গুৱাহাটীৰ ভৰলুমুখত গছ কটাৰ বিৰুদ্ধে গঢ়ি উঠা এক প্ৰতিবাদী আন্দোলনৰ সন্দৰ্ভত পঞ্জীয়নভুক্ত এটা গোচৰত বিশিষ্ট অধিবক্তা তথা পৰিৱেশ কৰ্মী অনিন্দিতা দাসৰ বিৰুদ্ধে আদালতে এক চমন জাৰি কৰিছে। উক্ত গোচৰটোত অলপতে আৰক্ষীয়ে আদালতত অভিযোগনামা দাখিল কৰাৰ পিছতেই ন্যায়ালয়ৰ তৰফৰ পৰা এই চমন জাৰি কৰা হয়। গোলঘাট আৰক্ষী থানাৰ জৰিয়তে অভিযুক্ত অধিবক্তাগৰাকীৰ বাসগৃহলৈ প্ৰেৰণ কৰা চমন অনুসৰি, অহা ২৫ জুনত তেওঁক আদালতত হাজিৰ হ’বলৈ নিৰ্দেশ দিয়া হৈছে। চৰকাৰী পক্ষই ভৰলুমুখৰ গছ কটা বিৰোধী আন্দোলনৰ সৈতে জড়িত থকাৰ বাবে দাসক এই গোচৰটোত অভিযুক্ত সজাইছিল।
প্ৰাপ্ত তথ্য আৰু অধিবক্তাগৰাকীৰ সামাজিক মাধ্যমৰ বিবৃতিত প্ৰকাশ কৰা অনুসৰি, ভৰলুমুখৰ পৰিৱেশ সুৰক্ষা আন্দোলনৰ সময়ত তেওঁৰ বিৰুদ্ধে চৰকাৰে এক গোচৰ ৰুজু কৰিছিল। উক্ত ঘটনাৰ পৰিপ্ৰেক্ষিতত পূৰ্বতে গুৱাহাটী উচ্চ ন্যায়ালয়ে ১২ দিনৰ অন্তত দাসক অগ্ৰিম জামিন মঞ্জুৰ কৰিছিল। বৰ্তমান গোচৰটোৰ তদন্ত প্ৰক্ৰিয়া শেষ কৰি অভিযোগনামা দাখিল হোৱাৰ পৰিপ্ৰেক্ষিতত আদালতৰ পৰা পিআৰচি ১৬৫/২৬ (PRC 165/26) নম্বৰৰ অধীনত ‘অভিযুক্তলৈ চমন’ প্ৰেৰণ কৰা হৈছে। এই সন্দৰ্ভত প্ৰতিক্ৰিয়া প্ৰকাশ কৰি অনিন্দিতা দাসে সামাজিক মাধ্যমত উল্লেখ কৰে যে এগৰাকী অধিবক্তা হৈও সমাজৰ স্বাৰ্থত মাত মতাৰ বাবেই তেওঁ জীৱনত প্ৰথমবাৰৰ বাবে আদালতৰ কাঠগড়াত থিয় হ’বলগীয়া হৈছে।
উল্লেখ্য যে গুৱাহাটীৰ উন্নয়নমূলক প্ৰকল্পৰ নামত ভৰলুমুখ অঞ্চলত ব্যাপক হাৰত প্ৰাচীন গছ কাটি ধ্বংস কৰাৰ বিৰুদ্ধে স্থানীয় সচেতন নাগৰিক আৰু পৰিৱেশপ্ৰেমীসকলে তীব্ৰ প্ৰতিবাদ সাব্যস্ত কৰিছিল। সেই আন্দোলনত সক্ৰিয় ভূমিকা গ্ৰহণ কৰা অনিন্দিতা দাসৰ বিৰুদ্ধে চৰকাৰী পক্ষই আইনী ব্যৱস্থা গ্ৰহণ কৰিছিল। আদালতৰ চমন লাভ কৰাৰ পিছতেও নিজৰ স্থিতিত অটল থাকি অধিবক্তাগৰাকীয়ে স্পষ্ট কৰি দিয়ে যে ইয়াৰ পিছতেও তেওঁৰ এই সংগ্ৰাম অব্যাহত থাকিব আৰু গছ, প্ৰকৃতি তথা সমাজৰ সুৰক্ষাৰ হকে তেওঁ সদায় কণ্ঠ নিগৰাই যাব।
বৰ্তমান আদালতৰ এই চমন জাৰি হোৱাৰ পিছত ৰাজ্যৰ পৰিৱেশ কৰ্মী আৰু সচেতন মহলৰ মাজত বিষয়টোক লৈ বিশেষ চৰ্চা আৰম্ভ হৈছে। অহা ২৫ জুনত হ’বলগীয়া পৰৱৰ্তী আদালতৰ শুনানি আৰু এই সন্দৰ্ভত হ’বলগীয়া চৰকাৰী তথা আইনী প্ৰক্ৰিয়াক লৈ এতিয়া সচেতন ৰাইজৰ দৃষ্টি নিবদ্ধ হৈ পৰিছে।
