তিনিচুকীয়া জিলাৰ মাকুমত যোৱা ২ জুনৰ দিনা এটা দুৰ্বৃত্তৰ দলে নৃংশসভাৱে ঘপিয়াই হত্যা কৰা আৰক্ষীৰ হাবিলদাৰ গিৰীশ দত্তৰ হত্যাকাণ্ডৰ সৈতে আন এজন অভিযুক্তক আৰক্ষীয়ে গ্ৰেপ্তাৰ কৰিছে।
তিনিচুকীয়াৰ আৰক্ষী অধীক্ষক ৰিপুঞ্জয় কাকতীৰ নেতৃত্বত এটি আৰক্ষীৰ দলে অভিযান চলাই অৰুণাচল প্ৰদেশৰ নামচাইত আত্মগোপন কৰি থকা অৱস্থাৰ পৰা হত্যাকাৰীজনক গ্ৰেপ্তাৰ কৰে। আৰক্ষীয়ে গ্ৰেপ্তাৰ কৰা হত্যাকাৰীজন হৈছে তিনিচুকীয়াৰ বাৰেকুৰি থানাৰ অন্তৰ্গত বৰগাঁৱৰ জিতুপন চুতীয়া।
আনহাতে, হত্যাকাণ্ডত ব্যৱহৃত এ এছ-২৩ টি-৮৯৬০ নম্বৰৰ গ্ৰেণ্ড আইটেন গাড়ীখনো আৰক্ষীয়ে জব্দ কৰিছে। ঘটনাৰ দিনা হত্যাকাৰী জিতুপন চুতীয়াৰ ভাতৃ বিজিত চুতীয়াই গাড়ীখন লৈ গৈছিল। হত্যাকাৰী বিজিত চুতীয়া এতিয়াও পলাতক হৈ আছে।
ইপিনে, আৰক্ষীয়ে যোৱা ৪ জুনত আন এজন হত্যাকাৰী বাৰেকুৰি বৰগাঁৱৰ মিন্টু চুতীয়াক গ্ৰেপ্তাৰ কৰিছিল। হত্যাকাণ্ডত জড়িত চাৰিজন হত্যাকাৰী অৱশ্যে এতিয়াও পলাতক হৈ আছে।
উল্লেখযোগ্য যে যোৱা ২ জুনত মাকুমত অসম আৰক্ষীৰ কমাণ্ডো গিৰীশ দত্তক দুৰ্বৃত্তই খেদি খেদি ঘপিয়াই অতি নৃশংসভাৱে হত্যা কৰিছিল।
কমাণ্ডো গিৰীশ দত্তই নিশা টিংৰাইত অনুষ্ঠিত এক সাংস্কৃতিক অনুষ্ঠানৰ পৰা আহি থকাৰ সময়ত বাটত একাংশৰ লোকৰ সৈতে কোনো কথাক লৈ তৰ্কাতৰ্কি হয়।
ইয়াৰ পাছতে গিৰীশ দত্তই ঘটনাস্থলী ত্যাগ কৰি নিজৰ ঘৰলৈ আহে। কিন্তু দুৰ্বৃত্তৰ দলটোৱে গিৰীশৰ পিছে পিছে গৈ গিৰীশৰ ঘৰত উপস্থিত হয়গৈ আৰু গিৰীশক ঘৰৰ পৰা ৰাস্তালৈ মাতি আনি অতি নৃশংসভাৱে খেদি খেদি ঘপিয়াই হত্যা কৰে।
আনকি ঘটনা সংঘটিত হোৱাৰ সময়ত ঘটনাস্থলীত উপস্থিত থকা গিৰীশ দত্তৰ পিতৃয়ে দুৰ্বৃত্তৰ দলটোক নামাৰিবৰ বাবে অনুৰোধ কৰাৰ পাছতো দুৰ্বৃত্তৰ দলটোৱে কমাণ্ডোজনক ৰেহাই নিদিলে।
