এজন হিন্দু ধৰ্মীয় গুৰুৰ বিৰুদ্ধে নাবালিকাক ধাৰাবাহিক ধৰ্ষণৰ গুৰুতৰ অভিযোগ উত্থাপন হৈছে। অভিযোগ মতে, হিন্দু পুৰোহিত গৰাকীয়ে নাবালিকাগৰাকীক তেওঁৰ আশ্ৰমত কেইবাবাৰো ধৰ্ষণ কৰিছিল।
আশ্ৰমৰ পৰা পলায়ন কৰি নাবালিকা গৰাকীয়ে থানাত এজাহাৰ দাখিল কৰাৰ পাছতহে ঘটনাটো পোহৰলৈ আহিছে। অভিযুক্ত হিন্দু ধৰ্মগুৰু গৰাকী হৈছে স্বামী পূৰ্ণানন্দ। উল্লেখ্য যে ১১ বছৰ পূৰ্বে এইগৰাকী স্বামী পূৰ্ণানন্দৰ বিৰুদ্ধে একেই অভিযোগ উত্থাপন হৈছিল।
জানিব পৰা মতে অভিযোগকাৰী নাবালিকা গৰাকী কেইবাবছৰ ধৰি স্বামী পূৰ্ণানন্দৰ আশ্ৰমৰে বাসিন্দা আছিল। অন্ধ্ৰ প্ৰদেশ আৰক্ষীৰ তথ্য অনুসৰি ১৩ জুনৰ পৰা নিৰুদ্দেশ হৈ আছিল নাবালিকাগৰাকী। অভিযোগ দাখিল কৰাৰ পিছত মহিলা আৰক্ষীৰ বিশেষ দলে কিশোৰীগৰাকীক উদ্ধাৰ কৰে।
ইয়াৰ পিছত নাবালিকা গৰাকীয়ে স্বামী পূৰ্ণানন্দৰ বিৰুদ্ধে ধৰ্ষণৰ এজাহাৰ দাখিল কৰে। আশ্ৰমত থকা সময়ছোৱাত ধৰ্ম গুৰু গৰাকীয়ে কেইবাবাৰো নাবালিকা গৰাকীক যৌন নিৰ্যাতন আৰু ধৰ্ষণ কৰা বুলি এজাহাৰত উল্লেখ কৰা হৈছে।
জানিব পৰা স্বামী পূৰ্ণানন্দৰ আশ্ৰমত মুঠ ১২ গৰাকী কিশোৰ-কিশোৰী থাকে। ইয়াৰে ৪ গৰাকী হৈছে কিশোৰী। ভুক্তভোগী কিশোৰীগকাৰীয়ে ২০১৬ চনৰ পৰা স্বামী পূৰ্ণানন্দৰ আশ্ৰমত আছিল। আৰু তেতিয়াৰ পৰাই কিশোৰীগৰাকীৰ ওপৰত অবিৰতভাৱে যৌন অত্যাচাৰ চলাই আহিছে স্বামী পূৰ্ণানন্দই।
ইফালে, আৰক্ষীৰ সূত্ৰই জনোৱা মতে, অভিযুক্ত ধৰ্ম গুৰু গৰাকীক এতিয়াও গ্ৰেপ্তাৰ কৰিব পৰা নাই। অন্ধ্ৰ প্ৰদেশ আৰক্ষীয়ে কয় যে ২০১২ চনতো এইগৰাকী হিন্দু ধৰ্মগুৰুৰ বিৰুদ্ধে নাবালিকাক ধৰ্ষণ কৰাৰ অভিযোগো উত্থাপন হৈছিল। সেই অভিযোগৰ বিচাৰ প্ৰক্ৰিয়া এতিয়াও অব্যাহত আছে।
প্ৰকাশ পোৱা মতে ধৰ্মগুৰু গৰাকীৰ বিৰুদ্ধে কেৱল ধৰ্ষণেই নহয়, ভূমি কেলেংকাৰীৰ অভিযোগো উত্থাপন হৈ আহিছে। তেওঁ আশ্ৰমৰ ভূমি অবৈধভাৱে অধিগ্ৰহণ কৰাৰ অভিযোগ। ইফালে জানিব পৰা মতে ধৰ্ষণৰ অভিযোগত অভিযুক্ত এই ধৰ্মগুৰুজনৰ একাধিক ডিগ্ৰী আছে।
অভিযুক্ত স্বামী পূৰ্ণানন্দৰ বিৰুদ্ধে ধৰ্ষণৰ অভিযোগ থকাৰ পিছতো কিয় আশ্ৰম চলাবলৈ দিয়া হৈছে? সৰ্বত্ৰেই এতিয়া সেই প্ৰশ্নৰ উত্থাপন হৈছে।
