অসম অংগনৱাড়ী কৰ্মী সহায়িকা সন্থাই তেওঁলোকৰ কেইবাটাও দাবীৰ সমৰ্থনত অহা ৩ ডিচেম্বৰত মহানগৰীৰ দিচপুৰ লাষ্টগেটত অৱস্থান ধৰ্মঘট কৰিব। লগতে ৩ ডিচেম্বৰত সমগ্ৰ অসমৰ অংগনৱাড়ী কেন্দ্ৰ বন্ধ ঘোষণাও কৰিছে।
এই কথা আজি প্ৰেছ বিবৃতিৰ জৰিয়তে জনায় অসম অংগনৱাড়ী কৰ্মী সহায়িকা সন্থাই। এই প্ৰতিবাদী কাৰ্যসূচীত অসমৰ সকলো জিলা প্ৰকল্পৰ কৰ্মী, সহায়িকা সকলক উক্ত ধৰ্মঘট কাৰ্যসূচীত অংশ গ্ৰহণ কৰিবৰ বাবে সভানেত্ৰী সবিতা বৰগোহাঁই আৰু সম্পাদিকা ভাৰতী বৰগোহাঁই গগৈয়ে প্ৰেছ বিবৃতিৰ জৰিয়তে আহ্বান জনায়।
অংগনৱাড়ী কৰ্মী সহায়িকাৰ চাকৰি স্থায়ীকৰণ, পদোন্নতি, অৱসৰকালীন আৰ্থিক সাহায্য আৰু দৰমহা বৃদ্ধিৰ লগতে অন্যান্য আন কেইবাটাও দাবীৰ সমৰ্থনত অসম অংগনৱাড়ী কৰ্মী সহায়িক সন্থাই এই প্ৰতিবাদী কাৰ্যসূচী গ্ৰহণ কৰিছে।
উল্লেখযোগ্য যে দীৰ্ঘদিনে অসম অংগনৱাড়ী কৰ্মী সহায়িকা সন্থাই তেওঁলোকৰ বিভিন্ন সমস্যা সমাধানৰ দাবীত কেইবাবাৰো আন্দোলনৰ কাৰ্যসূচী হাতত লৈ আহিছে যদিও চৰকাৰে এই ক্ষেত্ৰত কোনো ব্যৱস্থা গ্ৰহণ কৰা নাই। ফলত ক্ষুব্ধ হৈ পৰিছে অংগনৱাড়ী কৰ্মীসকল।
অতি নিম্ন দৰমহাৰে অংগনৱাড়ী কৰ্মী সহায়িকসকলে নিজৰ কৰ্তব্য পালন কৰিবলগীয়া হোৱাত যথেষ্ট সমস্যাৰ সন্মুখীন হৈ আহিছে।
গতিকে এইক্ষেত্ৰত চৰকাৰ প্ৰশাসনৰ দৃষ্টি আকৰ্ষণৰ বাবে অনিচ্ছাকৃতভাৱে দিচপুৰ লাষ্টগেটত অৱস্থান ধৰ্মঘটৰে প্ৰতিবাদী কাৰ্যসূচী ৰূপায়ণ কৰিবলৈ চৰকাৰেই বাধ্য কৰাইছে বুলি উল্লেখ কৰিছে অসম অঙ্গনৱাড়ী কৰ্মী সহায়িক সন্থাই।
