উত্তৰাখণ্ডৰ ঋষিকেশত ২০২২ চনত সংঘটিত হোৱা ১৯ বছৰীয়া অংকিতা ভাণ্ডাৰীৰ হত্যাকাণ্ডই পুনৰ এক ভয়াৱহ ৰূপ ধাৰণ কৰিছে। বিজেপি নেতাৰ পুত্ৰৰ মালিকানাধীন বনান্তৰা ৰিচৰ্টত এগৰাকী কিশোৰীৰ ওপৰত হোৱা এই যৌন নিৰ্যাতন আৰু হত্যাৰ ঘটনাত এতিয়া বিজেপি আৰু আৰএছএছৰ শীৰ্ষ পৰ্যায়ৰ নেতাৰ নাম সাঙোৰ খাই পৰিছে। ইয়াৰ প্ৰতিবাদত সমগ্ৰ ৰাজ্যজুৰি উত্তপ্ত পৰিস্থিতিৰ সৃষ্টি হৈছে আৰু অহা ১১ জানুৱাৰীত ‘উত্তৰাখণ্ড বন্ধ’ৰ আহ্বান জনোৱা হৈছে।
শেহতীয়াকৈ উত্তৰাখণ্ডৰ অভিনেত্ৰী তথা বিজেপিৰ এজন প্ৰাক্তন বিধায়কৰ পত্নী উৰ্মিলা চানাবৰে সামাজিক মাধ্যমত কিছু কথোপকথন ফাদিল কৰি অভিযোগ কৰিছে যে, অংকিতা ভাণ্ডাৰীক যিজন ব্যক্তিক সন্তুষ্ট কৰিবলৈ বাধ্য কৰা হৈছিল, তেওঁ আছিল বিজেপিৰ এজন অতি প্ৰভাৱশালী নেতা। এই অভিযোগত বিজেপিৰ ৰাষ্ট্ৰীয় সম্পাদক দুষ্যন্ত গৌতমকে ধৰি কেইবাজনো নেতাৰ নাম চৰ্চালৈ আহিছে। যদিও অভিযুক্ত নেতাসকলে ইয়াক ষড়যন্ত্ৰ বুলি আখ্যা দিছে, ৰাইজৰ মাজত প্ৰচণ্ড ক্ষোভৰ সৃষ্টি হৈছে।
বিজেপি নেতা বিনোদ আৰ্যৰ পুত্ৰ পুলকিত আৰ্যৰ মালিকানাধীন বনান্তৰা ৰিচৰ্টত ৰিচেপচনিষ্ট হিচাপে কাম কৰা অংকিতা ভাণ্ডাৰীক ২০২২ চনৰ ১৮ ছেপ্তেম্বৰত হত্যা কৰা হৈছিল। অভিযোগ অনুসৰি, এগৰাকী ‘VIP’ অতিথিক ‘বিশেষ সেৱা’ (যৌন সেৱা) দিবলৈ অস্বীকাৰ কৰা বাবেই অংকিতাক হত্যা কৰা হৈছিল। এই গোচৰত পুলকিত আৰ্য আৰু আন দুজন ইতিমধ্যে কাৰাগাৰত আছে, কিন্তু সেই ৰহস্যময় ‘VIP’ জনৰ পৰিচয় চৰকাৰে লুকুৱাই ৰখা বুলি দীৰ্ঘদিন ধৰি অভিযোগ উত্থাপন হৈ আহিছে।
মুখ্যমন্ত্ৰী পুষ্কৰ সিং ধামীৰ নিৰ্দেশত হত্যাকাণ্ডৰ ঠিক পিছতেই বনান্তৰা ৰিচৰ্টত বুলড্ৰেজাৰ চলাই ভাঙি দিয়া হৈছিল। আন্দোলনকাৰী আৰু অংকিতাৰ পৰিয়ালৰ অভিযোগ যে তদন্তকাৰী দল আহি পোৱাৰ আগতেই গুৰুত্বপূৰ্ণ প্ৰমাণসমূহ (যেনে অংকিতাৰ কোঠা আৰু ফোন) ধবংস কৰিবলৈহে চৰকাৰে এই পদক্ষেপ লৈছিল।
ইফালে এতিয়া, মুখ্যমন্ত্ৰীৰ বাসভৱন ঘেৰাও কৰি হাজাৰ হাজাৰ ছাত্ৰ-ছাত্ৰী আৰু মহিলা সংগঠনে প্ৰতিবাদ সাব্যস্ত কৰিছে। বিৰোধী কংগ্ৰেছ দল আৰু জনসাধাৰণে এই সমগ্ৰ যৌন কেলেংকাৰীৰ নিৰপেক্ষ CBI তদন্তৰ দাবী তুলিছে। অংকিতা ভাণ্ডাৰীৰ ন্যায়ৰ দাবীত ১১ জানুৱাৰীত উত্তৰাখণ্ড বন্ধৰ আহ্বান জনোৱা হৈছে।
