পেহেলগামৰ সন্ত্ৰাসবাদী আক্ৰমণৰ পিছত, ভাৰত আৰু পাকিস্তানৰ মাজত উদ্ভৱ হোৱা সামৰিক উত্তেজনা সম্প্ৰতি শাম কাটিবলৈ আৰম্ভ কৰিছে যদিও পৰিস্থিতি কিন্তু এতিয়াও সম্পূৰ্ণ স্বাভাৱিক হৈ উঠা নাই। যোৱা ২২ এপ্ৰিলৰ সন্ত্ৰাসবাদীৰ আক্ৰমণ আৰু তাৰপিছত ভাৰতৰ সৈন্যবাহিনীৰ সন্ত্ৰাসবাদীৰ ঘাটিত সিন্দুৰ অভিযানে দুয়োখন দেশৰ মাজৰ পৰিস্থিতি উত্তপ্ত আৰু যুদ্ধোন্মুখ কৰি তুলিছিল। কিন্তু সৌভাগ্যক্ৰমে ১০ মেৰ দিনা ভাৰত-পাকিস্তানৰ মাজত হোৱা যুদ্ধ-বিৰতিৰ পিছত, সম্প্ৰতি পৰিস্থিতি ক্ৰমাত স্বাভাৱিক অৱস্থালৈ আহিবলৈ ধৰিছে। পেহেলগামৰ সন্ত্ৰাসবাদী আক্ৰমণক ভাৰতবৰ্ষত, সকলোৱে একমুখে গৰিহণা দিছিল।সন্ত্ৰাসবাদীৰ ঘাটিত সেনাবাহিনীয়ে চলোৱা সিন্দুৰ অভিযানকো দল মত নিৰ্বিশেষে দেশৰ ভিতৰৰ সকলোৱে সমৰ্থন কৰিছিল। ৰাষ্ট্ৰীয় নিৰপত্তাৰ প্ৰশ্নটো যে দলীয় ৰাজনীতিৰ উৰ্দ্ধৰ, সেইটো সকলোৱে মানি লৈছিল। কিন্তু এই সময়ছোৱাত অনুষ্ঠিত হোৱা দুয়োখন সৰ্বদলীয় বৈঠকত প্ৰধানমন্ত্ৰী নৰেন্দ্ৰ মোদী উপস্থিত থকা নাছিল। তাৰপিছত, সিন্দুৰ অভিযানৰ সফলতাক লৈ বিজেপিয়ে ত্ৰিৰংগা যাত্ৰা উলিয়াইছিল যিটো দেখদেখকৈ দেশৰ নিৰপত্তাৰ প্ৰশ্ন এটাৰ ৰাজনীতিকৰণ। এতিয়া, ভাৰতীয় ৰে’লেৱেৰ ই-টিকতত মোদীৰ ছৱি দি সিন্দুৰ অভিযানৰ উল্লেখ কৰাটোও দেশৰ নিৰপত্তাৰ প্ৰশ্ন এটাকলৈ ৰাজনীতি কৰা হোৱা নাইনে? তাৰমানে, শাসকদলে ৰাষ্ট্ৰীয় নিৰপত্তাৰ প্ৰশ্ন এটাক দলীয় প্ৰচাৰৰ আহিলা কৰাত আপত্তি নাই। কিন্তু আন দলে কৰাতহে আপত্তি। কিয়নো এই বিষয়ে আন দলে যদি চৰকাৰৰ ভুল ত্ৰুটি আঙুলিয়াই দিয়ে তেতিয়া বিজেপিয়ে কিন্তু তৎক্ষণাত তাত ৰাজনীতিৰ গোন্ধ পায়।
যোৱা দুই-তিনি দিন আমি আন এক ৰাজনৈতিক বিতৰ্ক লক্ষ্য কৰিছোঁ। পাকিস্থানৰ পৰা অহা সন্ত্ৰাসবাদীয়ে পেহেলগামত কৰা আক্ৰমণ, সিন্দুৰ অভিযান আৰু তাৰপিছত ভাৰত আৰু পাকিস্তানৰ মাজত সৃষ্টি হোৱা সামৰিক উত্তেজনা- এই সমগ্ৰ পৰিস্থিতিটোৰ বিষয়ে আন্তঃৰাষ্ট্ৰীয় মহলত ভাৰতৰ স্থিতি আৰু অৱস্থান দাঙি ধৰিবলৈ ভাৰত চৰকাৰে পৃথিৱীৰ বিভিন্ন দেশলৈ কেইবাটাও প্ৰতিনিধি দল পঠিওৱাৰ সিদ্ধান্ত লৈছে যিটো এটা গুৰুত্বপূৰ্ণ পদক্ষেপ। সামৰিক ৰণ কৌশলৰ লগত কূটনীতিৰ সম্পৰ্ক এৰাব নোৱাৰা। পেহালগামৰ সন্ত্ৰাসবাদী আক্ৰমণটো কিমান ভয়াবহ আছিল আৰু ভাৰতে কিয় সিন্দুৰ অভিযান চলাবলৈ বাধ্য হৈছিল বা ইমানদিন কিয় পাকিস্তানে সন্ত্ৰাসবাদী সকলক আশ্ৰয় দি আহিছে- সেইবোৰ কথা আন্তৰ্জাতিক মহলত সঠিকভাবে উপস্থাপন কৰাটো এটা অত্যন্ত গুৰুত্বপূৰ্ণ কূটনৈতিক পদক্ষেপ। তাৰকাৰণে চৰকাৰে সাতটা সৰ্বদলীয় প্ৰতিনিধি দল পৃথিৱীৰ বিভিন্ন দেশলৈ পঠিয়াবলৈ লোৱা সিদ্ধান্তটো এক প্ৰশংসনীয় পদক্ষেপ। সেইখিনিলৈ সকলো ঠিকে আছিল।
কিন্তু কেনা লাগিল প্ৰতিনিধি নিৰ্বাচনৰ প্ৰক্ৰিয়াক লৈ। এটা ৰাজনৈতিক দলে এনে এটা প্ৰতিনিধি দলৰ বাবে তেওঁলোকৰ দলৰ পৰা কাক নিৰ্বাচন কৰিব সেইটো ৰাজনৈতিক দলটোৰ নিজৰ কথা। তাত শাসকীয় দলটোৱে হস্তক্ষেপ কৰিব নোৱাৰে। কিন্তু আমি আচৰিত হৈছোঁ যে শাসকীয় বিজেপিয়ে ঠিক সেইটোৱে কৰিছে। কংগ্ৰেছে সৰ্বদলীয় প্ৰতিনিধিৰ বাবে তেওঁলোকৰ দলৰ পৰা নাম দিছিল পূৰ্বৰ কেন্দ্ৰীয় মন্ত্ৰী আনন্দ শৰ্মা আৰু বৰ্তমানৰ লোকসভাৰ উপদলপতি গৌৰৱ গগৈ আৰু আন দুজনৰ । কিন্তু কংগ্ৰেছৰ মতৰ বিপৰীতে গৈ তেওঁলোকৰ দলৰ পৰা শশী থাৰুৰ আৰু আন তিনিজনৰ নামহে সৰ্বদলীয় প্ৰতিনিধি দলত অন্তৰ্ভুক্ত কৰাৰ কথা ওলাল যিটো কংগ্ৰেছৰ প্ৰচাৰ কোষৰ মূৰব্বী জয়ৰাম ৰমেশে সমালোচনা কৰিছে। ঠিক একেটা ঘটনা ঘটিছে তৃণমূল কংগ্ৰেছৰ ক্ষেত্ৰত। তৃণমূল কংগ্ৰেছৰ মূৰব্বী মমতা বেনাৰ্জী আৰু সাধাৰণ সম্পাদক অভিষেক বেনাৰ্জীয়েও চৰকাৰে বিদেশলৈ সৰ্বদলীয় প্ৰতিনিধি দল পঠিওৱা সিদ্ধান্তটো আদৰণি জনাইছে। কিন্তু তেওঁলোক দুয়ো স্পষ্টভাবে কৈছে এই প্ৰতিনিধি সকলৰ মাজত তৃণমূল কংগ্ৰেছৰ পৰা কোন থাকিব সেই সিদ্ধান্ত তৃণমূল কংগ্ৰেছেহে ল’ব, বিজেপি চৰকাৰে ল’ব নোৱাৰে। ভাৰতীয় জনতা পাৰ্টিয়ে অন্য দলৰ ভিতৰত কেনেকৈ হস্তক্ষেপ কৰিব পাৰে? আমি দেখিছোঁ যোৱা সময়ছোৱাত বিভিন্ন প্ৰসংগত, বিশেষকৈ ভাৰত- পাকিস্তান উত্তেজনাৰ ক্ষেত্ৰত শশী থাৰুৰৰ মতামত চৰকাৰৰ মতামতৰ লগত প্ৰায় একে। সেইটো আপোনালোকে শশী থাৰুৰ সৈতে অলপতে ‘দা ৱায়াৰ’ৰ হৈ কৰণ থাপৰে লোৱা সাক্ষাৎকাৰটো চালেই গম পাব। কিন্তু কংগ্ৰেছৰ মতামত বেলেগ। তেনেস্থলত দলৰ মতৰ বিপৰীতে গৈ কংগ্ৰেছ দলৰ পৰা শশী থাৰুৰক সৰ্বদলীয় প্ৰতিনিধি দলত অন্তৰ্ভুক্ত কৰাটো এটা নিম্নমানৰ ৰাজনীতি নহয়নে? তাকো ৰাষ্ট্ৰীয় নিৰপত্তাৰ বিষয় এটালৈ শাসকীয় বিজেপি দলটোৱে এনে কূটিল ৰাজনীতি কৰাটো উচিত হৈছেনে। বিজেপিয়ে দেশৰ কথাকলৈ ৰাজনীতি কৰা বুলি আনক হাঁহে। কিন্তু নিজে হ’লে সকলো কথা দলীয় ৰাজনীতিৰ উৰ্দ্ধলৈ গৈ কেতিয়াও নোৱাৰে।
