“শিল্পীৰ কোনো ধৰণৰ ধৰ্ম নাথাকে, শিল্পই হ’ল শিল্পীৰ প্ৰকৃত ধৰ্ম,”—সোমবাৰে বহু প্ৰত্যাশিত বটদ্ৰৱা প্ৰকল্পৰ উদ্বোধনৰ মুহূৰ্তত এইদৰেই নিজৰ অনুভৱ ব্যক্ত কৰে বিশিষ্ট চিত্ৰশিল্পী তথা ভাস্কৰ নূৰুদ্দিন আহমেদে।
গুৰু আসনৰ পৰা তোৰণলৈকে এই সমগ্ৰ প্ৰকল্পটো নূৰুদ্দিন আহমেদৰ লগতে তেওঁৰ দুই পুত্ৰ ৰাজ আহমেদ আৰু দীপ আহমেদৰ যুটীয়া প্ৰচেষ্টাত নিৰ্মাণ কৰা হৈছে।
মহাপুৰুষ শ্ৰীমন্ত শংকৰদেৱৰ পবিত্ৰ জন্মস্থানৰ কাষতে ২০২১ চনৰ পৰা নিৰ্মাণ কাৰ্য আৰম্ভ হোৱা এই বটদ্ৰৱা থান প্ৰকল্পটো আজি কেন্দ্ৰীয় গৃহমন্ত্ৰী অমিত শ্বাহে আনুষ্ঠানিকভাৱে উদ্বোধন কৰে। এই প্ৰকল্পটোৰ প্ৰতিটো ভাস্কৰ্য, চিত্ৰ আৰু অলংকাৰিক কাৰ্য নূৰুদ্দিন আহমেদে নিজেই নিৰ্মাণ কৰিছে।
এই বিৰাট প্ৰকল্পটোক বাস্তৱ ৰূপ দিবলৈ শিল্পীগৰাকীয়ে ভাগৱত আৰু কীৰ্তন গভীৰভাৱে অধ্যয়ন কৰিছিল, যাতে প্ৰতিটো মূৰ্তি আৰু সজ্জাই গুৰুজনাৰ জন্মস্থানৰ আধ্যাত্মিক আৰু সাংস্কৃতিক ভাবধাৰাক সঠিকভাৱে প্ৰতিনিধিত্ব কৰিব পাৰে।
ইয়াত বিশেষকৈ বিষ্ণুৰ দশৱতাৰ, হনুমান আৰু পৰম্পৰাগত গায়ন-বায়নৰ সুন্দৰ ভাস্কৰ্যসমূহ নিৰ্মাণ কৰা হৈছে যিবোৰ তেওঁ নিজৰ দুই পুত্ৰৰ সৈতে অতি নিপুণতাৰে গঢ়ি তুলিছে।
আহমেদৰ এই কাম এতিয়া অসমৰ শিল্প আৰু ধৰ্মীয় ঐতিহ্যৰ এক উজ্জ্বল নিদৰ্শন হৈ পৰিছে। ৫০ বছৰৰো অধিক কাল ধৰি অসমৰ সাংস্কৃতিক জগতখনলৈ গুৰুত্বপূৰ্ণ অৱদান আগবঢ়াই অহা এইগৰাকী জ্যেষ্ঠ শিল্পীয়ে ইতিপূৰ্বে দুৰ্গা পূজাৰ প্ৰতিমা, মণ্ডপ সজ্জা আৰু ভাওনা সমাৰোহৰ বিভিন্ন কামৰ জৰিয়তে নিজৰ এক সুকীয়া পৰিচয় দাঙি ধৰিবলৈ সক্ষম হৈছে।
