অসম বিজেপিয়ে মুখ বন্ধ কৰিবলৈ চেষ্টা কৰিলেও জাতিৰ স্বাৰ্থত এজনৰ পাছত আন এজনকৈ বিতৰ্কিত নাগৰিকত্ব সংশোধনী বিধেয়কখনৰ বিৰোধিতা কৰিবলৈ সাহসেৰে ওলাই আহিছে ইয়াৰ বিধায়কসকল। কেইবাজনো বিধায়কে ইতিপূৰ্বে বিধেয়কখনৰ বিৰোধিতাত সৰৱ হৈ থকাৰ সময়তে দলক অধিক অস্বস্তিত পেলাই এইবাৰ মুকলি বিৰোধিতা কৰিছে দলটোৰ বিহপুৰীয়াৰ বিধায়ক দেবানন্দ হাজৰিকাই।
বিধায়ক হাজৰিকাই ১৬ জানুৱাৰিত সংবাদ মাধ্যমৰ আগত বিধেয়কখনৰ বিৰোধিতা কৰা বুলি নিজৰ স্পষ্ট স্থিতি প্ৰকাশ কৰে। ‘মই এজন অসমীয়া হিচাপে নাগৰিকত্ব সংশোধনী বিধেয়কক কেতিয়াও গ্ৰহণ কৰিব নোৱাৰোঁ।‘ বিধায়কজনে কয়।
নিজকে অসম আন্দোলনত অংশ লোৱা মানুহ বুলি কৈ কয়, ‘মই সেই আন্দোলনত অংশ লোৱা মানুহ। সেই সময়ত মই চাকৰি এৰি ৰাস্তাই-ঘাটে আন্দোলন কৰি ফুৰিছিলোঁ।‘
‘বিধেয়কখনৰ জৰিয়তে এটা বিশেষ জাতিক আনি আই অসমীৰ বুকুত স্থান দিব বিচাৰিছে, মই ইয়াক কোনো কাৰণতে মানি ল’ব নোৱাৰোঁ।‘ বিধায়কজনে কয়।
ইয়াৰ উপৰি তেওঁ এই নাগৰিকত্ব সংশোধনী বিধেয়কখন সন্দৰ্ভত মুখ্য মন্ত্ৰী সোণোৱালক শীঘ্ৰে নিজৰ স্থিতি স্পষ্ট কৰিবলৈ আহ্বান জনায়।
উল্লেখযোগ্য যে ইতিপূৰ্বে দলটোৰ দিচপুৰ সমষ্টিৰ বিধায়ক অতুল বৰা, চতিয়াৰ বিধায়ক পদ্ম হাজৰিকা, লাহোৱালৰ বিধায়ক ঋতুপৰ্ণ বৰুৱাই এই জাতিধ্বংসী বিধেয়কখনৰ বিৰোধিতা কৰি স্পষ্ট স্থিতি প্ৰকাশ কৰিছে।
মন কৰিব লগীয়া যে অসম বিজেপিয়ে যিমানেই বিধায়কসকলৰ মুখ বন্ধ ৰাখিব খুজিছে, বিধেয়কখনৰ বিৰোধিতা কৰা বিধায়ক সিমানেই বৃদ্ধি পাব ধৰিছে। আনকি এটা অনিৰ্ভৰযোগ্য সূত্ৰই দাবী কৰা মতে, দলত আন বহুকেইজন বিধায়ক এই বিধেয়কখনৰ বাবেই অসন্তুষ্ট হৈ আছে আৰু যিকোনো সময়ত ইয়াৰ বিস্ফোৰণ হ’ব পাৰে।
