আন’ৰা ইতিমধ্যে সমগ্ৰ বিশ্বজুৰি চৰ্চিত এটি নাম। আজিৰ ছবি আন’ৰা, যিয়ে ৯৭তম অস্কাৰ বঁটা প্ৰতিযোগিতাত শ্ৰেষ্ঠ ছবি, শ্ৰেষ্ঠ পৰিচালক,শ্ৰেষ্ঠ অভিনেত্ৰী,শ্ৰেষ্ঠ চিত্ৰনাট্য আৰু শ্ৰেষ্ঠ সম্পাদনাৰ বঁটা লাভ কৰিবলৈ সক্ষম হৈছে। ইয়াৰ উপৰিও কাঁ চলচ্চিত্ৰ মহোৎসৱত Palme d’or বঁটাও লাভ কৰিবলৈ সক্ষম হৈছিলে। আমেৰিকান মুলৰ ছবিখন প্ৰথমে কাঁ চলচ্চিত্ৰ মহোৎসৱতে প্ৰিমিয়াৰ কৰা হৈছিল ২১মে’,২০২৪ ত। পৰৱৰ্তী সময়ত ২০২৪ ৰে অক্টোবৰ মাহৰ ২৪ তাৰিখে ছবিখন দৰ্শকৰ বাবে মুকলি কৰি দিয়া হয়। পাঁচোটিকৈ অস্কাৰৰে জিলিকাৰ লগতেই অন্যান্য বঁটা-বাহন তথা মনোনয়ন লাভ কৰিবলৈয়ো সক্ষম হৈছে আন’ৰাই।
ছবিখন বৰ্তমান দৰ্শকৰ বাবে জি ফাইভত উপলব্ধ। আন’ৰাৰ পৰিচালনা কৰিছে টাঞ্জাৰিন,ৰেড ৰকেটৰ দৰে আদি বহুল চৰ্চিত ছবিৰ পৰিচালক শ্বন বেকাৰে। ছবিখনৰ কাহিনী আৰু চিত্ৰনাট্যও লিখিছে শ্বন বেকাৰেই। আমেৰিকা যুক্তৰাষ্ট্ৰৰ ব্ৰুকলিনৰ এটি ষ্ট্ৰীপ ক্লাবত কাম কৰা এক্স’টিক ডান্সাৰ(ক্লাবলৈ অহাসকলৰ আগত তৰপ তৰপকৈ দেহৰ বস্ত্ৰ গুচাই,মনোৰঞ্জন প্ৰদান কৰা নৰ্তকী) এনিৰ কাহিনী আন’ৰা।
ছবিৰ আৰম্ভণি হয় ষ্ট্ৰীপ ক্লাৱত এনিৰ গতানুগতিক নৈশচৰ্যাৰে। তাৰ মাজতেই ২৩ বছৰীয়া এনিয়ে লগ পাই এজন ২১ বছৰীয়া ৰাছিয়ান যুৱক ইভানক। ইভান,যিয়ে ভালদৰে ইংৰাজী ক’ব নোৱাৰে আৰু এনি যিয়ে ৰাছিয়ান বুজি পোৱাৰ লগতে,ভঙা ভঙাকৈ ক’বও পাৰে। দুয়োৱে লগ পাই আৰু এই লগ পোৱাই এনিৰ জীৱনলৈ এক বিৰাট পৰিৱৰ্তন আনিবলৈ ধৰে। দুয়োৱে ক্লাৱৰ বাহিৰত,ইভানৰ আমেৰিকাৰ ঘৰত পিছদিনা লগ হয়। দুয়োৰে মাজত কায়িক নৈকট্য বাঢ়ে। আৰু বাঢ়ি বাঢ়ি এনে এক পৰ্যায় পাইগৈ যে ইভানে এনিক এসপ্তাহৰ বাবে তাৰ প্ৰেয়সী হৈ থাকিবৰ বাবে অনুৰোধ কৰে। অৰ্থৰ বিনিময়ত মান্তি হোৱা এনিয়ে অৱশেষত ইভানৰ এক অভাৱনীয় প্ৰস্তাৱৰ সন্মুখীন হয়। ইভানে এনিক বিবাহৰ প্ৰস্তাৱ দিয়ে। হতভম্ব এনিয়ে অৱশেষত ইভানৰ প্ৰস্তাৱত মান্তি হয় আৰু দুয়ো লছ এঞ্জেলছত বিবাহপাশত আৱদ্ধ হয়।
ইভানৰ বিবাহৰ খবৰ দিগগজ ক’লা ব্যৱসায়ী ইভানৰ পিতৃৰ কাণত পৰাৰ লগে লগে হাহাকাৰ লাগে। কাহিনীয়ে গতি সলায়। ইয়াৰ পৰৱৰ্তী পৰ্যায়ত ইভানৰ স্থিতি কি হয়,এনিয়ে কি কৰে,কিদৰে সিহঁত দুয়োৰে সম্পৰ্ক প্ৰচুৰ প্ৰতিকূলতাৰ মাজেৰে যায়,তাক লৈয়েই ছবিখন আগবাঢ়ে। বিশেষকৈ জটিল সময়খিনিত এই যেন এনি ভাগি পৰাৰ ৰূপ এটা দেখিবলৈ পোৱা যাব এনে লাগি থাকে যদিও,পোৱা নেযায়। অন্তৰ্নিহিত সেই আৱেগৰ বহিঃপ্ৰকাশ ছবিৰ অন্তিম দৃশ্যত ঘটে। যিহেতু ষ্ট্ৰীপ ক্লাৱ,এক্স’টিক নৰ্তকীৰ কথা আছে গতিকেই স্বাভাৱিকতেই ছবিখনত ইন্দ্ৰিয় উদ্দীপক কিছু দৃশ্যাংশৰ উপস্থাপন কৰা হৈছে,কিন্তু এক সুষম মাত্ৰাত। আৰম্ভণিৰ হৈ-চৈ,আনন্দময় পৰিবেশ মধ্যাংশৰ পৰা যতি পৰে আৰু শেষাংশলৈ ই এক বিষাদময় পৰিবেশলৈ পৰিৱৰ্তিত হয়। আৰু ক্ৰমশঃ ছবিখনৰ মনোগ্ৰাহিতা বৃদ্ধি পাই। ছবিখনৰ কি দিশৰ প্ৰশংসা নকৰিম সি এক বিষয়। এখন সুষম গতিৰ চলচ্চিত্ৰৰ বাবে এখন গতিশীল আৰু সু-সংৰচিত চিত্ৰনাট্য,ছবিখনৰ সম্পাদনাৰ দিশ,চিনেমেট’গ্ৰাফী,আৱহ সংগীত সকলো দিশেই প্ৰশংসনীয়। ছবিখনৰ সম্পাদনাও কৰিছে পৰিচালক শ্বন বেকাৰেই।
এতিয়া আহিছো অভিনয়ৰ দিশলৈ। প্ৰথমেই নাম ল’ব লাগিব ছবিখনৰ নামভূমিকাত অভিনয় কৰা এনি বা আন’ৰা অৰ্থাৎ মিকি মেডিচনৰ সাৱলীল অভিনয়ৰ কথা। সকলো পৰিস্থিতিতেই মিকি মেডিচন নিজৰ চৰিত্ৰটোত এনেদৰে একাত্ম হৈ আছিল যে সেই চৰিত্ৰটোত মেডিচনৰ বাদে আন কাৰো কথা ভবাৰ থলেই নাই। লগতে ইভানৰ চৰিত্ৰত অভিনয় কৰা মাৰ্ক ইডেলষ্টিনৰ অভিনয়ো শলাগনীয়। মুঠতে কোনো দিশৰে পৰাই আন’ৰা ছবিখন চাই নিৰাশ নহয় আপুনি। ।
