী, চাৰ্লিৰ বান্ধৱী নাৰ্ছগৰাকী, চাৰ্লিৰ প্ৰাক্তন পত্নী, চাৰ্লিৰ প্ৰয়াত পুৰুষ-সংগী-এই সকলোৰে আৱেগ আৰু আচৰণক গ্ৰহণযোগ্যতা প্ৰদান কৰিছে চিত্ৰনাট্যকাৰে।
মানসিক ৰোগগ্ৰস্ততাৰ লগতেই, সম্পৰ্কসমূহ আৰু এজন ব্যক্তিৰ নিজ যৌনতাক ন-কৈ আৱিষ্কাৰ কৰা আদি অতি সংবেদনশীল বিষয়বস্তুক ছবিখনত সামৰি লোৱা হৈছে। মেথিউ লিমাটিকৰ আলোকশিল্পৰ কাম খুবেই ভাল লগা। কাহিনীৰ ভাবগধুৰতাৰ লগত সংগতি ৰাখি, বন্ধ ঘৰটিৰ ভিতৰত সোমাই থকা চাৰ্লিৰ চৌপাশত অহৰহ ধূঃসৰ পোহৰৰ ব্যৱহাৰ কৰা হৈছে। নিশা কিবাকৈ বিছনাত পৰা ভাৰাক্ৰান্ত চাৰ্লিক এটি ডীম লাইটৰ পোহৰেৰে দেখুৱায়। একেদৰেই ৰব চিমেঞ্চনৰ আৱহ-সংগীতৰ ব্যৱহাৰ অতি প্ৰসংশনীয়। মধ্যান্তৰ বিৰতিৰ পূৰ্বৰ পৰাই ক্ৰমশঃ এক বিষাদবোধে আৱৰি ধৰে। কিমান জটিল আৰু যন্ত্ৰণাদায়ক হোৱাৰ লগতেই কিমান সুখকৰ হ’ব পাৰে সম্পৰ্ক-তাৰ সমুচিত প্ৰতিফলন ঘটে ছবিখনত। এটি সম্পৰ্কক কিমান সীমাবদ্ধ কৰি ৰখাব হয় আৰু ইয়াৰ প্ৰসাৰতা প্ৰকৃততে কিমান বেছি-এনে কথাকো তুলি ধৰা হৈছে। কিমান বেছি মানসিক যন্ত্ৰণাত এজন ব্যক্তিয়ে নিজকে শেষ কৰি নিয়াৰ বাটত অগ্ৰসৰ হয়-তাক প্ৰদৰ্শনৰ বাবে ইতিমধ্যেই মৃত্যুমুখী হৈ পৰা চাৰ্লিয়ে গোগ্ৰাসে খাদ্য ভক্ষণ কৰা দৃশ্যাংশ-সকলোৰে বাবে চোৱা সহজ নহয়। ছবিখনৰ সম্পাদনাৰ দিশটিও চকুতলগা।
ছবিখনৰ মূখ্য আকৰ্ষণ মূল চৰিত্ৰ- চাৰ্লি(ব্ৰেণ্ডন ফ্ৰেজাৰ)। দেহত অহৰহ প্ৰায় ১৫০ কেজি ওজনৰ প্ৰ’ষ্ঠেটিক মেক-আপৰ চুইট এযোৰ পিন্ধিও, চকু-মুখৰ অভিব্যক্তিতেই যি দুৰ্দ্দান্ত অভিনয় কৰিছে-সেয়া অতুলনীয়। এলীৰ চৰিত্ৰৰ লগতে বাকীকেইটা চৰিত্ৰও সহজ। শেষাংশৰ ফাললৈ কাহিনীয়ে দাবী কৰা অনুসৰি ভাঙি পৰিব দৰ্শক। অন্তিম দৃশ্যত ঘৰৰ মূল দৰজা খোল খাই এলী আৰু চাৰ্লি বাহিৰৰ পোহৰেৰে উদ্ভাসিত হৈ পৰাৰ দৃশ্যই প্ৰতীকাৰ্থত পিতৃ-কন্যাৰ সম্পৰ্কলৈ অন্তিম পোহৰ অহাকেই দৰ্শায়। চিনেমা শেষ হোৱাৰ পিছতো কিছুপৰলৈকে এক তীব্ৰ মানসিক জোঁকাৰনি তুলি থাকিব ছবিখনে। থেকেঁচা-মোহৰা খাই চুচ্চূৰ্মৈ হৈ পৰা প্ৰতিটো চৰিত্ৰই পিছে আনৰ বাবে কিবা এটা ভাল কৰাৰ তাগিদাত থাকে- এইটো এটা খুবেই সুন্দৰ দিশ ছবিখনৰ।
(লেখকৰ মেইল- [email protected])
